Aunke cu tur dos ta nenga
ORANJESTAD (AAN): E muhe R.T.R. di 59 aña, y su yiu muher D.J.H-P. di 40 aña acusa di a viola e ley di droga pa un periodo di algun aña, ta nenga rotundamente di tabata bende. Fiscal a confronta nan cu declaracion di testigonan cu ta mustra cu nan tabata cumpra marihuana y cocaina cerca e mama y su yiu.
E acusacion cu Fiscal a presenta contra R.T.R. y D.J.H-P. ta cu nan tabata bende, transporta cocaina y marihuana. Fiscal a bisa cu pa e mama R.T.R. e ta un periodo di 3 aña mientras cu pa D.J.H-P, e ta un periodo di 10 aña.
Nenga bende droga: Hues a puntra R.T.R. si ta berdad cu durante 3 aña Maart 2021 y 2024, e tabata bende na su cas den Pindastraat. R.T.R. a desmenti esey. El a bisa Hues cu e ta viuda di e homber Corniel Tejada cu riba 3 Juli 2024 a wordo mata door di Gregory Junior Zuleta Rave.
Hues a mustra na 2020, R.T.R. a wordo condena na 2 aña y 6 luna di prison pa bendemento di droga. Hues a remarca cu ta parce cu R.T.R. a sigui bende.
TESTIGONAN A CUMPRA DROGA: Hues a mustra cu testigonan a bisa Polis cu regularmente nan ta cumpra droga for di R.T.R. su cas. Nan a reconoce potret di R.T.R. Ta asina cu R.T.R. ta keda desmenti. Hues a remarca con por ta cu tur e testigonan ta menciona R.T.R. su nomber. El a bisa Hues cu e no ta bende droga.
Hues a sigui cu D.J.H-P., kende tambe a desmenti. El a bisa Hues cu 15 aña pasa el a bay for di e cas y no ta bende. Hues a mustra cu tin testigonan cu ta papia di ta cumpra for di D.J.H-P. na e cas den Pindastraat. Nan a reconoce D.J.H-P. Ta asina cu D.J.H-.P. a para riba cu e no ta biba cerca su mama y no ta bende droga. El a bisa cu e ta inscribi cerca su mama, pero ta biba den Maracastraat. El a bisa cu e sa bay bishita su mama. Hues a mustra cu tin testigo a declara cu ta manda mensahe pa D.J.H-P. pa haya droga y despues ta bay busca cerca dje.
Hues a mustra cu tin raport di Reclassering cu ta mustra cu ambos sospechoso lo mester haya guia pa evita cu nan lo bolbe hacie.
Fiscal a exigi 4 y 5 aña di prison: Fiscal a bisa Hues cu tin 7 testigo cu a bisa cu nan tabata cumpra marihuana y cocaina na e cas na Pindstraat for di tur dos. Fiscal a splica Hues cu despues cu informacion drenta na departamento di asuntonan criminal tocante bendemento di droga na e cas, a cuminsa cu investigacion y a mira movecionnan. A detene nan dos. D.J.H-P. a wordo deteni na e cas ora di e investigacion. Fiscal a remarca cu D.J.H-P ta bisa cu e no ta biba na e cas pa 15 aña.
Dia di e investigacion a hay’e na e cas y cu droga den e tas. Fiscal a mustra cu tin prueba cu D.P. tabata bende pa 10 aָña. Pa R.T.R. e periodo ta mas cortico. Esaki tin di haci cu un periodo promer, e tabata sera pa bendemento pero a sali y sigui bende. Fiscal ta haya nan complice di bende droga y tabatin droga den nan poder. Pa cu castigo, Fiscal a tene cuenta cu pa tempo largo nan a bende y tabata mantene nan mes cu e placa di droga.
Fiscal a tuma R.T.R. na malo cu apesar di tabata sera pa bende, a bolbe haci mesun cos mientras cu su yiu sa cu su mama tabata bende. Fiscal tambe a bisa cu e ta tene cuenta cu raport di Reclassering cu ta mustra cu nan mester di guia pa bay riba e bon caminda. Tambe Fiscal a tene cuenta cu e actitud di ambos durante tratamento di e caso. Fiscal a remarca cu a haya droga den e cas y placa, pero tog nan ta nenga di tabata bende droga. Fiscal a exigi pa R.T.R. 4 aña y pa D.P. 5 aña. El a bisa cu e 2 celularnan cu a keda confisca por wordo debolbe. E droga lo mester wordo destrui. E placanan lo keda confisca.
Abogado: mr. D.Croes a bisa Hues cu tin declaracionnan di testigonan cu ta mustra cu D.J.H-P. no tabata bende tur tempo den Dakota. E tabata entre 2018 y 2021 biba na Pos Chiquito y despues a bay biba den Maracastraat den Dakota.
Uza adictonan pa declara: E abogado a mustra cu Polis no a haya balansa of saconan di plastic chikito cu ta wordo uza pa bendemento di droga. E abogado a remarca cu Polis ta uza usadornan di droga, kendenan ta duna e declaracion cu Polis kier, pa nan no bay sera. El a remarca tambe cu e potret cu Polis a uza, bo no ta reconoce R.T.R. E abogado ta haya cu no por prueba cu e duo tabata bende. El a pidi Hues pa declara nan liber.
El a sigui bisa cu si Hues ta haya cu nan tabata bende, esey tabata pa un periodo cortico y no manera Fiscal ta acusa nan. E ta haya cu e castigo exigi pa Fiscal ta exagera. E abogado a bisa Hues cu e ta kere cu un castigo combina lo yuda mas mihor pa mantene nan for di bendemento di droga y bou guia di Reclassering.
Sentencia: Hues a pospone e caso un rato pa evalua y a bolbe y dicta sentencia di biaha. Hues a bisa cu e ta haya cu ambos sospechoso ta culpabel. Na opinion di Fiscal, tin suficiente prueba legal, caminda testigonan a declara di a cumpra droga na Pindastraat. E hecho cu D.J.H-P. tabata biba otro caminda, no ta haci cu e no por bende droga na e cas den Pindastraat. Hues a mustra cu pa D.J.H-P. ta un periodo largo y R.T.R. ta un residivista pa bendemento di droga.
Hues a bisa cu droga ta malo pa salud di hende. Hopi biaha esnan cu ta cumpra droga ta haci criminalidad pa yega na placa.
Cuanto castigo mester duna? Hues ta haya cu Fiscal a exigi castigo pisa y no a laga lugar pa duna Reclassering chens pa guia. Hues a basa su mes riba sentencia di Hof pa casonan similar. Hues a bisa cu Hof ta duna castigo mas abao, mirando cu no ta bendemento den gran escala. Hues ta haya cu ambos mester haya e mesun castigo. Hues a condena nan na 4 aña di prison di cual 1 aña ta condicional cu un tempo di prueba di 3 aña. Durante e tempo di prueba, nan lo cay bou guia di Reclassering. Hues a bisa cu e celularnan lo wordo debolbe, e placanan y tasnan lo keda confisca. E droga lo wordo destrui.
