Nan a wordo manda bek prison na Bonaire
ORANJESTAD (AAN): Corte di Husticia a dedica un dia special pa trata e caso penal cu Ministerio Publico a cuminsa contra tres trahador na KIA, kendenan ta wordo sospecha di corupcion. Ta sospecha cu nan tabata hiba droga, cellular, vloei, cuminda, coy smaak entre otro den KIA pa presonan.
Tin varios caso caminda a condena trahadornan di KIA na castigo di prison pa a pasa droga, cellular, cuminda, etc., den KIA pa cierto presonan, E trahadornan di KIA a wordo cumpra o sea nan tabata haya placa pa hiba droga, cellular, etc. den KIA.
Dialuna mainta, Fiscal a baha pisa riba tres trahador di KIA cu ta wordo haya culpabel di corupcion.
TRAHADORNAN SERA NA BONAIRE
Ta asina cu e tres sospechosonan: J. Geerman, D. Maduro y G. Lares, despues di a pasa e proceso di interogacion, a wordo manda prison Bonaire, pendiente di e caso. Tabatin un caso pro forma cu a bay via video conference, caminda a palabra un fecha pa tratamento di e caso. Esaki a sosode dialuna caminda tur tres sospechoso a wordo treci Aruba, pa duna cuenta pa e acusacionnan cu Ministerio Publico tin contra nan.
UN SO NO A ADMITI
Ta asina cu den sala di Corte, famianan di e sospechosonan tabata presente. Fiscal a baha pisa riba e trio aki, mustrando cu a keda proba cu Geerman, Maduro y Lares tabata pasa droga, cellular y otro cosnan, entre otro, vloei pa huma, cuminda, coy smaak pa cierto presonan y nan tabata haya pago pa esaki. Ta asina cu Lares a desmenti di e acusacionnan, mientras cu Geerman y Maduro a admiti.
FISCAL A BAHA PISA
Fiscal a bisa Hues cu e ta haya e trio culpabel y ta haya cu mester exigi castigo pisa. Fiscal a exigi pa Lares 4 aña di prison y cu pa 5 aña e no por traha mas na KIA.
Fiscal a exigi pa Maduro, 4 aña y 6 luna di prison y tambe pa 5 aña, e no por traha mas na KIA.
Fiscal a exigi pa Geerman 5 aña di prison y tambe pa 5 aña e no por traha mas na KIA. Esey ta nifica cu automaticamente tur tres trahador di KIA, si Hues haya nan culpabel, lo perde nan trabao.
DEMANDA PA KITA PROPIEDAD
Ta asina cu Fiscal a anuncia cu tanto Maduro, Lares y Geerman por spera cu lo bay cuminsa un caso pa kita propiedadnan di nan, mirando tur e placa cu nan a haya pa tur e cosnan cu nan a pasa den KIA. Fiscal a haci e anuncio y a bisa cu lo cuminsa cu un investigacion profundo pa determina cuanto placa cada un di e sospechosonan a haya y asina exigi pa paga e placa aki bek of lo kita propiedadnan for di nan.
TRAHADORNAN HIBA BEK BONAIRE
Despues di a scucha e defensa di e abogadonan, Hues a sera tratamento di e caso y a bisa cu dia 9 September 2024 lo tin sentencia. Posiblemente e sentencia lo bay ta via video conference, caminda Maduro, Lares y Geerman lo ta na Bonaire y via screen lo mira Hues y scucha nan sentencia.
