ORANJESTAD (AAN): E homber agresor N.J. di 46 aña riba Diahuebs den sala di Corte a pidi e referee L.B.T.
y su famia disculpa pa a causa cu L.B.T. a perde un wowo. Ta asina cu Hues a condena N.J. na castigo combina esta trabao pa comunidad y castigo condicional cu tempo di prueba.
Den sala di Corte tabata presente familiar di e referee L.B.T. y familiar di N.J. Fiscal a bisa Hues cu e acusacion contra N.J. ta cu 30 September 2023, N.J. a causa maltrata severo riba L.B.T. riba veld di futbol. Ta asina cu N.J. a dal L.B.T. cu un boter di awa di plastic den su cara cu consecuencia cu L.B.T. a perde su bista na wowo robez.
Victima a perde bista na un wowo: E agresor N.J. kende ta coach di team di futbol di mucha, a admiti dilanti Hues cu el a dal L.B.T. cu un boter di plastic di awa. El a bisa cu el a coy e boter di plastic aki for di suela. Hues a mustra cu tin un testigo F. cu ta bisa cu e boter ta di stainless steel pero tin dos otro cu ta bisa cu e boter ta di plastic.
E problema tabata relaciona cu wega futbol caminda N.J., como entrenador di un team di mucha muher, a reclama referee L.B.T. cu como arbitro e no a huzga e wega bon. Esaki a causa confrontacion caminda N.J. a manda L.B.T. cu e boter. Den Corte N.J. a mustra Hues cu for di un distancia di 4 meter, a tira e boter di awa. Hues a puntra N.J. con e ta pensa awor di loke el a haci. N.J. a bisa cu e ta lamenta loke a pasa. El a bisa cu L.B.T. tabata bin riba dje cu mokete y el a hala atras y a tira e boter pasobra e tabata cu su yiu muher y tabata sinti su mes amenaza.
Segun N.J., el a djis papia cu L.B.T. y a bis’e cu e no kier tin problema. Pero e situacion a escala y L.B.T. a push’e dos biaha y kier a dal’e. Segun N.J., nunca el a pensa cu L.B.T. lo a sufri un herida asina serio.
Hues a mustra cu coach N.J. tin carchi castigo cu un caso di 2022 di maltrato pero e caso a wordo hala aden di parti di Ministerio Publico. Segun N.J. esey tabata un mal comprondemento, pasobra el a yama Polis pa un situacion y Polis a kere cu e ta e sospechoso.
Sospechoso ta sinti malo: N.J. a bisa Hues cu el a sufri hopi durante 11 dianan cu e tabata sera. El a bira depresivo. E hecho cu media a pint’e como un monster, a afecta su negoshi caminda el a perde hopi cliente. El a bisa cu su detencion tabata hopi inhumano. El a experencia con un otro preso banda di e cel cu e tabata sera aden, a mata su mes.
Demanda di victima: Hues a bisa cu e victima a haci demanda di daño. Abogado mr. Lopez a presenta e demanda di daño. E abogado a mustra cu L.B.T. mester a bay Colombia pa opera su wowo. E mester a busca hende pa cuida cas. Door di esaki, el a perde entrada di actua como referee. En total e abogado a menciona 50 mil Florin di daño. E abogado a bisa cu L.B.T. tin un wowo falso. El a keda hopi tempo interna den hospital na Colombia. Tambe e lo mester a haci operacion na un djiente door di e sla cu el a sufri.
Hues a puntra e abogado si tin documento cu ta mustra cu L.B.T. a sufri daño na djiente. Mr. Lopez a bisa Hues cu ta dificil pa L.B.T. haya tur e documentonan aki pasobra e tabata den hospital na Colombia.
Hues a bisa cu L.B.T. a duna declaracion na Polis cu ta mustra otro cu loke N.J. a declara.
Fiscal: Fiscal a bisa cu e ta haya legalmente proba cu N.J. a maltrata severo L.B.T. riba 30 September 2023. Door di e sla, L.B.T. a perde conocemento y a wordo hiba hospital. N.J. a admiti cu despues cu L.B.T. a papia palabranan malo cu ne, el a dal L.B.T. cu boter di awa di plastic. Tin raport medico cu ta mustra cu L.B.T. a sufri herida severo. Fiscal ta haya cu N.J. a tira cu forza e boter den cara di L.B.T. cu consecuencia cu L.B.T. a perde un wowo.
