Acusado mes tin 35 aña di edad
ORANJESTAD (AAN): Diabierna mainta e homber R. di 35 aña a presenta dilanti Hues pa scucha su sentencia den un caso di abuso di un mucha muher menor di edad. Hues ta haya R. culpabel di a abusa di e mucha y a confirma e exigencia di Fiscal. Hues a condena R. na 4 aña di prison.
Abuso di mucha: Dia 7 November 2025, tratamento di e caso a tuma lugar caminda Fiscal a acusa R., cu entre Juni 2024 y December 2024 a forza e mucha muher Z. di 12 aña tene relacion sexual. Tambe R. ta wordo acusa di a haci actonan inmoral cu e mucha.
Hues a puntra R. si ta berdad cu e tabatin relacion sexual cu e mucha Z. Segun R., e no tabatin relacion sexual cu e mucha. Hues a mustra cu Z. a declara na Polis cu e tabatin relacion sexual cu R.
Institito Forensico NFI di Hulanda a haci investigacion ariba muestranan cu Polis a manda y a haya muestra DNA riba paña di Z. y e chens ta grandi cu ta R. Tambe a haya muestra di sperma riba otro pañanan. Hues a remarca cu si R. ta bisa cu e no tabatin relacion sexual cu Z., con a haya semen di R. riba paña di Z.
- a bisa Hues cu el a topa cu Z. tabata yora. Z. a bis’e cu el a wordo maltrata y R. a bay consol’e. Segun R., el a papia cu Z. y na dado momento el a braza Z. y e lo a muha Z. su paña. R. a bisa cu e ta sinti berguenza pa esey. Hues a bisa cu Z. a declara cu e tabatin un discusion na cas y a sali for di cas y bay sinta banda di un piscina. R. a bay papia cu ne y Z. a bay sinta riba R. su scochi. Na dado momento R. a sinti ereccion y Z. a sinti esey.
Sospechoso ta nenga: Den un otro camber di e complex segun Z., R. a tene relacion sexual cu ne. R. a bisa Hues cu el a bay haci trabao pa e doño di e complex y ora el a caba el a bay cas. E ta desmenti di tabatin relacion sexual cu Z. Hues a mustra cu segun Z., R. a pidi’e pa sinta riba su scochi. R. a nenga esaki. R. ta para riba cu e no tabatin relacion sexual cu Z. El a bisa Hues cu e no ta e tipo di persona cu ta bay forza hende pa tin relacion sexual.
Hues a bisa cu Z. a declara cu R. a bis’e pa bras’e y no tin miedo. R. a nenga esaki tambe. Hues a bisa cu remarcabel ta cu Z. mes ta declara cu el a pone su mes disponibel pa R. Hues a mustra cu ta e mama D. a haci denuncia cu Z. a bis’e cu R. tabatin relacion sexual cu ne. Tambe Hues a bisa cu Z. a conta esaki na un amiga na scol y e amiga aki a bay bisa e trahador social.
FIscal a exigi 4 aña di prison: Fiscal a bisa Hues cu den e caso aki ta bisiña a abusa di Z.(12). Fiscal ta haya cu den e caso aki e declaracion di Z. ta confiabel y tin suficiente prueba di sosten. Na opinion di Fiscal, Z. a duna un declaracion hopi detaya con tur cos a sosode.
Fiscal a mustra cu Z. a declara cu 3 biaha e tabatin relacion sexual cu R. Fiscal a exigi 4 aña di prison pa R.
Sentencia: Diabierna mainta Hues a dicta sentencia y a bisa cu e ta haya cu e declaracion di e mucha muher Z. ta confiabel. Na opinion di Hues, Z. su declaracion a keda confirma cu investigacion cu Polis a haci. Hues a bisa cu e no ta kere R. cu R. no tabatin relacion sexual cu Z. Hues a sigui bisa cu e mucha Z. tambe a bisa cu tabatin violencia.
Hues ta haya legalmente proba, violacion y actonan inmoral cu un mucha bao di 16 aña durante 2 biaha. Hues a confirma exigencia di Fiscal y a condena J.R. na 4 aña di prizon.
Pa loke ta e demanda di daño di parti di e mama di Z. di 10 mil florin, Hues a aproba e demanda pero a calcula esaki na 8 mil florin.
