E sospechoso ta para riba cu el a fia e victima placa pero nada mas
ORANJESTAD (AAN): Fiscal a baha pisa riba e homber G.E.T. di 40 aña riba Diabierna mainta den Corte. Fiscal ta haya cu esaki ta di dos biaha cu G.E.T. ta cay sera pa e mesun tipo di caso, caminda gulido di bolita di cocaina ta muri.
E promer caso tabata na 2021 y awor e caso di 26 December 2024. Hues ta haya G.E.T. culpabel di a importa cocaina hunto cu otronan entre 24 y 26 December 2024. Tambe Fiscal ta haya G.E.T. culpabel di morto di e defunto Timothy D’Aguiar, kende a bay Medellin, Colombia pa guli bolitanan di droga y na Aruba 26 December 2024, e ta fayece ora cu dos bolita a kibra den su stoma. Fiscal a exigi 10 aña di prison.
A fia e victima placa pero no ta envolvi: Hues a puntra G.E.T., si e tabata envolvi den transportacion di droga. Segun G.E.T. e tin un parti aden pero no a trafica droga. El a bisa Hues cu e ta hopi bon amigo cu Timothy (conoci tambe como ‘Timmy’) y cu mientras cu e tabata sera den KIA, el a fia Timothy placa pa e bay busca droga na Colombia. Segun G.E.T., Timothy no tabatin trabao y cu Timothy a bis’e cu el a haya oferta di bay busca droga y cu e deal ta cu 60 porciento di e droga ta pa e doño y 40 porciento ta pa Timothy.
Segun G.E,T., el a pidi Timothy fabor pa busca un hangua cu ta masha gusta pa hende usa. El a duna Timothy 400 dollar pa cumpra injeccionnan. G.E.T. a bisa Hues cu for den KIA, e tabata yama Timothy na Medellin, Colombia y el a ripara cu Timothy tabata hopi droga. Despues Timothy a yama G.E.T. y bisa cu el a haya e bolitanan y cu nan lo a horta e 400 Dollar cu G.E.T. a dun’e pa cumpra injeccionnan. G.E.T. a rabia cu su placa a disparce. El a sigui bisa Hues cu despues Timothy a mand’e film con e ta baila y tabata mal droga.
G.E.T. a bisa cu el a yama e pareha di Timothy, e dama Wolff pa bis’e cu Timothy no ta bay bula su siguiente dia den e estado cu e ta. Un dia despues Timothy ta yam’e y bise cu e no a bin cu droga pasobra e bolitanan ta mal traha y nan a laga drecha esakinan.
Dos biaha e vuelta di droga a faya: Hues a bisa cu e ta haya cu G.E.T. ta hopi envolvi den kico Timothy ta haci. Segun G.E.T., e ta bon amigo di Timothy y pesey tabata preocupa cu algo ta pase. Tur e tempo ey G.E.T. ta sera den KIA.
G.E.T. a sigui bisa cu un siman despues, Timothy a bay bek Colombia pa busca e bolitanan. Na dado momento e amiga Wolff a notifica G.E.T. cu Timothy no a bin bek Aruba y e mester un ticket nobo. G.E.T. a manda placa pa un otro ticket. Segun G.E.T., door cu Timothy a droga, e no por a bin. A cumpra un otro ticket di mas cu 700 florin y asina Timothy a bin Aruba.
Dia 29 November 2024, G.E.T. a sali for di KIA. El a message Timothy y despues a bay bishit’e. El a haya Timothy mal droga. Nan a cuminsa papia atrobe. Despues Timothy a bisa G.E.T. cu cos ta h••ido y si por yud’e cu cen pa e bay haci un Vuelta na Colombia. G.E.T. a bisa cu e unico manera cu e por fia Timothy placa atrobe, ta si Timothy ta bay cu un hende pa wak p’e. E ora G.E.T. a pidi un amigo J.M.Z. pa bay cu Timothy. E amigo J.M.Z. a bay di acuerdo.
G.E.T. a fia Timothy 400 Dollar. Nan a bay Colombia. G.E.T. a bisa Hues cu dia 26 December 2024, Timothy a yam’e y a bisa cu tur cos a bay bon. G.E.T. a bisa cu el a bisa Timothy come bon pa asina e saca tur e bolitanan. Na dado momento Wolff a yama G.E.T. y bisa cu Timothy a bira malo y ta sinta den baño y no ta haci nada. G.E.T. a bisa Wolff pa yama ambulance y despues G.E.T. a haya sa cu Timothy a fayece.
J.M.Z. a bay serca G.E.T. y bisa cu Recherche ta na su cas. G.E.T. a bisa J.M.Z. pa bay para e auto un caminda y e ta busca J.M.Z. y su amiga. G.E.T. a bay cu J.M.Z. y e pareha na su cas caminda el a splica nan pa nan prepara pasobra Polis lo detene J.M.Z. Un rato despues, Polis a bay na cas di G.E.T. y detene nan tur.
Fia placa na hende for den KIA: Hues a remarca cu en total G.E.T. a fia Timothy mas o menos 2.500 Florin. Hues a puntra, di unda G.E.T. a saca tur e placa aki siendo cu G.E.T. tabata sera.
Segun G.E.T. mientras cu e tabata sera den KIA, e tabata fia placa na hende y gana porciento. El a bisa cu hende tabata haci’e p’e.