Pa cu e castigo, Fiscal a bisa cu e ta tene cuenta cu seriedad di e caso caminda cu L.B.T. a perde un wowo. Fiscal a bisa cu N.J. tabata coach di un team di futbol y ta haya cu N.J. mester a duna ehempel na e muchanan y no a actua di e forma aki. El a bisa cu ta di lamenta con cos a bay caminda muchanan a mira kico a sosode. Fiscal a bisa Hues cu e no tin e impresion cu N.J. lo bay haci algo asina atrobe. Fiscal a exigi 180 ora di trabao pa comunidad of 90 dia sera. Tambe Fiscal a exigi 30 dia di prison di cual 20 dia ta condicional cu 2 aña di prueba. Pa loke ta demanda di daño material, Fiscal ta haya cu falta mas informacion. Fiscal a bisa cu e ta haya cu mester declara e demanda no admisibel. Pa loke ta e demanda di daño inmaterial, Fiscal ta haya cu aki tambe falta mas informacion y ta fastioso pa determina un suma. E ta referi na decision di Hues pa e daño inmaterial.
Abogado: mr. Carlo a bisa Hues cu no por bisa cu N.J. tabatin intension di causa herida severo na L.B.T. El a splica cu e dia ey N.J. tabata coach diferente team di damas riba e torneo. E final di e torneo no a bay bon caminda tabatin partimento di carchi cora. N.J. no tabata di acuerdo con L.B.T. a actua como referee. El a bay papia cu L.B.T., kende a insulta N.J. dos biaha. Despues L.B.T. a bay riba N.J. y N.J., cu su yiu muher na banda, a tira e boter di plastic riba L.B.T. Despues el a bay cas y a haya yamada di telefoon cu L.B.T. a keda afecta na su wowo.
Abogado ta haya cu N.J. no tabata sa cu loke el a haci lo a causa cu L.B.T. a perde wowo. Tin testigonan a bisa cu L.B.T. a huzga wega malo y diferente hende a bay reclama L.B.T. E abogado a bisa Hues cu N.J. a bay papia trankil cu L.B.T., kende a insult’e y a tuma posecion pa bringa cu N.J. E abogado no ta haya cu N.J. su intension tabata pa causa daño na L.B.T. E abogado ta haya cu Hues mester declara N.J. liber di intencional a causa maltrato severo y pa duna castigo igual na loke N.J. tabata sera.
Pa loke ta e demanda di daño, mr. Carlo ta haya cu Hues mester rechaza esaki pasobra e ta haya cu mester declara N.J. liber. El a bisa cu e ta comparti punto di bista di Fiscal cu no a splica bon e demanda di daño material. Tambe mr. Carlo ta comparti opinion di Fiscal cu e demanda inmaterial tambe no ta hustifica. E abogado ta haya cu Hues mester declara e demandanan no admisibel.
Sospechoso a pidi disculpa: E agresor N.J. a pidi L.B.T. disculpa pa loke a pasa. El a bisa cu den media, el a wordo pinta como un monster. Despues di a sali for di prison, e no kier a duna cara na ningun hende. El a keda depresivo y tur dia e ta arepenti di loke el a haci. El a bisa Hues, cu e mester a haya tratamento di psycologo. El a pidi L.B.T. y su famia pordon di loke el a haci y a pidi Hues y L.B.T. pa dun’e un chens pa demostra cu e ta un bon persona y no manera den media a pint’e.
Sentencia: Hues a sera tratamento di e caso y a dicta sentencia di biaha. Hues ta haya cu a keda legalmente proba cu N.J. a dal L.B.T. den su wowo robez cu consecuencia cu L.B.T. a perde su wowo. Esaki ta wordo considera un maltrato severo. Hues no ta kere cu ta intencional N.J. a haci’e pero cu N.J. a tuma un riesgo door di dal L.B.T. cu e boter den cara. Pa cu castigo, Hues a tene cuenta kico N.J. a pasa aden.
Hues a condena N.J. na 30 dia di prison di cual 21 dia ta condicional. Esey ta nifica cu N.J. no mester bolbe bay sera. Tambe Hues a condena N.J. na trabao pa comunidad. Hues a cuestiona e hecho cu e incidente a sosode riba un veld di futbol dilanti cantidad di mucha. El a condena N.J. na 150 ora di trabao y si e no cumpli e lo mester bay 75 dia sera.
Pa loke ta e demanda daño material, Hues no ta haya cu esaki ta suficiente splica. El a declara e demanda no admisibel. Pa loke ta e demanda inmaterial, Hues a bisa cu e ta declara esaki pa un parti no admisibel. Hues a condena N.J. pa paga 6 mil florin como un adelanto di daño inmaterial. Esaki ta trece cun’e cu L.B.T. lo por cuminsa caso civil.
