ORANJESTAD (AAN): Diabierna mainta e homber J.M.Z. di 25 aña a presenta den Corte pa scucha decision di Hues.
Hues ta haya J.M.Z. culpabel y bisa cu e ta haya e castigo exigi pa Fiscal mucho abao y a subi e castigo pa J.M.Z.
Homber ta muri cu bolitanan den stoma: Dia 27 Juni 2025, tratamento di e caso a tuma lugar caminda e hombernan J.M.Z. y G.E.T. di 40 aña a presenta den Corte. Nan ta wordo sospecha cu dia 26 di December 2024 a laga e defunto Terence D’Aguiar guli cantidad di bolitanan di cocaina na Colombia y bin Aruba, caminda 2 bolita a kibra y causa cu D’Aguiar a fayece. Investigacion a mustra cu D’Aguiar a guli 42 bolita cu a pisa 504 gram. A constata cu e bolitanan tabata mal traha y pesey 2 a kibra.
Promer cu tratamento di e caso, Hues a bisa cu abogado di G.E.T., mr. D.Croes, a notifica cu e no por ta presente pa defende su cliente G.E.T. y a pidi pa pospone e caso. E caso di G.E.T. a keda pospone pa October 2025.
Fiscal acusa J.M.Z. cu entre 24 – 26 December 2024 hunto cu otro of so, a importa cocaina na Aruba y of Colombia.
Hues a bisa cu segun Polis, 26 December 2024 a tende cu un hende a guli bolitanan y a bin for di Colombia. Ta asina cu ta D’Aguiar cu a fayece.
Fiscal ta kere cu J.M.Z. lo a wordo presiona door di G.E.T. Fiscal a mustra cu 27 December 2025 e pareha di J.M.Z. a declara cu J.M.Z. a bis’e cu e mester bay Colombia pa controla cu D’Aguiar ta guli bolitanan. E pareha di D’Aguiar a bisa cu G.E.T. a bisa cu J.M.Z a bay cu D’Aguiar pa percura cu D’Aguiar ta guli bolitanan y bin Aruba. Fiscal ta haya cu tin suficiente prueba cu J.M.Z. a yuda den traficacion di 504 gram di cocaina.
Fiscal a bisa cu pa cu e castigo, e ta tene cuante cu na 2022, J.M.Z. a wordo condena pa droga y awor atrobe. Fiscal ta haya cu J.M.Z. tabata intermediador pa percura cu D’Aguiar ta guli e bolitanan. Fiscal a exigi 18 luna di prison.
Sentencia: Hues a bisa cu e caso aki ta excepcional pasobra D’Aguiar a fayece cu bolitanan den su stoma. Hues a bisa cu el a evalua declaracion di e testigonan y J.M.Z. mes. Hues a rechaza defensa di abogado mr. Odor, kende a bisa Hues pa mira video, con e interogacion a tuma lugar pasobra e ta haya cu Polis a pone cosnan cu no ta cuadra.
Hues ta haya cu a base di e declaracionnan di e testigonan, por conclui cu J.M.Z. riba orden di G.E.T., a bay Colombia pa percura cu D’Aguiar ta guli bolitanan y bin Aruba.
Pa cu e castigo, Hues a bisa cu e ta tene cuenta cu J.M.Z. ta complice di importacion di cocaina y a percura cu D’Aguiar a guli bolitanan. Na opinion di Hues, e gulimento di bolita ta sumamente peligroso y riscante. 2 bolita a kibra den stoma di D’Aguiar y door di esey el a muri. Hues ta haya cu pa interes pa placa, J.M.Z. a dicidi di hacie. Na opinion di Hues, durante tratamento di e caso, J.M.Z. no a tuma responsabilidad den e caso aki.
Hues a subi castigo: Hues a sigui bisa cu e ta tene cuenta tambe cu recien, J.M.Z. tabata condena pa droga y esey no a pone cu J.M.Z. a stop sino a sigui. Hues ta haya e 18 luna di prizon cu exigi a Fiscal ta abao. Hues ta haya cu tin motibo di peso pa subi e castigo. Hues a condena J.M.Z. na 24 luna di prizon. E potretnan aki ta di archivo.
