Aunke cu ta haya cu el a provoca e asesinato di Sergio Maduro
ORANJESTAD (AAN): Dialuna merdia Hof di Corte Superior a dicidi cu Jennifer Gonzalez di 41 aña ta culpabel di a provoca e asesinato di Sergio Maduro. Hof sinembargo no a mantene e castigo sino a baha esaki di 18 pa 15 aña di prison. Esaki door di e raport di psychiater y psycologo cu ta haya cu Jennifer no ta completo responsabel pa su actonan.
Procurador General: Dia 22 October 2025, tres Hues di Corte Superior (Hof), a trata e caso caminda hasta Bryan Jimenez Mello, e asesino di Sergio Maduro, a worde scucha como testigo.
Procurador General (PG) a bisa Hof, cu e no a yega di experiencia un caso asina complica den su carera. Riba e anochi di 23 pa 24 December 2023, Sergio Maduro a worde asesina na un forma hororoso. A pasa auto riba dje na Matividiri pa laga mustra cu ta un accidente a sosode. Pa solamente 2 mil Florin Bryan Mello a mata Sergio Maduro. Door di declaracion di Bryan Mello a haya sa cu ta Jennifer a provoca e morto di Sergio Maduro, door di ofrece pago na Bryan Mello.
Na opinion di PG, huridicamente no ta necesario cu mester tin un plan pa asesinato, pa asina haya Jennifer culpabel. PG ta haya cu e hecho cu a ofrece pago pa mata, ta suficiente pa considera provoca asesinato. PG a mustra cu Patologo a constata cu tin marca di tire di auto na curpa di e victima. Bryan Mello a bisa cu Jennifer a duna un adelanto pa asina mata Sergio Maduro. Tin mensahenan entre Bryan y Jennifer despues cu Sergio a worde asesina. A purba saca placa for di ATM Machine cu e Debit-Card di Sergio, despues cu el a worde mata pero no a logra.
PG ta haya cu tin suficiente prueba cu ta Jennifer a provoca e asesinato di Sergio Maduro. Den Corte Bryan Mello a bisa cu Jennifer a ofrece placa pa mata Sergio Maduro. PG a mustra cu apesar di ta handicapped, Jennifer tin 10 aña ta trahando na Wendy’s.
PG a tene cuenta cu raport di psychiater y psycologo cu Jennifer ta menos responsabel y pidi Hof pa confirma e sentencia di 18 aña di prison.
Sentencia di Hof: Corte Superior den su sentencia ta bisa cu abogado a bisa cu mester declara Jennifer liber pasobra no tin prueba cu el a provoca e asesinato di Sergio Maduro. Na opinion di abogado mr. D.Croes, Bryan Mello a duna otro declaracion den Corte Superior y cu Bryan Mello ta sufri di problema mental.
No ta kere e asesino: Hof ta haya cu e declaracion di Bryan Mello duna den Corte Superior, esta cu el a mata Sergio den su rabia y no ta riba orden Jennifer, no confiabel. Hof no ta kere esaki pasobra ta awor numa Bryan Mello a declara esaki y no den su declaracionnan anterior.
Hof ta haya cu e declaracionnan di Bryan Mello na Polis, ta duna suficiente prueba cu ta Jennifer a provoca e asesinato di Sergio Maduro.
Jennifer culpabel: Tambe Hof ta haya cu no tin indicacion cu Jennifer no tabata capaz pa planea e asesinato. Na opinion di Hof, Jennifer a bisa diferente persona cu Sergio mester muri y cu e mester laga mustra manera un accidente. El a ofrece placa.
Hof a mustra cu psychiater y psycologo ta mustra cu Jennifer ta menos responsabel pa su actonan.
Hof a baha e castigo: Pa cu e castigo, Hof a mustra cu Jennifer a paga un otro un adelanto pa mata su pareha Sergio. Bryan Mello a choca Sergio mata y despues a pasa auto riba dje y lag’e benta banda di caminda. Hof ta mustra cu asesinato ta un di e delitonan mas grave. A kita bida di Sergio y a causa daño irreparable na e famia di Sergio. Hof a mustra cu den e carta entrega na Hof ta expresa esaki.
Hof a condena Jennifer na 15 aña di prison, kitando e tempo cu ya e ta sera den KIA.
