Entre 4 y 7 aña di prison a worde exigi
ORANJESTAD (AAN): Diahuebs mainta Fiscal di Ministerio Publico a baha pisa riba un trio cu nan ta haya culpabel di importacion di casi 700 kilo di droga. E trio Venezolano ta consisti di e homber W.A. di 33 aña, su pareha, e muhe M.F. y e homber V.L. di 31 aña, kendenan ta worde acusa cu riba e anochi di 25 pa 26 di Augustus 2024, conhuntamente cu otronan a importa casi 700 kilo di droga.
Intercepta boto carga cu hopi droga: Hues a mustra cu Wardacosta di Caribe Hulandes a notifica autoridadnan di Aruba cu nan a haya informacion cu un trio di Venezuela ta organizando diferente importacion di lotenan grandi di droga pa Aruba. Polis a dicidi di tap e cellularnan di e homber W.A., su pareha M.F. y e homber V.L. A hasta instala aparato special den nan auto pa scucha combersacionnan.
Di e forma aki, Polis a scucha riba 19 Maart 2024, cu lo tin un cargamento di droga ta bin Aruba y cu lo ta destina pa Chino cu ta W.A. Riba e anochi di 18 pa 19 Maart 2024 a purba importa droga pero door cu tabatin vigilancia di Wardacosta, e boto a bolbe Venezuela. E mesun cos a sosode 21 di Maart 2024. Despues a purba diferente biaha na Augustus 2024.
Dia 25 Augustus 2024 pa 11’or di anochi, Wardacosta a detecta riba radar un boto for di Venezuela ta biniendo Aruba. Di biaha e avion Dash-8 di Wardacosta a lanta vuelo pa investiga y e tripulacion di avion a mira con bultonan di droga tabata worde benta den laman.
Di biaha Wardacosta a manda dos boto di intercepcion rapido, esta Metal Shark, y rapidamente a intercepta e boto. Pero nan a trata di huy, y Wardacosta a sigui nan tras. Durante maniobranan aki, e boto a bolter, y Wardacosta a yuda saca e 5 persona for di lama. No por a rescata e boto pa sak’e di awa, ni pa lastr’e pa tera. Pues e boto a sink. Pero si nan a ‘pisca’ un cantidad di bulto riba laman y tambe a haya den e boto. En total 22 bulto a keda confisca. Investigacion a mustra cu den e bultonan tabatin marihuana y cocaina. A confisca 629 kilo di marihuana y 63 kilo di cocaina.
For di e combersacionnan cu Polis tabata scucha, a sospecha cu e trio W.A., M.F. y V.L. ta envolvi.
Hues a puntra W.A. si e tabata envolvi. Segun W.A. e no tin nada di haci cu e caso aki. El a bisa Hues cu e tabata sa cu famianan di dje cu ta ilegal, tabata bini Aruba. Hues a mustra cu Polis a scucha combersacionnan caminda W.A. tabata bisa pa ki ora asina nan lo mester yega. Tabatin palabra na unda na un cas na Calbas pa busca esnan ilegal. Hues a mustra cu ora Polis a yega, e cellular tabata completamente kibra pa no por saca informacion.
Instala GPS Tracker: Hues a puntra e muhe M.F. si e tabata envolvi. El a bisa cu e “no sa di nada”. Hues a mustra cu M.F. lo a papia tambe. Segun M.F., el a yuda W.A., door di contesta yamadanan y informa W.A. Esaki pasobra W.A. su cellular su bateria a baha. El a bisa cu W.A. no a bisa nada cu tin famianan ta bini y no sa cu un tio di W.A. tabata biniendo cu un boto. Segun M.F., el a puntra W.A. kico tabata pasando pero W.A. no kier a bis’e nada.
