Deal di droga a bay robez
ORANJESTAD (AAN): Fiscal di Ministerio Publico, den su requisitorio a exigi 7 aña di prison pa e homber hoben C.H. di 18 aña, kende a tira riba un auto. Fiscal ta considera esaki un intento di mata.
Tratamento di e caso a tuma lugar recien, caminda abogado mr. Hernandez a bisa Hues cu C.H. a actua den defensa propio pasobra e chofer di e auto kier a horta placa di droga di C.H. Segun e abogado, ta ora cu C.H. a mira cu e homber a dirigi arma riba dje, el a pasa man pa su revolver y tira riba e auto, caminda e bala impacta un dama Hulandes cu tabata sinta den auto hunto cu e homber.
Den e articulo aki, DIARIO ta publica tratamento di e caso y den un otro articulo ta publica e defensa di abogado. E potret aki ta ora cu autoridadnan despues di e tiramento a bay dal un razzia na un cas na Dakota.
E acusacion di Fiscal contra C.H. ta cu e ta complice cu riba 19 Juni 2024, a purba mata un hende. Fiscal a bisa cu C.H. a tira riba un auto cu hende aden y un dama cu tabata sinta na banda di e chofer a resulta herida. Subsidiario Fiscal ta acusa C.H. di intento di causa herida severo y tambe posesion di arma di candela.
Deal di droga a bay robez: Hues a puntra C.H. kico a pasa riba 19 Juni 2024. C.H. a bisa Hues cu e tabata cu dos amigo. Uno di e amigonan tabata warda riba un hende cu “mester trece algo p’e”. Un di nan a bisa cu e ta bay cas.
E otro cu mester a trece cos pa e otro amigo, el a pidi pa hib’e cunucu pero el a tarda pa contesta. C.H. a subi den auto tog. Nan a bay den auto banda di e stadion na Dakota. Na dado momento e homber chofer den e auto a saca arma p’e y su amigo L. y a bisa cu aki no tin wega. El a bisa C.H. pa baha y a hinca man den G.H. su saco di carson y coy su placa.
E homber kier a subi auto pa bay, pero e amigo di C.H., esta L., a pone pia den porta pa stroba e homber drenta auto. E momento ey C.H. a coy su placa back y a core bay hunto cu su amigo. A resulta cu un deal di cumpramento di marihuana a bay robez.
Tiramento den dia cla: E homber a bay den su auto, sali for di pakinglot di e stadion y bay tras di C.H. cu tabata cana cu su amigo L. banda di e casnan banda di stadion. Segun C.H., e homber a baha e glas di auto y pone arma riba dje. E ora ey C.H. a coy su arma y tira.
Hues a puntra C.H. pakico e ta cana cu arma. Segun C.H. e ta us’e pa ora e ta traha na cunucu pa spanta esnan cu kier horta bestia for di cunucu.
Hues a bisa cu pa casualidad tabatin un patruya di e unidad di narcotica para banda di stadion y e agentenan a mira den un caya un homber a baha sin flanel for di un auto Toyota y dos otro cu flanel. Ta asina cu C.H. y L. tabatin flannel bisti. E agentenan di narcotica a mira cu e dos hombernan cu flanel a lucha cu esun lomba sunu y despues esun lomba sunu a subi e auto y core bay tras di C.H. y L. Segun C.H. ta el a core bay. Polis a mira e chofer den auto bay tras di C.H. y L. cu tabata na altura di un cas. Na dado momento Polis a scucha un tiro.
Tiro a herida dama den auto: E auto Toyota a core bay duro y C.H. y L. a core bay na pia. Hues a bisa cu den e auto tabatin un dama Hulandes sinta banda di e chofer y e bala cu C.H. a tira a impact’e. Hues a remarca cu C.H. a tuma e riesgo cu e por tira e dama mata.
C.H. a bisa cu el a tira riba e chofer y no a pensa cu e bala lo impacta e dama D. Hues a bisa cu e bala a kibra e weso di man di e dama D. y cu na hospital, e mester a worde opera di biaha. Ainda e dama D. ta recuperando.
Hues a bisa cu for di un camera di seguridad na un cas a mira imagennan net na e banda di chofer di e auto y no por mira nada cu e glas tabata baha. Hues a bisa cu straño ta cu ningun hende sa kende ta e chofer di e auto. C.H. e dia ey tabatin 2 mil Florin y e homber a kita esaki for di dje. Despues di e luchamento, C.H. a coy su placa for di e homber. Ta asina cu ora Polis a detene C.H., e no tabatin e arma cun’e. C.H. a bisa cu ora el a core bay, el a laga e arma cay.
Hues a mustra cu e dama D. cu a worde herida, a bisa Polis cu ta C.H. y L. a lucha cu e homber y ranca tas for di dje. Hues a mustra tambe cu e amigo di C.H., L. a bisa cu e homber a kita placa for di dje. L. tambe a bisa cu e no a mira cu e homber a saca arma for di e auto. C.H. a bisa Hues cu e homber a bisa nan cu pa regla e asunto aki, nan tur dos mester a sali for di auto y e homber a kita placa for di dje.
Despues di interogacion di Fiscal ta sali na cla cu un deal di marihuana a bira un hortamento. Segun C.H., ta L. kier a cumpra marihuana for di e homber y e homber kier a horta nan.
Ta asina cu C.H. ya tin 8 luna sera den KIA.
Fiscal a exigi 7 aña di prison: Fiscal a bin cu relato mas amplio di loke a socede riba e Diaranson ey di 19 Juni 2024 mas o menos 2’or di merdia, dos miembro di Team di Narcotica a mira con dos hoben cu flanel ta lucha cu un homber lomba sunu y despues nan a core bay. E homber lomba sunu a subi su auto y core nan tras. No mucho leu, a scucha tiro.
E oficialnan hudicial a mira con e dos hobennan tabata patras den auto y a sali. Fiscal a remarca cu esaki ta otro cu loke C.H. a declara. E agentenan a bisa cu nan a mira C.H. ta core cu un revolver den man.
Aki Fiscal a trece dilanti cu prueba, cu Security Camera video eybanda a demostra claramente cu ningun momento e bentana di e auto, en especial na parti di chauffeur, a baha. Fiscal a sigui bisa cu C.H. a tira riba e auto y herida e dama Hulandes D. na man.
C.H. a tira dirigi y esey a causa cu e dama D. a resulta herida. Fiscal ta considera esaki, cu C.H. a purba mata.
Na opinion di Fiscal, C.H. a tuma e riesgo cu un hende ta resulta herida door di a tira riba e auto. Esey a sosode tambe. Fiscal ta haya legalmente proba cu C.H. a purba mata e dama D. y un homber cu a keda desconoci. Fiscal ta haya cu den e caso aki no por papia cu C.H. a actua den defensa propio. Fiscal ta haya C.H. culpable di posecion di un revolver Caliber .38.
Fiscal a bisa cu e tiramento a sosode den cercania di scolnan. El a remarca, kico a sosode si e tiramento a sosode algun rato promer ora cu muchanan tabata sali for di scol pa bay cas. Fiscal ta haya cu pa posesion di arma di candela so ta 2 aña di prison. Door di a tira den direccion di hende tin castigo di 6 pa 8 aña. Den e caso aki ta trata di un hoben di 18 aña y ta promer biaha cu e ta cay den man di husticia. Di otro banda ta C.H. a dicidi di cana arma. Fiscal a exigi 7 aña di prison.
Hues a bisa cu e ta bay studia e caso y dia 14 Maart 2025 lo tin sentencia.
