Hues a rechaza peticion di abogadonan y Fiscal
- Hues a reuni tambe cu famia e siman aki
- Grupo grandi pafo di Corte pa sostene famia
ORANJESTAD (AAN): Diabierna mainta e agentenan di Polis M.V. y R.G.D. a presenta dilanti Hues pa e caso penal cu Ministerio Publico a cuminsa contra nan.
Medida di seguridad: Por a nota cu tabatin medida di seguridad extra na edificio di Corte. E team special di KIA hunto cu e team di CEA di Corte a percura pa tur cos bay na orden.
Pa evita confrontacion entre famia, a laga famianan di e victima Ayden Cj Lanoy, sinta den e tribuna abao den sala di Corte mientras cu e famianan di e dos agentenan di Polis a sinta den e tribuna ariba. Por a nota cu hasta Comisario di Polis tabata presente y tabata sinta den e tribuna ariba. Por a ripara tambe cu e famia di e victima a bin cu flanel preto cu e potret di Ayden Lanoy y patras di e flanel ta skirbi: “Justice for my son Ayden Cj Lanoy”.
Hues a papia cu tur presente: Hues a bisa na tur presente cu e ta un caso hopi lamentable caminda a kita bida di un hoben di 19 aña. El a bisa cu el a mira riba facebook y sa kico ta biba den comunidad. El a sigura cu lo hiba un proceso husto.
Hues a sigui bisa cu mester haci investigacion cuidadoso pa asina Corte sa kico a sosode y e ora ey tuma un decision pa haci husticia riba kico sosode. Hues a pidi publico pa mantene nan emocionnan. El a bisa cu si un of mas persona no por wanta mas, por Sali pafor y bolbe ora ta trankil.
Acusacion: Fiscal a bisa cu M.V. y R.G.D. ta wordo acusa cu a tuma bida di Ayden Cj Lanoy riba 9 Februari 2025 door di intencionalmente a tira varios biaha cu nan arma di Polis riba Lanoy y su vehiculo.
E consecuencia ta cu Lanoy a fayece. Fiscal a sigui bisa cu subsidiario ta acusa M.V. y R.G.D. di intento mata y mas subsidiario, intento di herida severo. Hues a bisa cu Diahuebs el a reuni cu e mayornan di Lanoy, nan abogado, abogadonan di e sospechosonan y Fiscal, pa palabra kico ta bay sosode cu e caso.
Peticion pa investigacion: Landsrecherche a haci un investigacion extenso den e lamentable aki. Hues a mustra cu dia 24 October 2025 abogadonan mr. Carlo di R.G.D. y mr. Illes di M.V., a manda pidi Hues pa mas investigacion. Fiscal a reacciona y a bin acerca videonan y e sonidonan.
Abogado mr. Carlo a papia p’e y mr. Illes y cu tin dos video caminda e promer video e imagen y sonido no ta sincroniza pero e di dos video si. El a remarca cu pakico den e promer video caminda e audio y video no ta sincroniza, Landsrecherche a haci un resumen y esun di dos caminda si ta sincroniza, no a haci un resumen. El a pidi pa haci un resumen di tur dos cu ora y tur cos.
E otro peticion ta pa inclui e conclusionnan di NFI (Instituto Forense Hulanda) y imagennan. El a bisa Hues cu nan tambe ta busca un tercer partido for di Hulanda pa evalua tur esakinan. Si logra esaki lo informa Hues y Ministerio Publico na tempo. Ta expertonan na Hulanda cu a yega di haci investigacionnan asina.
Hues a splica cu a manda e videonan pa Instituto Forense Hulanda pasobra e videonan a wordo tuma e mesun momento pero e oranan ta varia. NFI a mustra cu e promer video ta sincroniza door cu ora scucha tiro, ta mira huma sali for di un arma. Hues a bisa cu riba video 1 a tira pero e auto no a core y video 2 ta mira cu a los promer tiro ora auto core.
Hues a mustra cu den e relato di Landsrecherche ta mustra cu e promer video ta mustra cu e tiro a cay ora e auto tabata reverse mientras cu video 2 ta mustra cu tiro a cay ora e auto tabata bay dilanti. Mr. Illes a remarca cu tin cosnan cu ta menciona den raport pero e no ta mira esey riba imagennan.
Peticion fiscal: Fiscal a bisa cu e mayornan a wordo invita pa bay Ministerio Publico hunto cu nan abogado mr. Hatzmann, pa mira e imagennan di e videonan cu ta shock bo. Fiscal a bisa cu Landsrecherche a haci investigacion. Ariba peticion di abogadonan di e sospechosonan, Landsrecherche a traha otro relato pa splica loke ta mira riba videonan y e sonidonan.
Fiscal ta haya cu e di dos peticion no ta realisabel pasobra ya caba a haci investigacion amplio di video y sonido. El a pidi Hues pa stipula un periodo pa abogadonan por tin e investigacion adicional cu nan kier haci y laga esaki bay serca Hues Comisario. Fiscal a pidi Hues pa laga Hues Comisario evalua e experto y nombr’e pa haci investigacion.
Rechaza peticionnan: Hues a dicidi cu ya tin un relato di NFI riba e investigacion, cu ta cumpli cu e promer peticion di abogadonan. E di dos peticion, Hues a bisa cu e imagenan y sonido tey riba e videonan. E informacionnan tey pero no ta relata den e procesverbaal. Hues a mustra cu Landsrecherche ta mustra cu e promer tiro riba video ta ora e auto tabata reverse y riba e otro video e promer tiro tabata ora cu e auto tabata bay dilanti.
Hues ta haya cu ta keda na e abogadonan pa mustra esey durante tratamento di e caso. El a rechaza e peticionnan di abogadonan. Pa loke ta punto di bista di Fiscal, Hues a rechaza esaki pasobra e ta haya cu e abogadonan tin derecho di busca nan mesun hende. Sinembargo e punto ta, e pregunta por surgi si e persona of personanan ta experto.
Famia tin derecho di papia: Hues a bisa cu ley penal a cambia caminda awor e mayornan di victima tin derecho di hiba palabra. Abogado mr. Hatzmann ta representa e mayornan y sra. Lopez cu ta un familiar. Hues a bisa cu e mayornan y sra. Lopez por hiba palabra den Corte.
Hues a bisa cu e kier planea con hopi tratamento di e caso lo dura. Fiscal a bisa cu e lo tuma 2 ora pa su rekisitorio. Abogadonan mr. Carlo y mr. Illes tambe ta 2 ora, abogado di famia mr. Hatzmann a bisa cu e lo tuma 1 ora. Hues a puntra si lo kier pasa videonan den Corte. Abogado di famia a bisa cu esey lo ta traumatisa e famia. Fiscal ta haya cu ta importante pa pasa e videonan y cu e mayornan a mira e videonan caba. Hues a bisa cu e ta calcula cu tratamento di e caso lo dura entre 2 y 3 dia.
Hues a fiha cu dia 20 Februari 2026 lo cuminsa tratamento di e caso. Dia 23 Februari 2026, Fiscal lo hiba rekisitorio y mayornan lo haci uso di nan derecho di papia. Dia 26 Februari 2023 lo caba cu tratamento di e caso y e dia ey Hues lo fiha un fecha pa sentencia.
