Lider di RED Democratico
- Tin di haber cu e caso Caret unda dos Polis a mata hoben di 19 aña
- Varios persona expresando disgusto pa e rekisitorio debil di Fiscal
ORANJESTAD (AAN): E exigencia di Fiscal den e caso di tiramento fatal contra e hoben di 19 aña sin arma na Madiki Kavel cu a socede na Februari di aña pasa, a sacudi Aruba siman pasa. Esey ta ora cu a bira conoci cu Ministerio Publico no a exigi ningun castigo direct pa prison pa e dos oficialnan di Polis. Te na April ora cu dicta sentencia, lo haya sa si Hues lo cumpli cu e rekisitorio di Fiscal of no.
Hopi comentario por a tende no djis na programanan di pueblo na palabra na radio, sino tambe lesa riba Social Media. Pueblo a expresa nan disgusto cu loke hasta abogado a expresa comosifuera cu Fiscal a “trata e dos Polisnan sospechoso cu handschoen bisti”.
Uni di esnan cu no a gusta nada at all pa loke Fiscal a exigi pa castigo, ta e lider di Partido RED Democratico, esta abogado Ricardo Croes. Riba su account di social media, el a haci comparacion cu loke a socede algun tempo pasa riba veld di futbol di SV La Fama na September 2023. Esey ta ora cu coach di futbol no tabata di acuerdo cu fluitmento di referee, y pesey el a pasa man pa un boter di plastico y a dal e dirigente di wega cu ne na su wowo. E referee a perde un wowo debi na esaki.
Ora cu e coach a wordo presenta den Corte di Husticia pa e caso, na final Fiscal e tempo ey a exigi 6 aña di castigo pa e coach. Pasobra e referee a perde un wowo.
Y aworaki dos Polis ta mata hende inocente, y e no ta compronde con Fiscal tin curashi di pidi castigo condicional pa e dos oficialnan hudicial.
Mensahe profundo: Despues di esey el a manda par di palabranan di insulto, y hopi ciudadano ta opina cu loke Ricardo Croes a haci eynan, simplemente ta su derecho pa cu libertad di expresion. No sa si ta pa esey Ministerio Publico a lag’e wordo deteni, of pa loke el a pidi pa Dios haci cu e isla.
Diabierna den oranan di anochi, Ricardo Croes por a ser mira saliendo cu mannan den boei for di warda di Recherche na Wayaca. Na e lugar e momento ey, por a mira e mayornan di Sr. Croes tambe presente pa duna sosten moral.
Ricardo Croes a wordo yama door di Recherche riba Diabierna, y eynan mes el a wordo deteni. Fuera di Croes tin dos persona mas di Aruba cu a wordo yama y ta deteni.
E motibo ta cu nan lo a vocifera fuertemente contra Fiscal su rekisitorio pa e 2 agentenan policial cu a tira Ayden mata na Februari 2025. Croes a wordo transporta den un Van di CEA pa un warda di polis.
Partido RED yamada urgente: Mientras tanto, Partido RED a core haci un yamada pa un Conferencia di Prensa urgente cu lo tuma lugar awe Dialuna, 2 di Maart pa 9:00 am riba Plaza Alameda, cu ta e tereno net dilanti di Corte di Husticia na Playa.
Directiva di Partido a splica, cu nan unico topico di e conferencia di prensa, lo ta e detencion di Ricardo Croes den fin di siman cu a pasa, y nan opinion al respecto.
