Cuater testigo lo worde interoga den caso penal contra Besaril y Ling pa malversacion di placanan di Arubahuis

Fiscal a adverti cu lo cuminsa caso contra Besaril pa e paga bek 197 mil Florin

ORANJESTAD (AAN): Diaranson mainta den sala di Corte di Husticia di Aruba, a cuminsa cu e caso penal cu Ministerio Publico a cuminsa contra G. Besaril di 51 aña y G. Ling di 62 aña.  Besaril tabata e Minister Plenipotenciario di Aruba na Hulanda, mientras Ling tabata e director di Arubahuis.

   Diaranson no tabatin tratamento sino un “regie zitting”, esta cu Hues ta wak si abogadonan lo tin deseo di mas investigacion promer cu tratamento di e caso. Ta asina cu Hues ya a fiha cu dianan 16, 20 y 23 di Mei 2025, pa tratamento di e caso penal.  Besaril a worde representa pa Abogado mr. Canwood mientras cu Ling a worde representa pa Abogado mr. Illes.

   Acusacionnan: E acusacionnan cu Fiscal a presenta den Corte contra Beseral y Ling ta:

(*) Entre 16 April 2018 te 15 Maart 2022 na Aruba y Hulanda como Ministro Plenipotenciario, y director di Arubahuis, intencional a malversa mas di 14 Mil Florin di pago di recibo di Setar.

(*) Entre 20 November 2017 te 15 Maart 2022 na Aruba y Hulanda, intencional a malversa mas di 50 Mil Florin pa paga huur di cas.

(*) Entre November 2017 te 30 Juni 2022 na Aruba y Hulanda, intencional a malversa mas cu 20 mil Florin pa paga servicio cu tabatin.

(*) Entre 16 December 2020 te 3 di Februari 2021 na Aruba y Hulanda, intencional a malversa casi 4 mil Florin pa paga ticket y otro gastonan.

(*) Entre 20 November 2017 te 30 di Juni 2022 na Aruba y Hulanda intencional, a malversa 25 mil Florin pa paga restaurantnan, horeca, gas stations.

(*) A abusa di nan funcion pa paga gastonan priva.

   Demanda pa paga bek: Fiscal, despues di a lesa e acusacionnan, a bisa Hues cu lo bay cuminsa un otro caso penal caminda lo demanda pa Besaril paga bek na Aruba, mas cu 197 mil Florin.

   Regie zitting: Hues a bisa cu tabatin corespondencia entre e abogadonan y Fiscal. Ta asina cu na Hues Comisario a rechaza peticion di abogado mr. Canwood pa scucha testigonan. Hues a bisa cu awor lo bay mira kico tur e peticionnan ta y despues lo dicidi.

   Abogado a pidi pa scucha testigonan: mr. Canwood a haci peticion pa investigacionnan cu e kier. E abogado a mustra cu tin acusacionnan cu ta inhusto basa riba raportnan di CAD. Na opinion di mr. Canwood, CAD ta colga Besaril pa cosnan cu no ta toca Besaril. E abogado ta haya cu mester scucha testigonan pa haya sa kico tabata e maneho di placa tempo di Besaril y kico ta e cambionan.

   E abogado a remarca cu ta parce cu ta solamente Besaril mester worde colga y otronan no. E ta haya cu tin un tinte politico fuerte den e caso aki. mr. Canwood a menciona nomber di Paris cu tambe tabata haci cosnan cu tabata worde aproba pa Parlamento. Pero pa Besaril si no ta asina. Ta acusa Besaril di no a sigui proceduranan siendo cu Besaril tabata worde guia pa e personal na Arubahuis.

   E abogado a bisa Hues cu pesey e kier interoga e homber y e dama Giel, kendenan tabata encarga den varios di e acusacionnan. Tambe e abogado a pidi pa interoga e Minister Plenipotenciario actual mr. Ady Thijsen. E abogado a mustra cu mr. Thijsen tambe ta usando un propio cas di huur y no e cas cu Gobierno tin disponibel p’e. Segun abogado, mr. Thijsen a laga pone cosnan den cas. Eseynan ta mescos cu Besaril. Abogado a mustra cu semper e tabata asina y e personal a bisa Besaril cu e por haci asina, pero awor ta worde persigui Besaril pa malversacion.

   Hues a puntra pakico kier scucha señora Oduber (coordinador di presupuesto di Gobierno). Hues ta haya cu Oduber a duna declaracion amplio. mr. Canwood ta haya cu tin mas preguntanan cu e kier haci. El a bisa cu tabatin tardanza riba preguntanan cu Besaril a haci y na opinion di mr. Canwood, señora Oduber lo por duna splicacion.

   E abogado tambe a pidi pa scucha entre otro e chauffeur di Besaril y señora Larez. Tambe el a pidi pa scucha Derick Werleman, e presidente di Algemene Reken Kamer, Frederick Nuboer, Anthony Giel, Shila Giel, secretario di Conseho di Ministronan, señora Hoeverts y señora Koolman tambe. E abogado ta haya cu e testigonan lo por duna claridad den maneho y cu Besaril no a haci cosnan manera e ta worde acusa di dje.

   Fiscal ta reacciona: Fiscal a bisa cu loke ta haci fastioso di e peticionnan, ta kico ta worde nenga. Na opinion di Fiscal, Besaril a haci uso di su derecho di silencio y no tabata duna contestanan. Fiscal a puntra si Besaril ta desmenti di a malversa door cu no tabatin maneho. Tambe Fiscal kier sa si Bersaril ta bisa cu el a sigui e maneho cu otronan tabata haci.

   Na opinion di Fiscal, Oduber a bisa cu Besaril no mester a usa credit card di Arubahuis ora e ta viaha den exterior. Fiscal a bisa cu no ta acusa Besaril di a bay huur un cas sino cu a haci gastonan na e cas sin cu a pidi aprobacion pa esaki. Fiscal ta haya cu ta fastioso pa haci preguntanan riba maneho na e testigonan pasobra riba cual maneho lo bay puntra.

   Fiscal a bisa cu e ta haya cu Giel, señora Oduber, secretario di Conseho di Ministronan, a duna suficiente declaracion y no ta necesario pa mas investigacion.

   Hues a aproba 4 testigo: Hues a pospone e caso pa pensa un rato pa asina tuma un decision. Despues di un rato a sigui caminda Hues a bisa cu mester tin un proceso husto di investigacion den un caso penal, caminda acusadonan tin derecho di scucha testigonan.

   Hues a bisa cu e ta aproba pa scucha señora Oduber, señor Giel, señora Giel, secretario di Conseho Minister señora Koolman. Hues a bisa cu den e interogacionnan, no por puntra riba presupuesto pero si riba e asunto di credit card. Koolman lo por worde interoga riba viahenan di trabao di Besaril. No por bay haci preguntanan riba presupuesto. Hues ta haya cu esey no ta relevante.

   Hues a sigui bisa cu tampoco por haci pregunta riba e asunto di cas compara cu antes y awor. Pesey lo no bay scucha e otro testigonan.

   Abogado mr. Illes a bisa cu e ta uni na peticion di mr. Canwood pa scucha e testigonan. Tambe el a bisa cu e no por 16 Mei 2025 pasobra e ta den exterior y e dia ey e ta yega. Hues a bisa cu lo mantene e otro dianan. Hues a bisa cu e lo instrui Hues Comisario, pa interogacion. Hues a bisa cu no por fiha dia exacto pa tratamento pero ta mantene dianan 20 y 23 Mei 2025 y segun tratamento, lo mira cual ta e otro dia cu mester bin acerca.