Fiscal a exigi 5 aña di prizon
ORANJESTAD (AAN): Diabierna 24 April 2026 mainta, Hues di Corte di Husticia ta dicta sentencia den e caso penal cu Ministerio Publico a cuminsa contra e homber D.E di 29 aña. Luna pasa 20 Maart 2026, tratamento di e caso a tuma lugar, caminda a tuma henter un dia pa esaki.
Acusacionnan: E acusacionnan cu Fiscal a presenta contra D.E. ta:
(*) Na Juni 2014 a viola e dama S., kende e tempo ey tabatin 17 aña. Ademas S. tabata victima di “hacking” electronico y chantahe di D.E.
(*) Entre Januari 2015 y 11 Januari 2023, a hack y chantahia e damanan B. y T.
No completo responsabel: Psicologo y Psychiater a wordo scucha e dia ey den Corte, caminda nan ta haya cu D.E. tin problema mental y cu e mester haya tratamento na Respaldo. Nan ta haya cu D.E. ta menos responsabel pa su actonan.
Demanda di daño: Ta asina cu e dama S. na Hulanda, a demanda 28.674 Florin na daño material pa tur e tratamento cu e mester a sigui na Hulanda. Tambe el a demanda 84 mil Florin di daño material door cu el a keda afecto y awor mester haci 1 aña extra di su estudio na Hulanda.
E dama T. a demanda 57.790 Florin na daño material cu ta encera entre otro tur e tratamento cu e ta hayando.
Fiscal a exigi 5 aña di prison: Fiscal a bisa cu e victimanan a sufri pa hopi tempo door di D.E. y nan a keda afecta. El a sigui bisa cu e acusado tambe mester haya tratamento pa su problema mental. Fiscal a cuestiona e forma con D.E. tabata hack electronicamente y forza e victimanan pa manda potret sino e lo publica potretnan di nan riba media.
Fiscal a remarca cu a pesar cu e victimanan tabata roga D.E. pa stop, e no tabata haci caso. Fiscal a tuma D.E. na malo pa su actitud. Fiscal a bisa cu pa cu e castigo, e ta tene cuenta cu psicologo y psychiater cu ta bisa cu D.E. ta menos responsabel pa su actonan door di su problema mental. Fiscal ta haya cu mirando e seriedad di e caso, no tin espacio pa castigo combina pa asina D.E. haya tratamento.
Fiscal a bisa cu ora D.E. sali liber di KIA, e por sigui tratamento. Fiscal a exigi 5 aña di prizon pa D.E. Subsidiario Fiscal a bisa cu si Hues ta haya cu castigo combina lo ta na su lugar, por pone e tempo di prueba te 10 aña. Fiscal a aproba e demanda di daño di e dama S.
Castigo ta mucho halto: Abogado mr. Illes a bisa Hues cu e ta haya e exigencia di Fiscal mucho halto.
E abogado a bisa cu Fiscal no a tene cuenta cu e situacion mental di D.E., manera psicologo y psychiater ta mustra.
No tabatin violacion: E abogado a bisa cu D.E. a bisa Hues cu e tabatin relacion sexual cu e dama S. y cu esaki tabata cu aprobacion di S. E abogado ta haya cu no tin prueba di violacion y mester declara D.E. liber y cu e demanda di daño di e dama S., mester wordo poni un banda. E abogado ta haya cu e demanda di S. ta asina compleho pa wordo trata den un caso penal. E ta haya un caso civil na su lugar.
E abogado a bisa cu D.E. ta admiti di a haci malo y mester haya castigo. Na opinion di e abogado, Hues mester tene cuenta cu raport di psicologo y pshychiater kendenan ta mustra cu door di e problema mental di D.E., e ta menos responsabel pa loke el a haci.
Abogado mr. Illes a bisa Hues cu den KIA, su cliente D.E. ta bao vigilancia special pa no mata curpa.
Na opinion di mr. Illes, castigo di prizon ta tene D.E. riba un pause cu e no por haci nada, pero tratamento ta trece cambio den su comportacion.
Hues a sera tratamento di e caso y a bisa cu e mester mas tempo pa studia e caso. El a bisa cu 24 April 2026, e lo sera tratamento di e caso y di biaha lo tin sentencia.
