ORANJESTAD (AAN): E homber Venezolano J.I. (54) biba na Aruba, su yiu homber G.I. (29), e señora di J.I., G.M.( 58),
e homber Colombiano G.G. (44) biba na Aruba, ayera mainta a scucha Fiscal exigi 58 luna di prizon pa G.G. y 53 luna di prizon pa J.I., G.M. y G.I.
Fiscal ta acusa e grupo aki cu riba 25 Juli 2024 hunto, a exporta un lote di 27.724 gram di cocaina. Fiscal ta haya cu G.M., G.G. y J.I. lo ta envolvi den preparacion. G.I. tabatin droga den su poder.
TRAFICA DROGA PA HULANDA
Tratamento di e caso aki a dura di mainta te den oranan di merdia, caminda Hues a haci un cantidad di pregunta na tur e sospechosonan. Hues a mustra cu dia 1 Augustus 2024, Douane durante control di un container cu mester a bay Hulanda, a descubri un lote di droga den un motor grandi. E cacho anti droga a reacciona y a bin haya pakinan di cocaina scondi den e motor. En total e droga a pisa 27.724 gram.
MEDIADOR PA PAGA DEBE DI DROGA
Ta sospecha cu G.G. ta envolvi den esaki. Hues a mustra cu G.G. no a duna declaracion na Polis. Hues a puntr’e si e ta keda sin papia of awor e kier papia? G.G. a bisa Hues cu awor e ta papia. Segun G.G. e tabata mediador entre un Hulandes, Colombianonan y J.I. Segun G.G., el a dicidi di ta mediador pa asina paga e debe di 45 mil dollar di droga cu e tin. El a sigui instruccion di e Colombianonan pa percura cu e motor grandi lo hiba e droga. Segun G.G., door cu e ta conoci pa husticia e no por laga transporta e droga. Nan a dun’e nomber di J.I. pa e ta encarga cu e droga. Segun G.G., e no a mira nunca e motor y tampoco e droga. E mester a percura pa tur cos bay bon. E motor a bin for di Hulanda, 20 Juni 2024 pa despues wordo exporta. Hues a puntra G.G. pa nomber di esnan di Colombia, G.G. a bisa Hues cu pa motibo di su seguridad, no kier menciona nomber.
DROGA DEN MOTOR
Hues a mustra cu J.I. a bisa cu G.G. a yam’e for di Hulanda cu e mester a busca un motor di coriente. Segun J.I., G.G. a cumpra e motor na Hulanda pa manda Aruba y J.I. lo mester drecha e motor. J.I. a bisa Hues cu el a paga pa e importacion di e motor y a hib’e pa G.G. Despues G.G. a yam’e y bisa cu e motor no ta sirbi pasobra e ta voltage 440 Volt cu ta mucho halto. Lo mester manda e motor bek Hulanda.
Hues a mustra cu J.I. a puntra G.G. si e motor ta carga cu droga y cu mester percura cu no tin droga. J.I. a bisa Hues cu e tabata sospecha, pasobra cu a dicidi di manda e motor bek asina liher. J.I. a sigui bisa cu el a kere palabra di G.G. cu den e motor no tabatin nada y pa manda e motor Douane pa e wordo exporta bek. Segun J.I., e tabata bou menaza. Hues a puntra G.G. con e droganan a wordo hinca den e motor. El a bisa cu ta e Hulandesnan a haci’e. El a bisa cu el a compronde cu ta 20 kilo a wordo hinca. El a haya 20 mil florin y 30 mil florin. El a bisa cu pa e Colombianonan ta mey miyon dollar nan a perde cu e droga no a bay Hulanda. El a bisa cu un homber, un tal U., tabata esun encarga cu e Colombianonan.
MENAZA A CAY
Hues a mustra cu via mensahenan di cellular cu Polis a haya, por a compronde cu na dado momento e Colombianonan a rabia y tabata menaza. G.G. a bisa nan cu e tambe ta arma. El a bisa Hues cu el a bisa asina pa mustra nan cu nan no por presion’e.