Hues a puntra V.L. si e tabata envolvi. Segun V.L., e no sa nada di droga. E unico cos cu e sa cu W.A. a pidi’e pa yuda cu su familiarnan cu lo bin y pa para cla pa busca nan. Segun V.L., e familiarnan ningun momento a yega y el a bay back cas. Ta asina cu Polis a pone na forma secreto un GPS Tracker na e Nissan March pa sa unda V.L. tabata 24 ora pa dia. E movimentonan di e auto tabata mustra cu V.L. tabata vigila si tabata sigur cu e boto por yega. No obstante tur e pruebanan, V.L. a desmenti esey.
Fiscal a splica cu e 5 personanan abordo di e boto a worde condena entre 4 y 5 aña di prison pa importacion di cocaina y marihuana. Fiscal a haci e trio un cantidad di preguntanan di yamadanan caminda ta sospecha cu nan tabata papia di boto cu mester yega Aruba riba diferente fecha. Tambe cu tabata papia cu lo tin boto Hulandes y avion ta bulando ta controla. Fiscal tambe mustra cu na dado momento V.L. lo a bisa cu mester mata e saponan (hendenan cu ta reda) pasobra cada vez e boto cu mester yega, mester bay back. V.L. a bisa cu ningun momento el a bisa asina. Fiscal a remarca cu Polis a reconoce V.L. su stem.
Otro importacion di lote grandi di droga: Hues a mustra cu ta sospecha W.A. ta tabata envolvi den importacion di casi 700 kilo di droga riba 9 Juli 2024. W.A. a desmenti esey. Hues a mustra cu Wardacosta a mira boto ta navegando y Polis a bay na e beach, caminda a haya bultonan di droga. Riba e boto a haya un cellular di satellite. Tambe den mondi a haya un otro cellular di satellite. E total di droga confisca tabata 7 kilo di cocaina y 600 kilo di marihuana. Den vecindario di e beach, Polis a detene 4 persona. Algun di nan ya a worde condena, mientras cu tin dos cu falta ainda pa nan caso bin dilanti.
Segun W.A., e tabata pendiente pa busca un omo cu lo a yega. Hues a mustra cu Polis tabata scucha yamadanan di W.A. For di combersacionnan a haya sa cu e droga ta yega 9 Juli 2024 y cu ta W.A. tabata organiza esaki. Pero segun W.A., su funcion tabata pa busca ilegal. El a bisa cu e no tin placa y no tin auto grandi pa busca e lote di droga. El a bisa cu pa cada hende cu e busca, e tabata cobra 500 dollar. Di e forma aki, e tabata haya placa pa mantene su mes y su famia. El a bisa cu nan tabata yam’e pa mira su costa ta liber. E tabata bisa nan si tabatin Wardacosta riba lama of avion bulando.
Fiscal a baha pisa: Fiscal a bisa cu e caso a cuminsa na Maart 2024, ora cu Polis a haya informacion cu ta organizando importacion di droga for di Venezuela. 26 Augustus 2024 a intercepta un boto cu 22 bulto. Cinco persona riba e boto a keda deteni, y a confisca un lote di 63 kilo di cocaina y 629 kilo di marihuana.
Segun Fiscal, tin indicacion cu na Maart 2024 a purba importa diferente biaha pero no a logra. Polis a ripara cu W.A. tabatin hopi combersacion riba e dianan ey. Polis tabata scucha tur cos. Mesun cos a sosode na Augustus 2024. Tabatin diferente intento na Augustus 2024 pa boto trece lote droga. Varios biaha e boto a bira bay back pasobra a mira avion of barco Hulandes. Fiscal a bisa cu Polis tabata scucha tur combersacionnan di W.A. y asina tabata sa di tur e biahanan cu a purba importa droga.
Fiscal ta haya cu V.L. hasta a expresa cu mester mata tur esnan cu ta papia y a causa cu cada vez e boto mester bay back.
Fiscal ta considera W.A. e organizador mientras cu V.L. tabata ehecuta. Pa loke ta e dama M.F., Fiscal a mustra cu M.F. tabata blo bisa cu e no sa di nada pero e mes tabata papia cu e capitan di e boto y tabata bisa con e situacion na Aruba tabata pa asina e importacion por tuma lugar.
