El a yega di comete esaki caba den pasado
ORANJESTAD (AAN): Diabierna mainta e homber A.K.M. a presenta pa di tres biaha dilanti Hues pa e mesun tipo di delito. Na 2018 y 2024 el a wordo condena pa estafa y malversacion. Fiscal a bisa cu A.K.M. no a siña y ta sigui manipula hende. Fiscal a bisa cu e ta tene cuenta cu psycologo su raport cu ta mustra cu A.K.M. mester di tratamento. Pesey Fiscal a exigi 12 luna di prizon di cual 6 luna ta condicional y cu A.K.M. mester sigui tratamento bou Reclassering.
Diesdos hende a bira victima: Fiscal su acusacionnan contra A.K.M. ta, cu den e periodo di promer di 1 Augustus 2025 te 18 Januari 2026 a hiba varios persona na pag’e of haci debe bao pretextonan, manera cu e ta huur apartment, ta bende auto, ta famia di notario, ta experto of ta dunador di trabao. En total 8 persona a wordo estafa. Fiscal a mustra cu entre Augustus 2024 y Januari 2025, A.K.M. a estafa 4 persona. Den sala di Corte tabata presente 6 hende cu a bira victima di A.K.M. y a haci demanda di daño.
Acusado ta admiti di estafa cantidad di hende: Riba preguntanan haci door di Hues, segun A.K.M. el a estafa hendenan door di necesidad di placa. Hues a mustra cu e dama d.N. a haci denuncia cu el a wordo acerca pa Mario pa huur apartamento. Mester a paga deposito 1200 Florin pero no a topa cu Mario. Mario a bisa cu e tabata na Colombia y esey a haci cu el a pidi mas placa. Na dado momento d N. a constata riba facebook cu Mario en realidad ta A.K.M., un estafador.
Segun A.K.M. e tabatin contacto cu un dama Dominicano pa cu e cas pa reservacion. El a pidi placa usando nomber di su tata Mario. Segun A.K.M., el a purba yuda e dama d.N. haya e apartamento pasobra e conoce e dama Dominicano. Hues a remarca cu A.K.M. a haci manera cu e tin e apartamento. Hues a cuestiona e actitud di A.K.M. caminda el a bisa cu door di necesidad el a haci’e pero awor den Corte ta mustra cu ta intencional el a haci’e.
Hues a mustra un otro caso caminda via Facebook, e persona a paga como adelanto na A.K.M. pa reservacion di apartamento. El a paga 250 Florin y A.K.M. a mand’e recibo di 900 Florin. Ora e persona kier a sigui paga y puntra pa e apartamento, A.K.M. a bisa cu e no ta bay door mas y no a duna e persona su placa bek. A resulta cu A.K.M. a estafa e persona ey tambe.
Hues a mustra cu tin mas hendenan cu a wordo estafa di e mesun forma, siendo cu A.K.M. no tabatin apartamento pa nan. Hues mustra cu A.K.M. tabata usa nomber di su tata Mario y tabata pone e placanan riba cuenta di su tata.
Estafa hendenan pa cumpra auto: Hues a bisa cu tambe tin caso caminda Mario tabata ofrece autonan na venta. Tin hendenan a paga den forma di fianza, pagando 300 Florin pa luna. Segun A.K.M. e tabata intermedia pa otro pa bende auto. Segun A.K.M., ora e tabata cla pa bende e auto, e doño a bisa cu te na 2027 e lo bende e auto. Hues a remarca pakico A.K.M. no a hiba e hendenan pa e doño envez di tabata cobra placa adelanta. Hues a puntra A.K.M. si e ta realiza cu e tabata estafa hende. Segun A.K.M., e no ta haya cu el a estafa e homber T. pasobra el a bay cune na e doño di e auto y e doño a bisa cu e no ta bende e auto awor sino te na 2027. Hues a remarca cu despues tabatin e dama V.S. cu ta señora di T. cu tambe a paga pa cumpra un otro auto pero tambe a wordo estafa.
Estafa mas hende: Hues a mustra cu A.K.M. tambe a estafa e dama A. cu tin negoshi, caminda A.K.M. a ofrece di yuda haci e negoshi un VBA y cu e conoce hende na Belasting y Camara di Comercio.
Hues a mustra cu e dama T. a denuncia estafa di A.K.M. cu tabata traha p’e y a ofrece di por haya trabao pa su yiu muhe como asistente na un school. E tabata cobra placanan pa su yiu muhe por haya e trabao. A.K.M. a admiti den Corte, cu el a gaña e dama T. cu e por haya trabao pa su yiu muhe. Segun A.K.M. esey ta un fayo cu el a haci. Hues a remarca cu A.K.M. ta bisa cu el a haci un fayo y no kier admiti cu el a estafa hende.
Hues a sigui bisa cu e homber H. a denuncia di a wordo estafa door di A.K.M. pa haya un apartamento na Hulanda. Hues a mustra cu H. a manda placa pa A.K.M. pa reserva e apartamento cu supuestamente A.K.M. tin pa huur na Hulanda. H. a bisa cu el a cumpra pasashi pa su famia pa bay Hulanda. Despues el a mira riba Facebook cu A.K.M. ta un estafador. A.K.M. a admiti den Corte cu el a gaña cu e tin un apartamento y asina haya placa.
