Apesar cu Fiscal a exigi 9 aña di prison
- Abogado ta insisti cu el a djis defende su mes
- Te aki 2 siman lo haya sa pakico el a keda libera
ORANJESTAD (AAN): Dialuna mainta Hues di Corte den Promer Instancia a cera tratamento di e caso penal contra Gregory Junior Zuleta Rave di 22 aña, kende ta e sospechoso di a mata Corniel Tejada riba 3 Juli 2024.
Ta asina cu e sospechoso a presenta den Corte y Hues a bisa cu e ta sera tratamento di e caso y dia 15 April 2025, e lo dicta sentencia.
Fiscal a exigi 9 aña di prison: Den Corte dia 14 di Maart 2025, tratamento di e caso a tuma lugar caminda e sospechoso Gregory ta para riba cu el a defende su mes contra e victima Corniel Tejada.
Fiscal no ta haya cu Gregory a defende su mes sino cu a dal mata e victima. Fiscal ta haya Gregory culpabel di a mata Corniel Tejada y a exigi 9 aña di prison.
Sospechoso laga liber: Por a compronde cu Diamars mainta, Hues a duna orden pa laga Gregory liber. E noticia aki a cay manera un sorpresa. A haya confirmacion di esaki cerca e abogado di Gregory, mr. Canwood.
E abogado, durante tratamento di e caso dia 14 di Maart 2025 a bisa Hues cu Gregory a actua den defensa propio contra Corniel Tejada y ta haya cu mester declara Gregory liber.
Normal, ora cu un sospechoso ta worde laga liber promer cu tin un sentencia, ta indicacion cu Hues tin un otro opinion cu loke Fiscal a trece padilanti.
Pa awor tin di sinta warda te dia 15 di April 2025, lo haya sa pakico Hues a ordena pa laga Gregory liber y kico ta su sentencia
