Mañan ta haya sa e sentencia
ORANJESTAD (AAN): Mañan mainta Hues di Corte den Promer Instancia lo dicidi riba e 2 aña y 6 luna di prison cu Fiscal a exigi, e demanda di 7.720,63 Florin y detencion inmediato di e homber Kenneth Vrolijk.
Sospechoso a bay for di Aruba: Dia 6 di Februari 2026, Hues di Corte den Promer Instancia a trata e caso penal cu Ministerio Publico a cuminsa contra Vrolijk di 30 aña. E caso ta hiba e nomber “Bromelia Zaak”. Ta asina cu Vrolijk no ta na Aruba y no a presenta den Corte.
Su abogado mr. Carlo a presenta. Tin indicacion cu e acusado ta scondi den exterior. E ta wordo acusa di estafa di Stichting Sportsubsidie Aruba (SSA), malversacion di fondonan publico, labamento di placa y mal uso di su funcion como empleado di Gobierno.
Malversa mas di 180 mil Florin: Den e periodo entre Mei 2023 y September 2024, Vrolijk a malversa mas di 180 Mil Florin di Gobierno. E placa aki a wordo entre otro pasa via cuentanan bancario di cuatro otro persona (asina yama “mulanan di placa”), pa asina yega riba cuenta di Vrolijk.
Den practica e forma di traha aki ta nifica cu Vrolijk tabata paga e subsidionan na su mes, envez di a ehecuta e proyectonan pa engrandece deporte na Aruba.
Falsifica firma di Minister: A sali na cla cu Vrolijk tabata falsifica e firma di e minister di Enseñanza y Deporte diferente biaha. E “mulanan di placa” y otro personanan envolvi den e caso aki, lo wordo persigui tambe. Esey lo bira un asina yama TOM-zitting (Transactie Openbaar Ministerie), caminda Fiscal lo atende cu nan.
Durante tratamento di e caso, Fiscal a bisa cu ta tuma Vrolijk hopi na malo pa loke el a haci. El a perhudica comunidad di Aruba, door di uza e placa di pais Aruba, pa e biba un bida estilo di luho. E placa cu tabata destina pa engrandece deporte na Aruba, Vrolijk a maluza esaki pa su propio uso. E mal hecho aki a causa daño na integridad di Gobierno, di SSA) y otro fundacionnan di Gobierno.
Exigencia di Fiscal: Durante tratamento di e caso a sali na cla cu Vrolijk a paga bek SSA gran parti di e placa cu el a malversa. Fiscal ta haya cu mester duna castigo di multa di 7.720,63 Florin, cual ta e suma cu ainda Vrolijk falta di paga.
Ademas di esaki, Fiscal a exigi un castigo di 2 aña y 6 luna di prison pa Vrolijk y tambe cu pa un periodo di 7 aña, Vrolijk ta perde su derecho pa traha como empleado di Gobierno.
Fiscal a exigi detencion inmediato di Vrolijk pasobra ta existi e riesgo cu Vrolijk lo trata di sconde pa cumpli cu e castigo.
Ta asina cu Hues a suspende e caso y mañan lo por spera cu Hues ta sera tratamento di e caso y dicta sentencia di biaha.