Hues a mustra cu investigacion ta mustra cu e compania ta riba nomber di G.I. G.I. a bisa Hues cu e compania ta riba su nomber pero e no ta haci nada cu e compania y cu ta su tata J.I. ta maneha e compania. Segun G.I., e compania tin 9 aña andando y nunca tabatin problema. Awor cu J.I. a bay deal cu G.G., a bin problema. Por a nota cu G.I. ta rabia. El a bisa Hues cu e ta cera inhusto pa algo cu e no tin nada di haci cu ne. Hues a bisa cu e motor a bin riba nomber di G.I. pero G.I. a nenga. Hues a mustra cu tin hende a mira cu G.I. tabata hunto cu su tata ora J.I. a haya e motor. El a bisa cu su tata J.I. a busk’e den Playa cu e pick up pero e no tin nada di haci cu e caso aki. Hues a mustra tambe cu e motor, den cual a haya droga, tabata riba nomber di G.I.
Hues a bisa e dama G.M., señora di J.I y mama di G.I., cu tabatin combersacion entre G.M., G.G. y J.I. tocante e importacion di e motor. E tabata haya instruccion kico pa haci. E tabata manda mail. Segun G.M., e no a mira e motor y mucho menos sa cu tin droga. El a bisa Hues cu el a confia den G.G. cu lo tabatin un negoshi andando pero awor ta resulta cu tin droga scondi den e motor. El a bisa cu el a mira papelnan tocante e motor pero no sa nada mas. Hues a puntra G.M. cu e no a haya straño cu e ta haya instruccion cu e mester bisa cu e motor ta pa J.I. El a bisa cu e tabata yuda su casa J.I. den e negoshi y tabata haci loke J.I. bis’e pa haci.
Ariba pregunta di Hues, J.I. a splica cu el a busca e motor cu tabata den un caha di palo. E no a mira e motor. El a hiba e motor na su compania y G.G. a bay busca e motor.
J.I. a pidi Hues pa laga su famia for di e asunto aki. El a bisa Hues cu ta G.G. a pidi’e pa e motor y cu e ta responsabel.
SINTANDO CASTIGO Y AWOR OTRO CASO
Hues a mustra cu G.G. tin un carchi di castigo. Na Februari 2025, G.G. a wordo condena na 30 luna di prizon pa un caso di 700 gram di cocaina den post cu mester a bay Hulanda entre April y Juni 2024. Corte di Husticia a considera G.G. como esun encarga cu e traficacion y cu e no a coopera cu e investigacion.
Relaciona cu e caso actual, ta asina cu famia J.I., G.I. y dama G.M. tin mas o menos 11 luna encarcela.
FISCAL
Fiscal a bisa Hues cu durante control di Douane riba 1 Augustus 2024, a haya 27.724 gram di cocaina scondi den un motor di coriente cu mester bay Hulanda. Riba documentonan ta mustra cu ta e compania di J.I. ta encarga cu a ricibi. Tin potret di camera caminda ta mira J.I. y su G.I. den pick up a bay busca e motor. E dama G.M. tabata manda mail. E compania tabata riba nomber di e yiu G.I. Dia 26 Augustus 2024 a detene nan y nan ta bisa cu nan no sa nada di droga den motor. Fiscal a bisa cu e no ta kere e declaracionnan aki. Na opinion di Fiscal, investigacion a mustra cu G.G. ta esun cu tabata duna instruccionnan. Fiscal ta haya cu G.G. ta e organizador y tabatin mester di e compania di J.I., G.I. y e dama G.M.
Na Aruba J.I. a paga impuesto pa e motor. J.I. y G.M. a traha e papelnan pa e motor bay bek Hulanda. Nan a cumpra hopi refresco y papa pa manda Hulanda. Supuestamente pa cuminsa cu un negoshi di abastece tiendanan di refresco y papa. Na opinion di Fiscal, e placa aki lo ta di G.G. Polis a haya e recibonan den cellular den G.G. Esaki ta un forma di sconde e droga y a pone e adress unda tur cos mester bay, di un amiga di G.M.
