Castigo 4 y 7 aña di prison a worde exigi
ORANJESTAD (AAN): Awe Diahuebs mainta un trio Venezolano mester presenta dilanti Hues pa scucha nan sentencia den e caso penal cu Ministerio Publico a cuminsa contra nan. E homber W.A. di 34 aña, e muhe M.F. di 36 aña, y e homber V.L. di 31 aña, ta worde acusa cu entre 25 y 26 Augustus 2024, conhuntamente cu otronan, a importa 692 kilo di marihuana y 63 kilo di cocaina. W.A. tambe ta worde acusa cu riba 9 Juli 2024 a viola ley di droga. Tur ta bibando na Aruba.
Fiscal a baha pisa riba e trio aki, caminda Fiscal a exigi pa W.A. 7 aña di prison, pa V.L. 5 aña di prison y pa e muhe M.F. 4 aña di prison.
Instala aparato den auto pa scucha: Tratamento di e caso tabata na comienso di Augustus 2025 caminda Hues a mustra cu segun e rapport di Polis, riba e anochi di 25 y 26 Augustus 2024, Guarda Costa a notifica Polis, cu na Venezuela ta organizando diferente importacion di lotenan grandi di droga pa Aruba. Polis a dicidi di tap cellularnan di sospechosonan.
Riba 19 Maart 2024, Polis a scucha cu lotenan di droga lo ta destina pa “Chino” cu ta W.A.. Tambe su pareha M.F. lo ta envolvi. Polis a instala aparato special pa scucha combersacionnan den e auto di W.A. Entre 19 y 21 di Maart 2024 y diferente biaha entre otro na 12 y 20 Augustus 2024, por a scucha cu tabatin intento di importacion di droga y cu W.A. lo tabata envolvi.
Intercepta boto carga cu droga: Dia 25 Augustus 2024, Wardacosta di Caribe Hulandes a constata 11’or di anochi riba radar, un boto di Venezuela biniendo Aruba. A tuma accion y 12’or di anochi, e avion di Wardacosta a mira tiramento di bultonan den laman. Boto special Metal Shark di Wardacosta a intercepta e boto y a detene 5 hende y 22 bulto di droga a keda confisca. A haya 629 kilo di marihuana y 63 kilo di cocaina.
Tur sospechoso ta nenga: Hues a puntra W.A. si e ta envolvi. Segun W.A. e no tin nada di haci cu e caso aki. El a bisa Hues cu e tabata sa cu famianan di dje cu ta ilegal, tabata bini Aruba. Hues a mustra cu Polis a scucha combersacionnan caminda W.A. tabata bisa pa ki ora asina nan lo mester yega. Tabatin palabra na unda na un cas na Calabas pa busca esnan ilegal. Hues a mustra cu ora Polis a yega, e cellular tabata completamente kibra pa no por saca informacion.
Hues a puntra e muhe M.F. si e tabata envolvi. El a bisa cu e no sa di nada. Hues a mustra cu M.F. lo a papia tambe. Segun M.F., el a yuda W.A., kende su cellular a baha. El a contesta yamada y informa W.A. pero nada mas.
Hues a puntra V.L. si e tabata envolvi. Segun V.L., e no sa nada di droga. E unico cos cu e sa cu W.A. a pidi’e pa yuda cu familiarnan cu lo bin y pa para cla pa busca nan. Segun V.L., e familiarnan ningun momento a yega y el a bay back cas. Ta asina cu Polis a pone GPS na e Nissan March pa sa unda V.L. tabata. E movecionnan di e auto tabata mustra cu V.L. tabata vigila si tabata sigur pa e boto por yega.
Fiscal: Fiscal a splica Hues cu e 5 personanan abordo di e boto a worde condena na 5 aña di prison pa importacion di cocaina y marihuana. Fiscal a haci e trio un cantidad di preguntanan riba e yamadanan caminda ta sospecha cu nan tabata papia di boto cu mester yega Aruba riba diferente fecha.
Fiscal: a bisa cu caso a cuminsa na Maart 2024, ora cu Polis a haya informacion cu ta organizando importacion di droga for di Venezuela.
Fiscal ta considera W.A. como e coordinador di importacion di droganan. Fiscal ta haya cu V.L. hasta a expresa cu mester mata tur esnan cu ta papia y causa cu cada vez e boto mester bay back. Fiscal ta considera V.L. esun cu tabata ehecuta. Mirando e cantidad grandi di e droganan y cu W.A. y V.L. ya tin condena pa traficacion di droga, Fiscal a exigi pa W.A. 7 aña di prison, pa V.L. 5 aña di prison y pa M.F. 4 aña di prison.
Abogadonan ta haya cu no tin prueba: Abogado mr. Canwood di W.A. a bisa Hues cu apesar di e dos acusacionnan, no tin prueba cu W.A. ta envolvi den importacion di cocaina y marihuana di casi 700 kilo di droga den tur dos situacion. W.A. a desmenti di ta envolvi den droga y cu e ta bay busca famianan ilegalnan. E ta mas concentra cu trecemento di ilegalnan. Asina el a pidi V.L. yuda pa busca. Abogado a bisa cu W.A. tabata indica e capitan unda ta e mihor caminda pa trece e ilegalnan pa evita cu tin hogamento. E combersacionnan ta mas dirigi pa e trecemento di ilegalnan. Tambe tin combersacion caminda ta papia di rescata e muchanan. Aki ta referi na e ilegalnan. E abogado a bisa Hues cu tin varios combersacionnan riba esaki y hasta tin fayo den traduccion di Spaño pa Hulandes caminda ta crea e impresion cu lo ta droganan a worde benta den laman siendo cu ta e hendenan ilegal a baha for di e boto.
Awe Diahuebs mainta Hues ta laga sa kico e ta pensa di e caso y DIARIO lo informa tur su lectornan.
