Debi na fayo den sistema di computer di Corte di Husticia
ORANJESTAD (AAN): E tratamento di e apelacion di Parlamentario ir. Mike de Meza contra e sentencia di Corte di Husticia di dia 17 Juli 2025, a keda posponi. Esaki, debi na fayo den e sistema di computer di Corte di Husticia.
Fayo den sistema di corte di husticia: Por a compronde cu tin un fayo den e sistema di computer di Corte Comun di Husticia di Curacao, Aruba, Bonaire y Sint Maarten.
For di siman pasa ta confrontando e problema aki caminda hendenan cu ta presenta na Corte pa entrega of busca documento, no por wordo atendi pasobra e sistema di computer tin un fayo.
Pospone caso De Meza: Personal di Corte di Husticia di Aruba a informa abogado mr. D.Croes y hurista Duijneveld di e situacion reinante y tabata spera cu Dialuna lo a logra drecha e fayo. Lamentablemente no a logra y Diamars, Corte di Husticia di Aruba a notifica mr. D.Croes y Duijneveld cu tratamento di e caso via video conference pa 2’or di merdia a keda posponi door cu no tin comunicacion via computer pa por realiza esaki. Tanten cu no drecha e fayo cu ta reinando den e sistema di computer, ta bira dificil pa dicidi un fecha pa tratamento di e caso.
E fayo den e sistema di computer tambe ta trece cun’e cu procedimentonan cu mester haci via computer, ta tranca. Ta di spera cu mas liher posibel e problema aki keda soluciona.
