Cinco aña di prizon exigi pa homber envolvi den importacion di 381 kilo di marihuana

Avion Dash-8 a capta imagen con a baha droga na Aruba

ORANJESTAD (AAN): Den Corte di Husticia, e homber A.B. di 49 aña, acusa di ta envolvi den importacion di 381 kilo di marihuana riba e Dialuna 12 Mei 2025 den oranan di anochi, a scucha Fiscal exigi 5 aña di prizon p’e.  Esaki ta e caso unda cu a bin haya droga na un rancho na Barcadera.

   E anochi ey, radar a detecta un boto sospechoso bayendo direccion Zuid-Post di Aruba.  E avion Dash-8 di Wardacosta a bula pazuid di Aruba, y for di distancia leu tabata siguiendo e boto aki, y vigila tur movimento di e boto y su tripulantenan ora cu nan a yega na tera.  Nan tin camera abordo cu ta zoom-in di leu y cu Infrared.  Riba e potret aki mes por mira imagen Infrared di e camera potente di e avion, ta captando momento cu esnan riba e boto ta yuda carga.

   Den e boto tabatin 7 Venezolano, y cada uno a yuda carga bulto di droga riba nan cabez pa baha na tera.  Dash-8 a pasa e informacion aki pa autoridad, y mesora tanto Polisnan di San Nicolas, Santa Cruz, Wardacosta, y patruya di Guarda Nos Costa tambe a mobilisa.  Nan a logra gara tur siete.  A bin haya e droga y tambe 2 arma di candela.

   Importa marihuana: Hues a puntra A.B. si e ta envolvi den e importacion di 381 kilo di marihuana y A.B. a bisa cu e tabata envolvi den e grupo di purba bin cu marihuana. El a bisa cu 1 siman promer un Venezolano a acerk’e y un Colombiano cu no ta na Aruba. E conoce nan pa asunto di droga den pasado. Nan a bis’e pa ricibi e droga cu lo bin for di Colombia. Nan a bis’e ki dia y ora e droga lo yega.

   E boto cu e droga lo mester a yega 12 Mei 2025 entre 1’or y 2’or di marduga na un rancho na Barcadera. El a bisa cu e no tabatin contacto mas cu nan. A.B. a bisa Hues cu e boto no a yega marduga sino 6’or di mainta.

   Wardacosta a intercepta e boto: Acusado A.B. a bisa Hues cu ora el a mira e boto ta bini y cu Wardacosta tabata bayendo riba nan, el a dicidi di bay for di e rancho. El a mira con e boto a bira pa purba huy pero Wardacosta a intercepta e boto.

   Segun A.B., e palabracion tabata 600 liber di marihuana. A.B. a bisa cu su trabao tabata djis ricibi e droga y e Venezolano lo bay busca e droga. El a bisa cu e lo warda e droga den un cas di piscado te ora e Venezolano bay buske. Hues a bisa cu Wardacosta a intercepta e boto riba cual tabatin diferente ice jug grandi. 

   Net 381 kilo marihuana confisca: Segun raport di Wardacosta di Caribe Hulandes, e boto a bira bay y Wardacosta a haya e boto bandona den e mangelnan y a haya 7 ice jug conteniendo basta paki di marihuana.

   En total a confisca 381 kilo di marihuana. Miembronan di Wardacosta a logra detene un persona di e boto y a detene A.B.

   Yega di cay 2 biaha pa droga: Segun acusado A.B. dos biaha el a wordo condena pa traficacion di droga. El a wordo condena dos biaha na 22 luna di prizon. Tambe e tin un condena di 12 luna di prizon pa traficacion di hende.

   Hues a puntra A.B. si e gusta prizon pasobra ya ta 3 biaha caba cu el a haya condena di castigo di prizon. A.B. a bisa Hues cu door di necesidad el a haci esey. A.B. a bisa cu e lo a haya 20 paki di marihuana como pago pa su trabao cu ta mas o menos 20 mil Florin. Ta asina cu e no tin lugar di keda y tabata biba na e Rancho.

   Fiscal a exigi 5 aña di prizon: Fiscal a bisa Hues cu e ta haya legalmente proba cu A.B. ta envolvi den importacion di droga. Fiscal a bisa cu Servicio di Inteligencia di Polis a haya informacion cu A.B. lo tin importacion di droga. Fiscal a mustra cu tabatin auto ta warda e boto y ora Wardacosta a bay riba e boto, e boto a drenta den e mangelnan y e hendenan a core bay. Miembronan di Wardacosta a logra detene uno.

   Fiscal a sigui bisa cu Polis a haya combersacion di A.B. cu ta bisa cu e ta cla pa ricibi e cargamento. Den un otro smartphone, Polis a mira potretnan di e pier na unda e boto lo mester a yega. Fiscal a bisa cu e uzamento di droga ta causa adiccion y fomenta criminalidad. El a remarca cu A.B. ta un recidivista. Fiscal ta haya cu A.B. no ta realisa e daño cu e ta haciendo na comunidad. Fiscal a exigi 5 aña di prizon y cu e 2 smartphone lo mester keda confisca.

   Abogado: Abogado mr. de Koning a bisa Hues cu e ta haya cu A.B. a purba y mester considera esaki como un intento di complice. Na opinion di e abogado, A.B. su trabao tabata solamente ricibi y warda e droga. Esey no a keda realisa ya cu e droga a keda intercepta.

   E abogado ta haya cu no tabatin cooperacion estrecho y pesey no ta haya cu por papia di complice. E abogado a bisa cu A.B. no tabata riba e boto y no tin nada di haci cu e organizacion di e viahe di e boto. El a bisa cu A.B. su trabao tabata mas bien facilita cu e droga ta wordo warda pa otro busca.

   E abogado a pidi Hues pa no considera A.B. complice di importacion di lote di marihuana. Hues a bisa cu dia 8 Mei 2026 lo tin sentencia.