Hues a declar’e liber di acusacion posesion armanan di candela
ORANJESTAD (AAN): Dialuna mainta, Hues di Corte di Husticia den Promer Instancia, a dicta sentencia den e caso penal contra e acusado E.G. di 22 aña, acusa di bende droga y posesion di arma di candela. Hues no ta haya proba e acusacion di posecion di armanan di candela y a declar’e liber pa esey. Hues a condena E.G. pa e bendemento di droga. Fiscal a exigi 30 luna di prizon di cual 6 luna ta condicional. Hues a condena E.G. na 12 luna di prizon di cual 6 luna ta condicional.
Bende droga y posecion di arma: Tratamento di e caso a tuma lugar luna pasa, caminda Fiscal a bisa cu e acusacionnan contra E.G. ta, cu entre Mei 2025 y November 2025 e tabata bende marihuana.
Demas acusacion ta cu entre 6 Augustus 2025 y 24 November 2025 E.G. tabata den posesion di armanan di candela.
Fiscal a exigi 30 luna: Fiscal ta haya cu E.G. tabata dedica su mes cu bendemento di marihuana y tabatin arma pisa. Na opinion di Fiscal, no tin bista cla cuanto droga E.G. a bende.
Fiscal a bisa tambe cu den su opinion, e no ta haya cu E.G. realmente ta arepenti di tur esaki. El a mustra cu tin arma ainda ta riba caya. Fiscal a exigi 30 luna di prizon di cual 6 luna ta condicional cu 3 aña di prueba. El a exigi tambe cu e smartphone lo mester keda confisca.
Sentencia: Dialuna mainta Hues a bisa cu ta rechaza ponencia di abogado mr. Carlo pa declara Fiscal no-admisibel den e caso.
Hues a sigui bisa cu e ta declara E.G. liber di posecion di armanan di candela entre 6 Augustus 2025 y 24 November 2025. Hues a bisa cu durante tratamento di e caso, tabatin discusion riba e arma semi automatico. Ta trata di un potret di E.G. cu un arma den man. E.G. a bisa cu 2 aña promer el a saca potret cu e arma na Colombia.
Hues ta haya cu no por bisa cu E.G. tabatin e arma na Aruba y no por acopla e arma na Aruba pasobra e fecha di e potretnan di arma cu a haya den smartphone di E.G. ta hopi despues di e fecha cu E.G. ta bisa. Hues a mustra cu un otro potret di E.G. cu un arma banda di cas di E.G., no ta mesun cos cu e otro potret cu E.G. tabatin den su smartphone.
Hues a bisa cu el a compara e potretnan y nan no ta e mesun arma. Pesey Hues ta declara E.G. liber di posecion di e armanan di candela.
Bendemento di droga: Hues ta haya proba e acusacion di posecion y bende marihuana. Hues a mustra cu E.G. mes a bisa den Corte, cu el a pone droga y prijs riba snap chat. Hues ta haya proba cu entre Juni 2025 y November 2025, E.G. tabatin droga. Hues a rechaza defensa di abogado riba esaki.
A viola proceso di tap Celular: Hues a sigui riba e cuestion di scucha (tap) cellular. Hues a bisa cu e ta rechaza e defensa di abogado cu lo a tap cellular cu no tabata di E.G. Hues ta haya cu tin tur indicacion cu ta e cellular di E.G. y tabatin permiso di Hues Comisario pa haci esaki.
Hues a duna abogado mr. Carlo razon cu segun ley no ta permiti pa uza e aparato cu Polis a utiliza pa gara cellularnan y scucha. Esaki por sosode, solamente manera mr. Carlo a bisa, cu autorizacion di Minister. Hues ta haya cu esaki ta un violacion di e proceso. Hues a splica cu den e caso aki solamente por uza un sancion, si e procedimento ta perhudica E.G. den su interesnan. Hues ta haya cu abogado no a menciona interesnan di E.G. cu ta wordo perhudica.
Hues tambe a rechaza ponencia di abogado cu E.G. tin Apple iPhone y tin potretnan cu no ta procedente di iPhone. Hues a mustra cu E.G. mes a bisa cu tin potretnan cu el a usa cu un otro smartphone.
Castigo combina: Pa cu e castigo, Hues a bisa cu e lo impone un castigo mas abao cu loke Fiscal a exigi. Hues a bisa cu e ta haya cu E.G. tabata deal den marihuana. Hues a mustra cu marihuana ta afecta salud di hende y fomenta criminalidad. Hues a condena E.G. na 12 luna di prizon, di cual 4 luna ta condicional y cu 2 aña di prueba. Hues a bisa tambe cu e smartphone Apple iPhone ta keda confisca.
