ORANJESTAD (AAN): Fiscal a baha pisa riba e ex guardia personal di ex Promer Minister, Evelyn Wever Croes, e homber S.K.(60).
Fiscal ta haya S.K. culpabel di a abusa durante un tempo largo di dos mucha muher y tambe di tabatin 6 arma di candela cu mas di 600 bala cayente.
Manera DIARIO a publica, diabierna mainta S.K. a presenta dilanti Hues pa tratamento di e caso penal cu Ministerio Publico a cuminsa contra dje. Tratamento di e caso tabata di mainta te den oranan di atardi.
ACUSACION
Den sala di Corte tabata presente e mayornan di e dos victimanan y familiar di e sospechoso S.K. Fiscal a bisa Hues cu tin 8 acusacion contra S.K. Entre 8 April 2015 y 2022, S.K. lo a abusa di e mucha R., kende tabata bou di 12 aña. El a cuminsa haci actonan inmoral cu R, tempo R. tabatin 5 aña y despues a tene relacion sexual cu e mucha. Entre 25 Augustus 2019 y 13 Mei 2023, S.K. a abusa di e amiga di R., W. S.K. a cuminsa haci actonan inmoral cu W. cu tabata bou 12 aña. Despues el a tene relacion sexual cu W. tambe.
Tambe S.K. ta wordo acusa cu entre 27 Juni 2022 y Maart 2025, e tabatin pornografia di mucha den su cellular.
Fiscal tambe ta acusa S.K. cu entre 2015 y 2023, e tabatin 6 arma di candela y mas cu 600 bala cayente.
Tambe e ta wordo acusa cu entre 2015 y 2023, e tabatin 6 arma di candela.
Hues a hala atencion di tur den sala di Corte pa tin respet pa otro y controla emocionnan.
SOSPECHOSO NO KIER BISA NADA
Hues a puntra K. si e kier bisa algo. K. a bisa cu su abogado mr. Rosenstand ta papia p’e. Hues a haci K. diferente preguntanan pero cada vez e tabata bisa cu e ta haci uso di su derecho di silencio.
VICTIMA A HACI DENUNCIA
Hues a mustra cu e victima R. a bay biba na Hulanda y na November 2024, el a haci denuncia. R. a bisa cu K. ta biba banda di dje. El a bisa cu despues K. a bay biba den un trailer ey banda mes. El a bisa cu K. tin pistol y a lag’e mira e pistool. Tambe el a bisa cu K. tin un sicatriz na su pia banda te na su lies. Hues a puntra con por ta posibel cu R. a mira e sicacriz. Segun R., tempo e tabatin 5 aña, K. tabata sunchi y pasa man. Tempo e tabatin 7 aña, K. tabata sunchi y penetr’e cada siman. Despues K. a cuminsa tin relacion sexual cun’e. E victima a bisa cu K. tabata haci’e cu un otro mucha W. y cu e victima mester a tene e mucha na su mannan y cu W. no tabata gusta. E victima R. a bisa cu e tabata sinti dolor y tabata skop K. pero K. tabata persisti. Nan tabatin miedo di papia cu mayornan pasobra K. lo rabia. E victima R. a mustra cu e tin un potret di e cu e otro mucha W. Tabatin un potret di K. hunto cu e muchanan. E muchanan tabata bay serca K. pa mira peliculanan di mucha. E mucha R. a bisa cu ora K. tin relacion sexual cu W. e tabata eynan. Un di e victimanan a bisa cu K. a bestel un bikini p’e y cu e mester tene relacion sexual cun’e.
Hues a mustra cu segun declaracion di e mama di R., e sa laga su yiu serca K. ora e tin cu traha. El a bisa cu e muchanan R. y W. tabata bay serca K. pa usa internet pa TikTok. Un testigo a bisa cu e sa mira e muchanan serca K.
Hues a bisa K. cu si na K. su opinion, tur e cosnan aki ta inventa, ta mihor e papia awor. K. a bisa Hues cu e ta laga tur cos den man di su abogado. Hues a remarca cu K. por aclarea cosnan pasobra ta e so tabata eynan.
Fiscal a pasa un video pa e sospechoso K., Hues y abogado mira di e muchanan ta usa aparato pa huma pero K. a bisa cu e ta haci uso di su derecho di silencio.
SOSPECHOSO TA NENGA
Abogado a haci K. serie di preguntanan. K. a bisa cu e mama di R. tabata bay serca dje y hasta el a laga e mama cu un yabi di reserva pa asina si algo pasa, e tin un yabi pa habri e trailer. Ta asina cu e muchanan R. y W. a usa e yabi di reserva sin su autorizacion. Na Mei 2023, R. a bay Hulanda. K. a desmenti di tabatin contacto cu R. na Hulanda. Ariba preguntanan di abogado, K. a bisa cu R. a bis’e cu un di su omonan tabata abusa di dje. K. a bisa cu el a cumpra bikini pa R. pero cu R. lo pag’e. El a bisa cu no tin nada palabra di sex pa bikini. K. a bisa cu promer cu R. a bay Hulanda, el a bay despedi di K. y a bisa K. cu nan a gar’e den cas cu un otro homber. E abogado a puntra K. riba sicatris na pia y K. a mustra cu e sicatris ta di su rudia te patras di su heup.
VIDEONAN PORNOGRAFICO
- a splica cu un amiga a mand’e link di pornografia pero K. no por habri’e y tambe potretnan screen shot. Hues a mustra cu Polis a habri e link. K. a bisa cu e link no por wordo habri y awor e no sa cu Polis a habri’e. K. a splica cu el a haya link di pornografia di hende grandi y no di mucha.
