ORANJESTAD (AAN): Dialuna mainta Hues a dicta sentencia den un caso grandi di droga caminda 6 persona ta envolvi.
Ta trata di un lote di marihuana y cocaina cu a haya na Grapefield dia 18 Juli 2024. E sospechosonan ta e Venezolanonan O.M.D. (40), J.A.N. ( 42), J.M.L. (30), I.C.A. (30), J.A.S. (31) y e Arubiano G.A.E. (51). Ta asina cu ta acusa J.A.N. di tabata envolvi den un otro importacion di droga dia 15 December 2023, caminda un lote grandi di droga a keda confisca.
BUSCA BULTONAN RIBA BEACH
Tratamento di e caso a tuma lugar luna pasa caminda Hues a mustra cu un team di Polis a haya autorizacion pa instala aparato pa scucha combersacionnan. For di e procesverbaal di Polis por compronde cu a scucha J.A.N. tabata papia cu J.M.L. di e droganan y cuanto cada un lo haya. Tur e otronan lo haya 3 mientras cu J.M.L. so lo haya 4.
J.M.L. tabata na e costa dia 18 Juli 2024 pa busca e bultonan pero no a haya nada. Su siguiente dia a bolbe bay pero cu mas hende pa busca e bultonan. Tur cos ta mustra cu J.M.L. tabata guia esnan cu tabata busca e bultonan. J.A.S. tambe tabata na beach pa busca e bultonan. Nan tabata papia di lo keda corona si e bultonan yega tera. I.C.A. tabata esun cu tabata core e Jeep. J.A.N. tabata duna instruccion na I.C.A. kico e mester haci. I.C.A. a hiba e hendenan costa anochi y busca nan 5’or di mainta. I.C.A. ta bisa cu e no sa di nada. O.M.D. y un otro persona tabata na beach pa busca e bultonan y nan a wordo deteni. Nan a wordo manda door di J.A.N.
Investigacion a mustra cu G.A.E. tabata esun cu a inverti 1200 dollar pa haya 6 liber di marihuana. Fiscal a bisa cu e no ta haya cu tin prueba cu realmente G.A.E. tabata deal den droga y pesey a pidi pa declar’e liber. Fiscal si ta haya cu G.A.E. tabatin 64 pilder di XTC y G.A.E. a admiti esaki.
CASO GRAPEFIELD
Investigacion a mustra cu dia 15 December 2023, J.A.N. a laga trece bultonan di marihuana y cocaina. E tabata coordina esaki. Un total di 12 bulto di droga a wordo haya scondi den matanan na Grapefield y 3 persona a keda deteni. Aki tambe a scucha combersacionnan di J.A.N. cu hendenan riba e droga cu a yega tera.
HINCAMENTO
Tin un acusacion contra e homber M.O.D. di intento di mata riba 18 Februari 2019. Esaki tabata un hincamento cu a sosode na The Oude Molen. Polis a haya e homber B. hinca benta abao. B. a bisa cu M.O.D. a hink’e den stoma. B. a keda interna den hospital pa basta tempo ya cu e hinca a perfora su tripa y un ader principal. Tin testigo a bisa cu a mira cu e koki di un lugar ey banda mes, M.O.D., a hinca B. Durante tratamento di e caso Fiscal a bisa cu riba video di seguridad no por identifica M.O.D. pero si ta mira un hende a bay riba B. y hinc’e cu cuchiu. M.O.D. tabata traha na e restaurant. Kico tabata e motibo cu M.O.D. a hinca B., no ta conoci. Ta asina cu no tin raport medico y no sa cuanto tempo a dura cu B. a cura. Fiscal ta haya M.O.D. culpabel di maltrato severo.
EXIGI CASTIGO
Fiscal a exigi pa tur dos caso contra O.M.D., 54 luna di prison, pa J.A.N. cu ta envolvi den dos importacion di droga, 8 aña di prison, pa J.M.L., 34 luna di prison, pa I.C.A., 30 luna di prison y pa J.A.S, 48 luna di prison. Pa G.A.E., Fiscal a exigi 4 luna di prison y pa lag’e liber. ,
SENTENCIA
E sentencia ayera tabata via video conference pasobra ainda tin e problema di tuberculosis na KIA. Hues a bisa cu dia 19 Juli 2024, Polis a haya 423 kilo di marihuana y casi 2 kilo di cocaina na Grapefield. El a bisa cu un team di Polis a haci investigacion amplio y a scucha combersacionnan cu aparato special. Hues ta haya cu e droga a wordo importa na Aruba. Hues ta haya cu J.A.N. ta esun cu a coordina y dirigi e importacion. J.M.L. tabatin contacto cu J.A.N. y tambe tabatin un funcion di coordina y dirigi esnan cu mester busca e droga. Hues a sigui bisa cu J.A.S. tabata envolvi den busca e droga na beach, I.C.A. tabata encarga cu busca Jeep y transporta e droga. O.M.D. tabata den e boto cu e droga y a yuda busca droga. G.A.E. tabata esun cu a financia e transportacion di e droga. Hues ta haya cu tur ta complice di importacion di droga.
Hues ta haya cu G.A.E. tambe tabatin pilder di XTC den su poder. Den caso di J.A.N., Hues a mustra cu tin tambe e caso di importacion di droga riba 15 December 2023, caminda a haya 260 kilo di cocaina y casi 240 kilo di marihuana. Hues ta haya cu J.A.N. tabata papia cu esnan di Colombia pa trece e droga Aruba.
DECLARA LIBER DI PURBA MATA
Pa loke ta e acusacion di intento mata contra O.M.D., Hues ta haya cu for di pruebanan por conclui cu riba 18 Februari 2019, e homber B. a wordo hinca cu cuchiu den bariga na The Oude Molen. E cuchiu a perfora tripa y un ader principal. Investigacion ta mustra cu B. a wordo hinca door di un persona cu tabata traha na Ranch Sport Bar como koki y ta sospecha cu ta O.M.D. Hues ta haya cu no tin prueba legal cu ta O.M.D. tabata traha como koki y a hinca e homber B. Hues a mustra cu e hendenan cu a duna declaracion, no a wordo confronta cu e potret di O.M.D., pa mira si ta reconoce. No tin ningun prueba legal cu ta O.M.D. Ademas O.M.D. a keda nenga. Hues ta duda cu ta O.M.D. ta culpabel y declar’e liber.
CASTIGO
Hues ta haya cu J.A.N. tabatin funcion di dirigi importacion di droga, J.M.L. tambe tabata dirigi esnan cu mester busca e droga, J.A.S., I.C.A. y O.M.D. tabata envolvi den e buscamento di droga. Hues ta haya cu G.A.E. tabata esun cu a financia.
Hues a condena J.A.N. na 7 aña di prizon, J.M.L. na 35 luna di prizon, J.A.S. y O.M.D. na 32 luna di prizon, I.CA. na 30 luna di prizon y G.A.E. na 24 luna di prizon.
