Sentencia di Hues
ORANJESTAD (AAN): Manera DIARIO a publica, Diabierna mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra Kenneth Rudolf Vrolijk di 31 aña. Ta asina cu Hues no a sigui Fiscal den su exigencia. Hues a condena Vrolijk na castigo di prison mas abao cu Fiscal a exigi y tambe no a duna orden di detencion inmediato.
Exigencia Fiscal: Dia 6 di Februari 2026 tratamento di e caso a tuma lugar caminda Vrolijk ta wordo acusa di estafa di Stichting Sportsubsidie Aruba (SSA), malversacion di fondonan publico, labamento di placa y mal uso di su funcion como empleado di Gobierno.
Den e periodo entre Mei 2023 y September 2024, Vrolijk a malversa mas di 180 Mil Florin di Gobierno. E placa aki a wordo entre otro pasa via cuentanan bancario di cuatro otro persona (asina yama “mulanan di placa”), pa asina yega riba cuenta di Vrolijk.
Den practica e forma di traha aki ta nifica cu Vrolijk tabata paga e subsidionan na su mes, envez di a ehecuta e proyectonan pa engrandece deporte na Aruba.
Fiscal ta haya cu mester duna castigo di multa di 7.720,63 Florin, cual ta e suma cu ainda Vrolijk falta di paga.
Ademas di esaki, Fiscal a exigi un castigo di 2 aña y 6 luna di prison pa Vrolijk y tambe cu pa un periodo di 7 aña, Vrolijk ta perde su derecho pa traha como empleado di Gobierno.
Fiscal a exigi detencion inmediato di Vrolijk pasobra ta existi e riesgo cu Vrolijk lo trata di sconde pa cumpli cu e castigo.
Sentencia: Hues a sera tratamento di e caso y dicta sentencia. Hues a mustra cu Vrolijk tabata traha pa Minister como coordinador di presupuesto y a estafa SSA y Gobierno y labamento di placa. Hues ta haya cu Vrolijk a abusa di su funcion.
Culpabel di estafa gobierno: Hues a bisa cu tin declaracion skirbi di Vrolijk caminda el a admiti di a haci tur cos. E ta splica di a haci uso di mulanan di placa, o sea empleadonan cu el a usa nan cuenta di banco pa manda placa y despues haya e placa aki.
Hues ta haya Vrolijk culpabel di: estafa SSA, como ambtenaar a malversa placa, culpabel di labamento di placa y cu Vrolijk a mal usa su funcion pa kita placa di SSA. En total 184.173 Florin.
Rechaza exigencia di multa: Hues a bisa cu Fiscal a exigi un multa pa Vrolijk di 7.720,63 Florin. Hues ta haya cu Vrolijk a paga tur e placanan cu el a estafa y no ta haya cu mester tuma e medida aki. El a rechaza e multa.
Hues a sigui bisa cu Vrolijk, como ambtenaar, a estafa SSA y Gobierno. Vrolijk a usa mulanan di placa pa asina riba nan cuenta di banco e haya e placa. Door di esaki mas o menos 184 mil Florin a keda estafa.
Hues a bisa cu ta increibel con Vrolijk a haci esaki. E placa tabata destina pa organizacionnan di deporte cu mester di e placa aki. Hues ta haya cu Vrolijk a haci mal uso di hendenan cu ta cay bou di dje.
Mester manda señal cu no ta tolera: Pa cu e castigo, Hues a bisa cu e ta tene cuenta cu ta promer biaha cu Vrolijk ta cay den man di husticia. Tambe Hues a tene cuenta cu Vrolijk a tuma retiro di Gobierno. Hues ta haya importante cu Vrolijk a reconoce cu el a haci malo y a paga bek e placanan cu el a malversa di SSA.
Hues a mustra cu Vrolijk a huy for di Aruba, ora cu investigacion a cuminsa di LandsRecherche. Hues ta haya cu Vrolijk no a para responsabel pa su actonan.
Hues ta haya cu ta necesario cu mester manda señal cu no ta tolera mal uso di placanan di Gobierno. Hues a sigui bisa cu e ta haya cu e chens tey cu Vrolijk lo por bolbe haci algo asina. Pesey Hues a impone castigo combina y tambe kita derecho di ta ambtenaar pa asina proteha comunidad pa un repiticion. Esaki ta un señal cu no ta tolera esaki den Gobierno.
Hues a condena Vrolijk na 16 luna di prison di cual 10 luna ta condicional cu 3 aña di prueba. Ademas Hues a condena Vrolijk cu pa 5 aña, e no por ta ambtenaar.
Hues a mustra cu Fiscal ta exigi pa detene Vrolijk di biaha. Hues a bisa cu segun ley, ora tin un castigo mas cu 1 aña, e ora ey por impone detencion di biaha. Den e caso aki e castigo ta menos cu 1 aña y esey ta haci cu Hues no ta duna orden di detencion di biaha.
Tempo lo bay mustra si Ministerio Publico lo apela e sentencia, mirando cu varios di e exigencianan a keda rechaza. Si apela e sentencia, Corte Superior, ta tres Hues cu ta forma Hof, lo trata e caso full di nobo y Hof lo dicidi si e sentencia ta na su lugar of no.