ARMANAN DI CANDELA
Hues a bisa cu 6 seis arma cu peña y balanan, Polis a haya na trailer di K., durante un investigacion. Segun K. tur ta pertenece na club di tiro. K. a bisa cu tur e armanan tabata den su caha fuerte, e tin permiso pa tur. El a bisa cu tin un carta cu ta bisa cu tur e armanan ta di un club di tiro. K. a splica cu un dia promer cu Polis a haci investigacion na su cas, el a bay practica tiro y dos di e armanan tabata den un tas pafor di e caha fuerte. El a bisa cu e mester a haci e dos armanan limpi promer cu e hinca nan bek den e caha fuerte. El a bisa cu desde 2002 e ta miembro di club di tiro. Abogado a mustra cu tin un permiso di Minister di Husticia na 2007 pa miembronan di club di tiro, pa tin arma di candela na cas y mester warda e arma(nan) den caha fuerte. Segun K., su nomber ta riba e lista ey. Hues a bisa cu e tin e listanan y den un lista di 2025 tin 6 biaha e nomber di K. cu tin arma di e club di tiro.
Fiscal a confronta K. cu un video caminda ta mira e mucha R. cu un arma den man. K. a bisa Hues cu e dia ey, R. y su mama a bin serca dje. K. a splica cu el a caba di haci e arma limpi y e mama tabata papia cun’e pafor. E mucha R. a bay paden y a coy e arma. El a bisa cu e ta sigur cu e arma ta safe pasobra e no tabatin bala aden. El a bisa cu e no sa di e video cu e mucha a haci.
MAYORNAN A PIDI HUSTICIA
E tata di R.(15) a bisa cu nan a haya shock di nan bida ora cu na November 2024 a haya sa cu pa 8 aña largo nan yiu tabata victima di abuso sexual. E tata a bisa cu K. a forza R. pa tin relacion sexual y a convence R. pa busca su amiga W. pa tambe tin relacion cun’e. E tata a sigui bisa cu nan a keda den shock ora nan a mira nan yiu R. ta hunga cu un arma di candela di K. E tata a bisa Hues cu R. ta sufriendo y tin berguenza pa loke a pasa cun’e. El a keda cu trauma. E tata a bira emocional y hasta tabata yora. E tabata keda wak e sospechoso y bise: si bo ta suficiente homber, bira wak mi den mi cara”. “Bo engañonan y manipulacionnan a caba”. El a bisa e abogado cu e mester realisa cu e ta defende un hende cu a manipula mucha. E tata a bisa cu e yiu a expresa cu K. a manipul’e y abusa di dje sin tene cuenta cu su edad. E tata a pidi Hues pa tene cuenta cu su yiu a wordo abusa cu su 5 aña. El a pidi Hues pa haci husticia pa loke K. a haci cu mi yiu. E tata a finaliza bisando cu su yiu merece husticia.
E mama di W. a bisa Hues cu e ta hunto cu su casa a kede sorprende cu loke a sali na cla. El a bisa cu Dios ta maraviyoso y tur cos ta sali na cla. E mama a enfatisa cu su yiu ta un menor di edad y un persona cu ta traha cu ley na Imigracion mester sa mihor. El a remarca, Dios sa si tin mas mucha inocente cu a sali perhudica. E mama a bisa cu su yiu W. a wanta tur cos aden y awor mester di tratamento psicologico. El a mustra cu tin un calculacion di mas o menos 3 mil florin pa cuminsa cu tratamento. El a finaliza bisando: “No tin un prijs pa consola na e daño cu K. a haci na nos yiu”.
DEMANDA
E tata di R. a demanda 84, 949 florin total. E mama di W. a mustra cu tin un calculacion di mas o menos 3000 florin pa cuminsa cu tratamento psycologico.
VICTIMA TA MALO
Abogado a bisa Hues cu K. ta sufri di curason. K. a bisa Hues cu e caso aki ta un sla duro p’e pasobra e muchanan ta papia cosnan cu no ta e berdad. El a bisa cu su salud a bay atras. El a bisa cu tur e cos aki a perhudic’e y politica tambe a perhudic’e. El a bisa cu den politica nan ta papia di e chofer pero e ta e seguridad di ex Promer Minister.
FISCAL
Fiscal a bisa Hues cu si no tabata pa R., nunca lo a haya sa di e caso aki. Bisiňa a abusa di dos mucha menor di edad. Fiscal ta haya cu tin suficiente prueba convicente y declaracion di e dos muchanan. Nan tabata hunto ora cu e abusonan tabata tuma lugar. E ta haya e declaracion di e muchanan confiabel. E ta haya cu e declaracion di R. y W. ta consistente cu ta K. a abusa di nan. E muchanan tabata yora ora nan tabata conta kico a pasa cu nan. Fiscal a mustra cu mas di 40 potret di pornografia di mucha, a haya den cellular di K. Tambe tin videonan di pornografia di mucha. 6 arma di candela y mas di 600 bala haya na cas di K.
Pa cu e castigo, Fiscal a bisa cu entre 2015 y 2023, K. a abusa di dos mucha menor di edad. El a abusa di confianza di bisiña. A tacha e muchanan nan integridad y por afecta nan den nan bida. K. tabatin 6 arma ilegal den su poder. Fiscal ta tuma K. na malo cu K. ta laga e mucha R. tin un arma den man. Fiscal a exigi 10 aña di prizon. Tata di R. a klap den man ora el a scucha exigencia. Pa loke ta demanda di daño, Fiscal ta haya cu por aproba nan.
Hues, despues di a scucha e defensa di abogado, a sera tratamento di e caso y a bisa cu e ta bay studia e caso y otro luna lo dicta sentencia.