Reclama cu ta set up di polis: Hues a mustra cu dia 26 December 2024, Polis a haya informacion cu un homber a muri door di guli bolita. A resulta cu Timothy a guli 42 bolita cu ta 504 gram y 2 bolita a kibra den su stoma. Investigacion di Polis ta mustra cu e pareha di Timothy, Wolff, a bisa cu Timothy sa bay busca droga na Medellin y bin bek. Wolff a sigui bisa cu ta di 3 biaha cu Timothy a bay busca droga y cu ta G.E.T. a mand’e.
G.E.T. a paga e dos promer viahenan y estadia. J.M.Z. a bisa Polis cu ta G.E.T. a pidi’e pa bay y vigila Timothy. J.M.Z. a bisa cu e no a yuda Timothy guli bolitanan. Na Polis G.E.T. a bisa cu e no tin nada di haci cu e caso aki.
Den Corte, G.E.T. a bisa cu bisa Hues y Fiscal cu loke e pareha di J.M.Z., e dama Sanchez a declara no ta berdad. El a bisa cu e no a bisa Polis nada riba e preguntanan. Segun G.E.T., ora el a haya su declaracion pa firma, el a constata cu Polis a yena un di e preguntanan, siendo cu e no a duna contesta. El a reclama esaki na e team di investigacion y nan a bay drech’e. Hues a confronta G.E.T. di un online-chat entre Wolff y G.E.T., caminda G.E.T. ta bisa Wolff pa “laga Timothy come pa saca nan mas liher posibel. Mester tin hopi hende.”
Hues a mustra cu tin chat entre Timothy y G.E.T, caminda ta papia di vueltanan pa Colombia.
Segun G.E.T., tur esaki ta un set up di Polis contra dje, pasobra Polis a coy cierto parti so di e chat pa laga mustra cu ta G.E.T. ta esun cu a manda Timothy. Fiscal a puntra G.E.T. pakico, despues di 9 luna sera, e ta tira culpa riba Polis di a set-up y cu ta Timothy su culpa cu el a guli bolita y fayece.
G.E.T. ta para riba cu e no tin nada di haci cu esaki y cu ta Polis a haci set up. G.E.T. a bisa cu e no tin confianza riba e team di investigacion.
Fiscal a exigi 10 aña di prison: Fiscal a bisa Hues cu dia 26 December 2024, Polis a bay na un cas caminda un hende a muri door di droga. El a guli 42 bolitanan y 2 bolita a scheur. En total 504 gram di cocaina. E pareha di Timothy, Wolff, a bisa cu ta G.E.T. a manda Timothy busca bolitanan. J.M.Z. mester a viaha cu Timothy pasobra G.E.T. no ta confia Timothy pasobra 2 biaha Timothy no a bin cu e bolitanan.
Den smartphone di Wolff a haya chat di Timothy cu G.E.T. caminda ta saca afor cu G.E.T. a manda Timothy bay busca droga. Fiscal a mustra cu na October, November y December 2024, Timothy a viaha pa Colombia. Fiscal a mustra cu na Juli 2025, J.M.Z. a wordo condena na 2 aña di prison. E pareha di J.M.Z., Sanchez, a bisa cu Timothy lo mester a bay busca droga y J.M.Z. mester percura pa Timothy guli tur e bolitanan pa G.E.T.
Fiscal a remarca cu despues di 9 luna, G.E.T. ta bin cu un storia no creibel cu Polis a traha un set up contra dje. Fiscal a bisa cu ta di lamenta cu G.E.T. ta culpa Timothy di cosnan y Timothy no tey pa defende su mes. Fiscal ta haya cu Timothy a guli bolitanan riba orden di G.E.T. y J.M.Z. mester a contola cu Timothy ta guli e bolitanan. Fiscal ta haya cu G.E.T. ta culpabel di traficacion di cocaina y tambe cu G.E.T. a causa morto di Timothy. Fiscal a mustra cu na 2021, G.E.T. tabata envolvi den un caso di droga caminda un mula a muri door cu bolitanan di droga a kibra den su stoma. Esaki no a pone G.E.T. stop. Fiscal a exigi 10 aña di prison pa G.E.T.
Abogado: Defensor mr. D. Croes a bisa Hues cu e ta haya cu mester declara G.E.T. liber pasobra G.E.T. no tin nada di haci cu e traficacion di droga. El a mustra cu e defunto Timothy mes a bisa den chat cu e ta un mula fiel di cocaina. El a mustra cu den chat Timothy ta mustra con el a hera muri cu droga. Timothy a pidi G.E.T. fi’e placa pa e bay Colombia. Timothy tabata den un situacion financiero fastioso y lo tabata debe otronan cu e mester a cumpli cu droga.
E abogado ta haya cu e team di investigacion di Polis, a formula declaracionnan pa mustra cu ta G.E.T. a manda Timothy bay busca droga. Segun e abogado, G.E.T. a pidi J.M.Z. pa compaña Timothy pa percura cu e biaha aki si Timothy ta logra pa asina Timothy cumpli cu su obligacionnan. Na opinion di abogado mr. Croes, no por saca ningun prueba cu tabata e intencion di G.E.T. pa Timothy busca droga p’e. Ta Timothy tabata kier a bay pa su mes pa drecha su situacion financiero.
E abogado ta haya cu no por tira culpa riba G.E.T. pasobra el a fia Timothy placa. El a mustra con Timothy tabata papia cu el a yega di guli bolitanan caba y trece Aruba. E abogado ta haya cu Timothy tabata conciente pa guli asina hopi bolita. E abogado a conclui cu G.E.T. no tin nada di haci cu e transporte di droga y e ta lamenta cu su amigo Timothy a fayece.
Hues a sera tratamento di e caso y a bisa cu e ta bay studia e caso y 24 October 2025 lo tin sentencia.