El a mustra cu dia 9 Juli 2024 otro importacion a sosode. A confisca 693 kilo marihuana y 7 kilo di cocaina.
Fiscal ta haya cu e trio aki ta complice di importacion di cocaina y marihuana. Fiscal a exigi pa W.A. 7 aña di prison, pa V.L. 5 aña di prison y pa M.F. 4 aña di prison. Ta asina cu M.F. a cuminsa yora ora el a tende e exigencia di Fiscal.
Abogado: Abogado mr. Canwood di W.A. a bisa Hues cu apesar di e dos acusacion, no tin prueba cu W.A. ta envolvi den importacion di casi 700 kilo di droga den tur dos situacion. W.A. a desmenti di ta envolvi den droga y cu e ta bay busca famianan ilegal. Na opinion di mr. Canwood, W.A. tabata mas concentra cu trecemento di ilegalnan. Asina el a pidi V.L. pa yuda e famianan. E tabata indica e capitan unda ta e mihor caminda pa trece e ilegalnan pa evita cu tin hogamento.
Segun mr. Canwood, e combersacionnan tabata mas dirigi pa e trecemento di ilegalnan. Tambe tin combersacion caminda tabata papia di rescata e muchanan. E abogado a bisa Hues cu aki ta referi na e ilegalnan. E abogado a mustra cu tin varios combersacionnan riba esaki y hasta tin fayo den traduccion di Spaño pa Hulandes caminda ta crea e impresion cu lo ta droganan a worde benta den laman siendo cu ta hendenan ilegal cu a baha for di e boto. E abogado a bisa cu si e boto tabatin droganan, esey no ta pa cuenta di W.A. E abogado ta haya cu aki no por papia di complice di importacion di droga pasobra no tabatin cooperacion y planeamento.
E abogado a remarca cu e pareha M.F. tabata haci favor y V.L. tabata yuda. Na opinion di abogado mr. Canwood, no tabatin indicacion di droga. El a bisa cu no tin ningun caminda cu e sospechoso a papia di cantidad di droga y no tin nada di cu na e cas di W.A. tin hendenan ta bay busca droga y no a haya cantidad grandi di droga na e cas. No a haya cantidad grandi di placa na e cas. No tin potretnan den e cellularnan di cantidad di droga cu lo ta yega. E abogado a bisa Hues cu e Jeep cu W.A. a huur, tabata bay na e lugar pa busca e ilegalnan y e Jeep no ta suficiente pa carga e mas cu 700 kilo di droga. A abogado ta haya cu mester declara W.A. liber di importacion di droga.
Abogado mr. Mohamed di V.L. a bisa cu no tin prueba cu V.L. ta complice di importacion di droga. E no tabata sa di droga y no a haya compensacion. Den ningun di e combersacionnan cu Polis tabata scucha, por a scucha V.L. ta papia di droga y cuanto placa e lo haya. E abogado a remarca, con por spera V.L. por a transporta e 700 kilo di droga den su Nissan March. Lo mester tabatin combersacion unda lo hiba e droga y na unda lo bay warda esaki. Nada di esaki a sosode. V.L. a para riba cu e no tin nada di haci cu droga sino a bay busca hendenan cu lo a yega ilegal. E abogado ta haya cu mester declara V.L. pa e acusacion di complice di importacion di droga.
Abogado mr. D.Croes di M.F. a bisa cu M.F. no sa nada di droga. E unico cos cu M.F. a haci ta yuda su pareha di contesta cellular. E abogado a bisa Hues cu e no ta haya cu por considera esaki complice. E abogado a bisa cu M.F. no a participa den ningun preparacion sino como pareha di W.A., el a yuda di contesta yamada. E ta haya cu mester declara M.F. liber.
Hues a sera tratamento di e caso y 28 Augustus pa 8:15 am lo tin sentencia.
