Hues ta haya tur dos culpabel
ORANJESTAD (AAN): Manera DIARIO a publica, Diabierna mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e homber Bryan Jimenez di 28 aña y e muher Jennifer Gonzalez di 39 aña.
Hues ta haya tur dos culpabel di e asesinato cruel di Sergio Maduro riba 24 December 2023. Ta asina cu Hues a baha e castigo exigi pa Fiscal, kende a exigi 18 aña pa Bryan Jimenez y 20 aña pa Jennifer Gonzalez.
Sentencia: Hues a cuminsa cu Bryan y a bisa cu Bryan ta culpable di asesinato cruel di Sergio Maduro riba 24 December 2023. Hues a bisa cu Bryan a admiti di a asesina Sergio y cu ta Jennifer a bis’e pa asesina Sergio.
Hues a bisa cu esaki ta un caso hopi serio y comunidad ta exigi pa duna castigo pisa. Hues a bisa cu pa cu e castigo mester tene cuenta cu diferente factor entre otro raport di psychiater. Psychiater ta haya Bryan menos responsabel pa loke el a haci y ta recomenda pa despues di castigo di prison, Bryan haya tratamento na Respaldo. Psicologo ta haya cu Bryan tambe tin un tipo di problema mental. Psicologo tambe ta conseha tratamento despues di castigo sinta y esaki bou guia Reclassering.
No por aplica tratamento obligatorio: Hues a bisa cu den su decision e ta sigui e pensamento di Psychiater y Psicologo esta cu Bryan ta menos responsabel. Sinembargo Hues a bisa cu e no ta sigui e conseho pa pone Bryan bou tratamento obligatorio TBS.
Hues a splica cu segun ley, TBS ta posibel pa castigo te maximo 6 aña di prison. Den e caso aki e castigo ta mucho mas halto.
Muher no a mustra duele: Pa Jennifer, Hues ta hay’e culpable di a provoca asesinato di Sergio y a haci promesa di paga. Hues a bisa cu Jennifer a keda nenga pero cu Bryan a admiti di a asesina Sergio door di necesidad di placa y cu Jennifer a priminti pago.
Bryan a pidi 2 mil Florin y Jennifer a bay di acuerdo. Jennifer a paga 150 Florin adelanta y a palabra cu despues di e asesinato Bryan lo haya e resto. Hues a mustra cu for di declaracion di Bryan por compronde cu Jennifer tabata kier prueba di e asesinato di Sergio promer cu e paga. Hues a mustra riba un cantidad di prueba entre otro cu Jennifer a bisa na diferente hende cu e kier mata Sergio pasobra e ta fada di e abusonan di Sergio.
Pa cu e castigo, Hues a bisa cu e ta tene cuenta cu Jennifer no kier a duna claridad riba e caso y tampoco Jennifer a mustra duele di loke el a haci. Hues a sigui bisa cu Psicologo a mustra cu Jennifer tin problema cu no por controla su emocionnan. Psicologo ta haya cu Jennifer ta menos responsabel pa su actonan y cu Jennifer mester haya guia di Reclassering.
Castigo: Hues finalmente a condena Bryan na 17 aña di prison y Jennifer na 18 aña di prison.
