ORANJESTAD (AAN): Despues cu Hues di Corte den Promer Instancia a rechaza e demanda di Mike de Meza contra Ministerio Publico,
e abogado mr. D. Croes hunto cu e hurista mr. Duijneveld a apela e decision aki y Corte Superior ta atende e caso Diamars 29 Juli 2025.
Apela decision di Corte: Dia 17 di Juli 2025, Hues di Corte den Promer Instancia a trata e caso cu Mike de Meza a cuminsa contra Ministerio Publico, caminda mr. Croes hunto cu Duijneveld a exigi pa Hues ordena Ministerio Publico, a base di articulo 43 di Codico di Procedimento Penal, pa duna Mike de Meza mas informacion tocante e tipo y e motibo di e acusacionnan contra dje.
Ademas mr. Croes y Duijneveld a exigi pa Ministerio Publico tuma un decision si tin persecusion penal promer cu 15 Augustus 2025.
Tratamento di e caso tabata cu portanan sera. Den oranan di merdia tabata conoci cu Hues a rechaza e peticionnan.
Hof ta trata apelacion: Ta asina cu e mesun dia di e sentencia, mr. Croes a anuncia cu ta apela y siman pasa Hof di Corte Superior a stipula cu Diamars 29 Juli 2025 pa 2’or di merdia, lo trata e apelacion.
E tratamento di e apelacion lo ta cu portanan sera, esta cu prensa no por cubri esaki. Por a compronde cu ta via video conference e tratamento lo tuma lugar. E tres Huesnan cu ta forma Hof lo ta den Corte di Husticia na Curacao y via pantaya grandi den sala di Corte di Husticia di Aruba, lo trata e apelacion. Posiblemente e mesun dia lo tin un decision.
