Abogado di sospechoso di abuso di dos mucha y posecion di 6 arma di candela
ORANJESTAD (AAN): Diabierna di mainta te den oranan di merdia, a tuma lugar tratamento di e caso penal contra e homber S.K. Diabierna a publica tratamento di e caso y e exigencia di Fiscal. Awe ta publica e defensa di abogado mr. Rosenstand.
ABOGADO
Mr. Rosenstand a mustra Hues cu un sospechoso ta keda inocente te ora cu Hues tuma un decision. E abogado a bisa Hues cu el a consulta un experto Solia Vries riba casonan di abuso di mucha, kende ta conoci tambe pa Corte di Husticia.
NO TIN INVESTIGACION MEDICO
E abogado a bisa cu ta acusa su cliente S.K. di a abusa di e muchanan R. y W. Sinembargo, no tin investigacion medico haci y tampoco evaluacion di psicologo. E abogado a remarca cu ademas di declaracion di e muchanan, no tin investigacion medico, no tin investigacion psicologo, no tin DNA. No tin nada nada.
MAMA TA BISA CU SU YIU TABATA TERIBEL
Pa loke ta e sospecho cu S.K. lo a haci video di e mucha R., e abogado a bisa Hues cu no tin ningun video haci door di S.K. El a mustra cu e victima R. mes a bisa Polis na Hulanda cu no ta S.K. a haci video sino otro hende. Mr. Rosenstand a mustra cu segun e procesverbaalnan, na October 2024, R. a wordo scucha pa Polis riba denuncia di abuso sexual. Na September 2024, e mama di R. a declara cu e tin hopi problema cu R. E mama a declara na Polis, cu tur siman R. tin un otro pareha. E abogado a mustra cu R. tabata manda potretnan sunu y Polis a puntr’e si ta S.K. y R. a bisa no.
E abogado a bisa cu R. a bisa cu tempo cu e tabatin 5 aña, tur cos a cuminsa. E abogado a remarca, pakico a dura 1 luna promer cu a haci denuncia! E abogado ta puntra, por ta cu R. no kier a haci denuncia contra S.K. y ta door di presion el a haci esaki? Pakico e mama di R. no a haci denuncia asina cu el a haya sa di loke a sosode?
E abogado a bisa Hues cu mama di R. a bisa cu R. tabata manda potret rond y causa problema. Esaki na Aruba y tambe na Hulanda. E abogado a mustra cu no ta asina cu ta S.K. a manda potret. R. mes a declara na Polis na Hulanda, cu e ta activo sexual. E mama mes a bisa Polis cu tabatin hopi problema cu R. E abogado a remarca, cu e pregunta ta bira, ta S.K. of tur e amigonan cu R. tabatin, ta sospechoso?
TUR E ARMANAN TA LEGAL
Pa loke ta e armanan cu a haya na e trailer di S.K., mr. Rosenstand a mustra cu S.K. tin permiso pa tin armanan y cu tur e armanan ta registra na e club di tiro cu S.K. ta forma parti di dje. E abogado a mustra cu tin un sentencia di Corte caminda a ordena Polis, pa entrega tur e armanan bek cu a confisca den pasado di clubnan di tiro.
Mr. Rosenstand a bisa Hues cu S.K. a nace cu un pia mas largo cu e otro y el a bay haci operacion na Curacao y a keda cu cicatriz te dia di awe. E cicatriz no ta bay banda di su parti intimo manera R. y W. ta bisa cu nan a mira. Tampoco cu S.K. tin tattoo riba su pecho manera R. y W. ta bisa.
MUCHA TA WAK VIDEO SEXUAL DI SU MAMA
E abogado a cuestiona e hecho cu R. a bisa cu su mama tabata filma relacion sexual cu su pareha y tabata laga R. mira. E abogado ta haya cu esaki ta afecta e parti psikico di R.
E abogado a cuestiona e demanda di daño di parti di mayornan di R. E ta haya cu tin gastonan poni cu no ta cuadra. E abogado tambe a mustra cu tin gastonan cu aki na Aruba, segun ley no ta cubri. E abogado a sigui bisa cu e ta haya cu no ta specifica e demanda suficiente.
Mr. Rosenstand a conclui cu Hues mester declara e demanda di daño no admisibel. Pa loke ta e acusacion di abuso di e dos muchanan, e abogado ta haya cu no tin pruebanan di abuso sexual contra S.K. y tampoco posecion ilegal di arma. E abogado ta haya cu mester declara S.K. liber. Hues a bisa cu dia 10 October 2025 lo tin sentencia.