Hues a mustra cu e dama M. a bisa cu el a wordo desaproba pa examen di school y a papia cu A.K.M. kende supuestamente tabata traha na departamento di examen di school. M. a paga A.K.M. Segun A.K.M. e conoce e dama T. cu lo ta haci e trabao ey. Hues a bisa cu e dama T. a bisa cu no ta berdad cu e tabata traha cu A.K.M. na departamento di examen.
Por a constata cu A.K.M. ta papia hopi storia y Hues tabata mustr’e riba e malo cu e tabata haci.
Fiscal a haci preguntanan na A.K.M. di placanan cu el a haya. Segun A.K.M., ta un parti di e placanan so el a haya. Hues a remarca cu e personanan a haci denuncia di sumanan cu nan a paga.
Demandanan di daño: Hues a bisa cu tin 4 demanda di pago. E dama A. a demanda 3 mil Florin material y 3 mil Florin inmaterial. E dama A. a splica cu door di A.K.M., e mester a tuma su retiro como maestra pa asina por atende cu su negoshi. E homber T. a demanda 1300 Florin y 35000 Florin di daño inmaterial. El a presenta na Hues carta di hospital, caminda e mester a wordo interna door cu e estafa a pone bira malo. E dama D. a demanda 2400 Florin material y inmaterial 2500 Florin. El a bisa Hues cu door di e estafa, el a keda 1 luna ta sufri di hamber pasobra e no tabatin placa y mester a sali di e apartamento cu e tabatin y bay keda cerca su mayornan. E dama S. a demanda 2825 Florin cu el a paga A.K.M. sin haya apartamento. E homber A. a demanda 3675 Florin.
Encarcela caba pa estafa: Hues a remarca cu A.K.M. tin un carchi di castigo. Hues a mustra cu na 2018, A.K.M. a wordo condena caba pa estafa na 18 luna di prizon di cual 8 luna ta condicional.
Na aña 2024, e acusado A.K.M. a wordo condena pa malversacion.
Problema mental: Hues a mustra cu segun psicologo, A.K.M. tin problema cu su personalidad. E tabata sinti rabia y jaloers riba otronan cu tin cos cu e no tin. E tabata manipula hende pa haya loke e kier. Segun psicologo, A.K.M. a sigui manipula hende pa asina drecha su situacion financiero. Esaki a bira un problema anti social di A.K.M.
Hues a remarca cu A.K.M., door di estafa, tabata afecta hendenan cu tabata den necesidad. Esaki tabata trece e hendenan den situacion hopi dificil. Psicologo ta haya cu A.K.M. ta menos responsabel y cu A.K.M. mester cay bou guia di Reclassering pasobra e chens ta grandi cu e ta bolbe haci e mesun cos. Reclassering, den un raport hopi amplio, ta comparti punto di bista di psicologo caminda mester duna castigo combina bou guia di Reclassering. Ta asina cu A.K.M. a bisa Reclassering cu e ta dispuesto pa haya ayudo.
Fiscal ta condena estafador: Fiscal a bisa Hues cu e ta haya legalmente proba cu A.K.M. ta culpabel di estafa entre Augustus 2024 y Januari 2026. En total 12 persona a bira victima. Fiscal a mustra cu A.K.M. ta bisa cu e no a estafa sino tabata purba yuda hende. Fiscal ta haya cu A.K.M. tabata manipula e hendenan y convence nan pa duna placa pa e yuda nan. Fiscal ta haya cu tin cierto demanda di daño, entre otro di e dama A. y e homber T. tin parti mester declara no admisibel pasobra no tin prueba. En total Fiscal ta calcula 46.787 Florin a keda estafa. Ta un suma grandi cu A.K.M. a estafa di hendenan cu ta traha duro pa nan placa.
Pa cu e castigo, Fiscal a bisa cu e ta tene cuenta cu raport di psicologo cu ta mustra cu A.K.M. tin un problema y mester di tratamento. Fiscal a mustra cu den pasado caba A.K.M. ya a haya condena pero no a siña di esaki. Fiscal ta kere cu awor mester duna A.K.M. chens pa e cura. Fiscal a bisa cu A.K.M. tin talento pa convence hende pero ta us’e robez. Fiscal a mustra cu loke A.K.M. a haci ta causa hopi preocupacion na e victimanan. Ta trata aki di hopi victima durante un periodo largo. Fiscal a exigi 12 luna di prizon di cual 6 luna ta condicional cu 3 aña di prueba y bou guia di Reclassering. Fiscal a pone enfasis cu A.K.M. mester sigui tur instruccion di Reclassering.
Abogado: mr. Illes a bisa Hues cu A.K.M. ta admiti di a estafa e hendenan. El a pidi Hues pa paga tino cu e hendenan A. y G., pasobra no tin indicacion kico realmente a sosode. E ta haya cu aki ta intento di A.K.M. Abogado mr. Illes a bisa cu e ta comparti punto di bista di Fiscal pa cu e demandanan di daño cu algun no ta completo admisibel. Tambe abogado a bisa cu e ta haya e exigencia di Fiscal na su lugar, teniendo cuenta cu A.K.M. mester di tratamento.
Hues, despues di a scucha A.K.M. pidi disculpa pa loke el a haci, a sera tratamento di e caso y a bisa cu 10 Juli 2026 lo tin sentencia.
