Hues ta haya e narcotraficantenan culpabel
ORANJESTAD (AAN): Manera DIARIO a publica, Hues a dicta sentencia den e caso penal contra e homber W.A., e muhe M.F. y e homber V.L., kendenan Hues ta haya culpabel di traficacion di hopi kilo di droga.
Complice di traficacion di droga: Tur tres sospechoso a presenta dilanti Hues pa scucha nan sentencia. Hues ta haya legalmente proba tur e acusacionnan di traficacion di droga. Hues a mustra cu riba e anochi di 25-26 Augustus 2024, Wardacosta a intercepta un boto cu 5 hende abordo, caminda a confisca 22 bulto cu tabatin 63 kilo di cocaina y 692 kilo di marihuana.
Hues a bisa cu W.A. tabatin combersacion cu esnan cu ta transporta e droga den boto. Hues ta haya cu W.A. tabatin un funcion di coordina y tabata sa cu ta cantidad grandi di droga ta bin Aruba. Hues a bisa cu investigacion a mustra cu nan tabata papia den code pa asina no laga sa cu ta di droga nan tabata papia. Nan tabata papia di cabay lo ta bin y cu e bestianan. Hues a bisa cu e no ta kere W.A. cu e anotacionnan den un buki cu Polis a confisca, ta di plantacion di matanan. Hues ta haya cu esaki ta relaciona cu e cantidad di droganan cu W.A. lo ricibi.
Hues a sigui bisa cu e ta haya e muhe M.F., pareha di W.A., ta complice di traficacion di droga. Hues a mustra cu Polis a scucha M.F. tabata haya informacion via smartphone y pasa informacion pa W.A. Hues ta haya cu M.F. tabata sa cu ta droga. E no ta kere M.F., kende a bisa cu e no sa di nada.
Hues a sigui bisa cu e ta haya V.L. tambe ta complice di traficacion di droga. Na opinion di Hues, V.L. su funcion tabata pa tene vigilancia riba costa y pa tuma e droga. Hues a mustra cu V.L. tabatin combersacion cu esnan den boto. Hues ta haya cu V.L. tabata sa cu ta trata di droga y cu na dado momento V.L. a rabia cu un boto mester a bay back.
Gaña den Corte: Hues a mustra cu W.A. y V.L. a haya condena caba pa importacion di droga y den Corte nan a gaña cu nan castigo ta relaciona cu plantacion di marihuana, pa duna imagen di otro cos.
Hues a sigui bisa cu e ta haya W.A. tambe culpabel di e traficacion di droga riba 9 Juli 2024, caminda Polis a confisca 70 kilo di cocaina y mas di 600 kilo di marihuana. Hues a mustra cu tabatin combersacion entre W.A. cu un persona den e boto cu tabata usa un Satellite-Phone. Tambe cu W.A. tabatin combersacionnan di a purba diferente biaha importa droga pero cu no a logra. Dos di nan a logra.
Ta asina cu algun siman pasa durante tratamento di e caso, Fiscal a exigi pa W.A. 7 aña di prison, pa V.L. 5 aña di prison y pa M.F. 4 aña di prison.
Castigo: Hues a condena W.A. na 7 aña di prizon, V.L. na 4 aña di prizon y e muhe M.F. na 3 aña di prizon. Por a nota cu e muhe M.F. a cuminsa yora ora el a tende su castigo
