E ta culpabel di intento di asesinato y posesion di arma di candela
ORANJESTAD (AAN): Hof di Corte Superior, a dicta sentencia den e apelacion di e homber E.Q.O. contra su sentencia di 8 Maart 2024 caminda el a worde condena na 9 aña di prison pa intento di asesinato y posecion di arma di candela. E incidente aki a sosode riba 5 Februari 2023, banda di misa di Noord y cerca di Kinderhuis Imeldahof caminda a los 12 tiro riba un auto coriendo.
PG a exigi pa mantene castigo: Dia 22 October 2025, tratamento di e caso a tuma lugar caminda Procurador General (PG) a bisa Hof cu 5 Februari 2023 den oranan di mainta tempran, Polis a bay banda di misa Santa Ana na Noord, pa un accidente. Dos auto, un Mazda y un MG lo a dal. Polis a constata cu e auto MG tabatin masha hopi impacto di bala.
Polis a bay hospital y a detene hendenan. Investigacion a mustra cu tabatin tiramento di un auto riba e otro y a detene e trio di cual E.Q.O ta forma parti. Hues a condena E.Q.O. na 9 aña di prison y tambe e otro dos. Den e Mazda dos tabatin arma di candela cu a tira riba e MG. Polis a constata 8 impacto di bala riba MG y 2 den windshield. A haya 11 huls di bala riba caminda. Investigacion ta mustra cu e Mazda a sera e MG den cual e homber S.M. tabata sinta. Despues a tira for di e Mazda riba e MG. E autonan a dal contra muraya banda di Imelda Hof y E.Q.O. a keda seriamente herida caminda el a keda varios dia den coma.
Pa loke ta demanda di daño, esnan perhudica no a presenta. PG a bisa Hof cu e ta haya cu e apelacion no ta funda y pa mantene e sentencia di Corte Den Promer Instancia.
Durante tratamento di e caso den Corte Superior, Hof a mustra cu na Polis un di esnan den e Mazda a conta cu E.Q.O. tin problema cu e homber S.M., kende a mata Lalo Webb cu ta primo di E.Q.O. Tambe e acusado a bisa Polis cu e origen di e problema ta E.Q.O. y S.M. Hof a mustra cu 9 Maart 2015, Lalo kende tabata miembro di e gang di Madiki, a worde tira mata den cabez.
Hof no ta kere e otro acusadonan: Un Hues di Corte di Husticia, a lesa e sentencia di Hof di Corte Superior pa E.Q.O., kende a presenta pa scucha su sentencia.
Hof a mustra cu e otro acusadonan a worde scucha dilanti Hues Comisario, como testigo den e caso aki. Nan tur a bisa cu no tabatin un plan di intento di asesinato. Hof a bisa cu e no ta kere e declaracionnan aki. Hof ta bay tras e declaracion di e acusadonan net despues di e incidente. Na Polis nan a papia di un plan. Hof ta haya E.Q.O. ta culpabel di e intento di asesinato di 3 persona.
Hof a baha castigo: Hof, pa cu e castigo a mustra cu E.Q.O. hunto cu otronan, a core banda di un auto cu 3 hende aden y a tira ariba e auto. Hof ta tuma na malo cu a tira riba e auto camindia tin mas hende cu esun cu nan kier a mata.
Hof ta haya cu mester manda un señal bon cla cu no ta tolera e tipo di comportacion aki. Tambe Hof a mustra cu a usa armanan di candela.
Hof a tene cuenta cu e raport di psychiater y psicologo. Na opinion di Hof, apesar di aviso di e raport, cu E.Q.O. ta menos responsabel pa su actonan, Hof ta haya E.Q.O. completo responsabel pa loke a sosode.
Hof a tene cuenta cu E.Q.O. a keda afecta na cabez door di e accidente. Asina na final Hof a condena E.Q.O. na 8 aña di prison, kitando e tempo cu e ta sera den KIA.