CASTIGO
Fiscal ta haya legalmente proba exportacion di droga. Ta trata di un cargamento grandi di cocaina. Fiscal ta haya cu G.G. a mal usa compania di J.I. pa exporta cocaina pa Hulanda. Fiscal a exigi pa G.G. 58 luna di prizon, pa J.I., G.I. y G.M., 53 luna di prizon. E cellular di J.I. y documentonan relaciona cu e motor, e pick up mester keda confisca. E cellular di G.I. por wordo debolbe. E droganan si lo keda confisca. E cellular di G.M. mester keda confisca.
Por a ripara cu J.I. no a keda nada contento cu e exigencia di Fiscal. E tabata hopi tristo y a pidi Hues pa laga su señora y su yiu homber liber ya cu nan no tin nada di haci cu e caso aki.
ABOGADO
Mr. J.Tromp a bisa Hues cu Ministerio Publico por a trata e dos casonan penal di G.G. hunto. El a remarca cu si conta e 30 luna cu G.G. ta sintando cu e 58 luna, ta bira 88 luna di prizon. E abogado a enfatisa cu esaki ta exagera y rediculo. Na opinion di e abogado, door cu G.G. a wordo menaza, e no a papia nada na Polis. Den Corte, G.G. a dicidi di papia. Hues a remarca cu serca dje, si keda keto, esey lo no ta causa cu lo subi castigo. Keda sin papia ta un acusado su derecho y mester respeta esey. Abogado ta haya cu G.G. no tabata esun cu tabata guia. G.G. tabata esun cu a wordo acerca door di Hulandesnan y Colombianonan cu e debe placa di droga. E abogado ta haya cu tur hende tabata sa nan funcion. El a bisa cu no ta G.G. a paga pa e motor bin Aruba sino J.I., kende lo haya su placa bek. E abogado ta haya cu tur hende mester haya e mesun trato. G.G. kier haya castigo husto y no 88 luna en total. E abogado ta haya cu husto lo ta si castiga 12 luna of algo mas. E abogado a mustra Hues riba un sentencia den un caso di 100 kilo, caminda e cabezante a wordo condena na 4 aña di prizon.
Mr. Mohamed a bisa Hues cu aki ta trata di un famia cu a wordo uza. E mas cu 27 kilo di cocaina tabata scondi den e motor di coriente. Investigacion a mustra cu ta G.G. tabata envolvi y a regla e transporte di droga. E abogado a sigui bisa cu e pregunta ta si e famia J.I., G.I. y G.M. tabata sa cu tin droga den e motor. El a bisa Hues cu e compania ta riba nomber di G.I. pero e no ta haci nada. Ta e tata J.I. tabata haci tur cos. G.I. tabata sa cu mester manda un motor bek Hulanda. J.I. a pidi G.I. si e kier bay hiba e motor. E abogado a bisa Hues cu G.I. no tin nada di haci cu e importacion di e motor. J.I. y G.M. tabata envolvi den esaki y cellularnan ta papia pa nan mes. G.I. no tabatin ningun combersacion riba esaki riba WhatsApp y tampoco cu G.G. E abogado ta haya cu mester declara G.I. liber di e droga den motor. El a bisa cu G.I. a admiti di tabatin droga cu ne. E abogado a pidi Hues pa laga G.I. liber en espera di decision di Hues riba e caso.
Pa loke ta e motor, J.I. y G.M. tabata coresponde cu G.G. Ta asina cu J.I. y G.M. no tabata sa cu tin droga den e motor cu mester a wordo manda bek. E abogado ta haya cu J.I. y G.M. a wordo usa door di G.G. Abogado a mustra cu ningun caminda ta wordo papia si J.I. y G.M. lo haya pago. Polis a haya den cellular di G.G. combersacion cu e e homber U. tocante e motor. Ningun caminda por mira cu J.I y G.M. a papia cu U. Tambe tin otro combersacion entre G.G. y un dama tocante e motor. No tin ningun prueba cu J.I. y G.M. tabata sa cu tin droga scondi den e motor. E abogado ta haya cu mester declara J.I. y G.M. liber.
Hues a cera tratamento di e caso y a bisa cu dia 11 Augustus 2025 pa 9’or di mainta lo tin sentencia. El a bisa cu e lo bay evalua e peticion di abogado pa laga G.I. liber y lo laga sa.
