E tabata cera na Hulanda pa asesinato haci na 2013
ORANJESTAD (AAN): Recien den sala di Corte di Husticia a trata e caso penal cu Ministerio Publico a cuminsa contra e hombernan N.R., mihor conoci como Baba Ras y B.B., mihor conoci como Billy. Ta asina cu ambos ta actualmente cera na Curaçao y pesey e caso a wordo trata via video conference. Hues y Fiscal tabata sinta den sala di Corte, mientras cu Baba y Billy tabata den un oficina den prison na Curaçao.
CONDENA DEN PASADO PA ASESINATO
Baba a wordo condena den pasado na 18 aña di prison pa asesinato di e homber defunto Brete na Tanki Leendert den un drive by shooting riba 30 Juni 2013.
E asesinato aki ta relaciona cu un asunto di gang. Un amigo di Baba a wordo tira mata den oranan di marduga y Baba a dicidi di tuma venganza. Door di e situacion di gang, a opta pa manda Baba sinta su castigo na Hulanda.
POSECION DI ARMA Y COCAINA
Despues di a sinta castigo na Hulanda, Baba ta bolbe Aruba aña pasa y na Januari 2026, Polis ta haci un investigacion y ta haya Baba cu un arma di candela Smith & Wesson. Tambe a haya cocaina. Polis tambe ta detene Billy. E acusacion contra Baba ta, cu entre 10 December 2025 y 19 Januari 2026, posesion di un arma di candela y riba 19 di Januari 2026, posesion di cocaina. Billy ta wordo acusa di posesion di cocaina riba 19 Januari 2026.
CASTIGO COMBINA PA AMBOS
Ta asina cu Fiscal a exigi 18 luna di prison pa Baba. Fiscal a exigi 18 luna di prison pa Billy di cual 6 luna ta condicional cu 3 aña di prueba. Hues, despues di a scucha abogadonan, a dicta sentencia di biaha.
Hues a haya Baba y Billy culpabel. Hues a condena Baba na 12 luna di prison mientras cu Billy a wordo condena na 15 luna di prison di cual 6 luna ta condicional cu 3 aña di prueba. E arma di candela y e cocaina ta wordo destrui.
