ORANJESTAD (AAN): Hues di Corte di Husticia a dicta sentencia den e caso penal cu Ministerio Publico a cuminsa contra e hombernan J.B.C. y L.R.N. ,
kendenan ta wordo acusa di ta envolvi den un importacion di droga riba un boto riba 15 December 2023. Ta asina cu Hues a condena L.R.N. na 8 aña di prison y J.B.C. na 4 aña y 6 luna di prison.
500 KILO DI DROGA CONFISCA
Ta asina cu tur cos ta mustra cu Polis a logra detene L.R.N. y J.B.C. caminda a confisca 250 kilo di cocaine y marihuana. Segun e acusacion di Fiscal, ta sospecha L.R.N. ta activo pa basta tempo. A acusa L.R.N. cu entre Juli 2021 y Augustus 2023 lo ta complice den trecemento di droga den boto. J.B.C. tambe ta wordo acusa di a trece droga.
SENTENCIA
Hues a cuminsa cu L.R.N. caminda el a bisa cu e ta declara L.R.N. liber di e promer acusacion esta cu entre Juli 2021 y Augustus 2023 e lo ta envolvi den trecemento di droga. Hues a bisa cu e no ta haya cu tin suficiente prueba pa por considera L.R.N. complice di traficacion den e periodo aki y pesey ta declar’e liber.
Hues a sigui bisa cu pa e acusacion di importa droga, si tin suficiente prueba. Hues a mustra cu tin yamadanan scucha caminda L.R.N. ta papia tocante trecemento di droga y hasta a inverti den droga. Aki Hues ta haya cu L.R.N. ta complice di importacion di droga. Hues a mustra tambe cu na e cas unda L.R.N. tabata keda hunto cu J.B.C., a haya cantidad di droga. Hues a mustra cu L.R.N. a admiti cu e tabatin droga den e cas.
8 AÑA DI PRISON
Pa cu e castigo, Hues a bisa cu e ta tene cuenta cu negoshi di droga ta crea hopi criminalidad y tristeza den famia. Hues a condena L.R.N. na 8 aña di prison kitando e tempo cu e ta sera den KIA. Hues a ordena pa destrui e droganan confisca, mientras cu e auto y cellular di L.R.N. lo keda confisca.
4 AÑA Y MEY DI PRISON
Pa J.B.C., Hues a bisa cu e ta declar’e liber di e acusacion di ta envolvi den trecemento di droga. Hues a bisa cu e ta haya cu J.B.L. tabata sa kico lo bay pasa cu droga pero no a participa.
Hues ta haya J.B.L. culpabel di posesion y bendemento di droga na e cas, caminda a haya un lote di marihuana y cocaine. Hues ta haya cu J.B.L. a haci negoshi cu droga y cu J.B.L. a admiti di a haci negoshi cu droga. Pa cu e castigo, Hues a mustra cu droga ta crea criminalidad y tristeza den famia.
Hues a condena J.B.L. na 4 aña y 6 luna di prison, kitando e tempo cu e ta sera den KIA.
