ORANJESTAD (AAN): E sospechosonan Wuill Vrolijk, Joshua Wouters y Yael Frans a presenta dilanti Hues y a keda dicidi cu tratamento di e caso penal contra nan lo tuma lugar na November 2021.
ASESINATO CRUEL: Ta asina cu via video conference, Vrolijk, Wouters y Frans a presenta dilanti Hues. Nan tabata den KIA mientras cu den sala di Corte, Hues, Fiscal y e abogadonan tabata presente. Den ley ta stipula cu despues di un periodo ta sera den KIA como sospechoso di un delito, e sospechoso mester presenta dilanti Hues.
E acusacion cu Fiscal a presenta contra e trio aki ta cu riba 15 di Januari 2021, intencionalmente cu cara tapa y na un manera calmo, nan a tira e difunto Lisander ‘Sammy’ Leonardo Ignacio, cu a resulta fatal.
Ta asina cu e victima tabata sinta den un auto den cura di e cas y e trio a yega cu caranan tapa y los tres tiro riba dje. Esey a socede pa 9:10 pm, den e area patras di e centro di reciclahe di Serlimar.
Yamadanan cu a cuminza drenta na Polis, a pone cu diferente patruya di San Nicolas a ser mobiliza pa e area. Unidadnan di Recherche riba caya a move pa e lugar mesun momento.
Polis a yega na e adres, y a nota cu hendenan ta aglomerando rond di un auto staciona den cura di un cas. Aki a bin haya e hoben Sammy di 21 aña cu hopi sanger na su cabez y no ta reacciona mas.
Mientras tanto, hendenan a cuminza bisa Polis cu nan a mira tres hende cu cara tapa a core sali for di e cura di cas despues di a tende e tiro.
Paramediconan a yega cu e prome unidad di Ambulans, pero no por a haya ningun signo vital mas di e persona cu ta parce di a wordo tira na su cabez y benta den e auto. Nan a sugeri Polis pa yama Docter, pasobra nan mes no por haci nada mas.
Dos tiro a perfora e victima den cabez, cu consecuencia cu el a fayece. Tambe Fiscal ta acusa e trio aki di posecion di arma di candela.
CASO NA NOVEMBER: Ta asina cu e caso a bin dilanti pro forma, caminda Hues no ta trata e caso sino ta fiha un fecha pa e tratamento. A keda dicidi cu dia 5 November 2021 lo tuma henter dia pa tratamento di e lamentable caso aki
E asesinato riba Sammy (riba e potret) a shock hopi hoben, cu ta amigo di e persona aki.
