Agente di Polis mester a bula un banda pa scapa su bida
ORANJESTAD (AAN): Riba Diabierna mainta Fiscal a exigi 18 luna di prison pa e homber J.P. di 30 aña, kende Fiscal ta haya culpabel di riba 17 October 2024, a manda auto riba un agente di Polis. Esaki a sosode durante control di unidadnan motoriza di Polis riba coremento di velocidad halto riba e caminda di Oranjestad pa San Nicolas, na altura di e rotonde Seroe Tijsji.
Den sala di Corte tabata presente e agente di Polis, hunto cu su colega cu tabata cu ne.
E acusacion cu Fiscal a presenta den Corte contra J.P. ta cu riba 17 October 2024, a purba di mata un agente di Polis cu auto, door di manda e auto riba e agente di Polis. E agente mester a bula un banda pa evita di worde gedal. Fiscal a acusa e homber J.P. di intento di mata, intento di haci daño severo. Tambe Fiscal ta acusa J.P. di posesion di marihuana y cocaina.
Manda auto riba Polis: Ta asina cu J.P. ta desmenti e acusacion. Hues a bisa cu J.P. a worde para door cu Polis tabata sospecha cu e tabata core mucho duro. Na e rotonde di Sero Tijsji el a worde indica pa para. Hues a bisa cu segun e relato di Polis, e agente a para dilanti di auto y indica J.P. pa para.
Segun J.P. no tabatin ningun hende para dilanti di e auto. Hues a puntra J.P., pakico el a sigui core. Segun J.P., el a sigui core pasobra e tabatin droga cu ne. Hues a remarca cu J.P. por a para, pero J.P. a dicidi di tuma e chens. Hues a mustra cu segun e agente di Polis, e mester a bula un banda pa evita cu e auto a dal e. J.P. a keda desmenti esey.
Hues a bisa cu na Polis, J.P. a bisa cu e tabata bao influencia di droga y pesey a actua asina. Segun J.P. no ta asina. Hues a bisa cu tabatin reconstruccion di e incidente a tuma lugar y eynan a constata cu enberdad e agente A. tabata para dilanti di e auto y e otro agente tambe a bisa cu el a mira su colega bula un banda.
Segun J.P., e dos agentenan ta amigo y e otro no ta bay bisa cu no ta asina. J.P. a bisa Hues cu e no tabata sa unda pa para.
Hues a mustra cu Polis a constata cu J.P. tabata core 160 km/h den e auto sedan Hyundai Sonata. J.P. a remarca cu e no ta kere Polis. Hues a remarca pakico J.P. ta asina negativo cu Polis. Hues a bisa cu J.P. a para ora e agente a mustr’e pa para y despues a primi gasoline. Despues a sigui un persecusion. J.P. a bisa Hues cu el a cende e luznan hazard pa indica cu e lo stop.
Haya cantidad di droga den auto: Hues a bisa cu J.P. tabatin marihuana y cocaina den e auto. Fiscal a remarca cu e droganan tabata den saconan chikito. Esaki ta indica cu J.P. ta deal den droga. El a puntra J.P. tocante e droga y J.P. a bisa cu e ta haci uso di su derecho di silencio.
Fiscal a sigui haci pregunta y J.P. a bisa cu e no ta bay duna informacion na Polis pa perhudica su mes. Hues a remarca cu J.P. tin carchi di castigo cu hopi caso cometi na Hulanda.
Fiscal a exigi 18 luna di prison: Fiscal a bisa Hues cu e ta haya J.P. tabatin droga den auto. Polis a haya 14,75 gram di marihuana, 10 gram di hash, 8,14 gram di cocaina.
Pa loke ta e mandamento di auto riba Polis, Fiscal a mustra cu tin dos declaracion, esun di e agentenan y esun di J.P. cu ta nenga. Na opinion di Fiscal, e agente mester a bula un banda pasobra J.P. a bay cu e auto cu velocidad halto riba dje. Fiscal a mustra cu dia 18 October 2024, J.P. a bisa Polis cu e tabata paranoid.
Dilanti Hues Comisario el a bisa cu e tabata bao influencia di droga. Den reconstruccion tambe J.P. a bisa cu e tabata bao influencia di alcohol y droga. Despues dilanti Hues Comisario, J.P. a bisa cu e no tabata bou influencia.
Fiscal a bisa Hues cu despues cu J.P. a bisa cu e auto ta modern y tin un sistema di safety automatic cu ta para e auto si tin algo su dilanti, Polis a bay investiga y e sistema aki no ta traha y tampoco e systema di brake.
Fiscal a remarca cu J.P. ta cambia su declaracion. Fiscal a mustra cu durante reconstruccion, J.P. a bin cu declaracion completamente diferente cu loke e 2 agentenan a declara.
Fiscal a conclui cu e no ta mira motibo pa duda den e relato di Polis. El a sigui bisa cu no ta manera cu J.P. ta pretende cu Polis ta gaña. Fiscal a bisa cu Polis ta traha bou huramento e relato y si nan gaña, nan lo worde persigui.
A purba mata Polis: Segun Fiscal, dia 17 October 2024, J.P. a purba mata e agente di Polis cu auto. Door cu e agente a bula un banda, e auto no a dal’e. Fiscal a bisa, danki Dios cu e agente di Polis no a worde gedal. Fiscal a remarca cu na Hulanda, J.P. tin un carchi di castigo hopi largo. El a mustra cu na 2016 caba, a condena J.P. pa intento mata na 6 aña di prison.
Tambe J.P. tin condena pa droga. Fiscal ta considera J.P. como residivista. Fiscal a exigi 18 luna di prison pa J.P. E droga lo worde destrui. E cellular y placa cu a confisca, lo mester worde debolbe.
Abogado: Abogado mr. Hernandez a bisa cu e ta haya cu no por prueba intento di mata. El a mustra cu e agentenan di Polis a duna declaracion contradictorio y pesey mester laga nan declaracion afo. E abogado ta haya cu e declaracion di e agente, no ta cuadra cu loke realmente a sosode. El a bisa cu riba su insistencia a haci un reconstruccion y no ta manera cu Fiscal ta bisa.
E abogado a bisa cu J.P. a para y ora Polis a bis’e pa bay para un banda, el a core bay. Ningun momento e agente di Polis a para dilanti di e auto. El a bisa cu e agente ta bisa cu e mester a bula un banda. Na opinion di e abogado, tin caminda cu e agente di Polis ta declara cu el a bira y sinti auto pasa hopi cerca y dal cu man contra auto y bisa pa para.
Segun e abogado, durante reconstruccion e agente a bisa cu J.P. no a bin cu velocidad halto riba dje ora el a duna indicacion pa para. E abogado ta haya cu J.P. tabata core poco poco pa bay para unda e agente a indica pa para. Segun e abogado, e no ta haya cu e agente a bula un banda sino a hala un banda. E agente a dal e auto cu su man pa bis’e pa para y e ora ey J.P. a primi gasoline y core bay. E abogado a bisa cu tin suficiente espacio cu J.P. por a hala un banda y core bay y no bay riba e agente.
E abogado no ta haya cu por papia di intento di mata, intento di causa herida severo. E abogado a bisa cu e sistema di seguridad segun J.P. tabata traha. Por ta despues di e incidente esaki a daña. El a menciona un sentencia di Hulanda, caminda a declara un chofer liber di intento di mata un agente y a condena e persona pa no sigui orden di Polis y a haya 11 dia di prison.
Den e caso aki, Fiscal no a menciona cu a nenga di sigui indicacion di Polis. E abogado a bisa cu ya caba J.P. tin 6 luna di prison. El a pidi Hues pa pone J.P. den libertad. E abogado tambe a pidi Hues pa duna castigo igual na loke J.P. a sinta caba. Hues a sera tratamento di e caso y a bisa cu dia 25 April 2025 lo tin sentencia.
Riba e potret por mira momento cu a haci reconstruccion di e caso na Sero Tijsji.
