Dialuna den sala di Corte Hues a palabra un fecha fiho
ORANJESTAD (AAN): Dialuna mainta a sigui cu e caso penal cu Ministerio Publico a cuminza contra Benny Sevinger pa kita 940 florin, a base di un investigacion financiero relaciona cu caso Avestruz.
Na Mei 2024, a cuminza cu tratamento di e caso caminda Fiscal a bisa Hues, cu a haci un investigacion financiero caminda ta demanda 940 mil florin, cu Sevinger mester paga bek. Fiscal a bisa cu lo por cuminza e caso pa evita cu e caso ta bira mucho bieu.
Caso posponi na Mei 2024: Abogado mr. Cock a bisa Hues cu e ta prefera pa warda te ora tin sentencia di Hof di Corte Superior riba e apelacion caso Avestruz. E abogado a bisa cu na Juli 2024 lo tin sentencia den caso apelacion Avestruz. El a bisa cu e no a haya chance di studia e rapportnan cu Ministerio Publico a manda, door cu e ta defende Sevinger den e apelacion Avestruz. Segun mr. Cock, den e promer sentencia, Sevinger a wordo declara liber di varios acusacionnan y e ta haya cu e suma menciona lo ta hopi leu di e realidad. El a pidi Hues pa mihor warda riba sentencia di Hof.
Fiscal a bisa Hues cu e no tin nada contra pa warda na Juli 2024 cu lo tin sentencia. El a bisa Hues cu for di April 2022, a presenta e demanda pa Sevinger paga bek y mr. Cock ta na altura. Na opinion di Fiscal, e caso no tin nada di haci cu Sevinger a wordo declara liber di malversacion. El a bisa cu tin investigacion cu ta mustra placanan cu Sevinger a haya. Hues a dicidi cu ta mihor pospone e caso pa 21 October 2024.
Caso lo ta Februari 2025: Dialuna mainta Benny Sevinger no a presenta den Corte. Ta solamente abogado mr. Cock a presenta den Corte. Tratamento di e caso no a dura hopi. A papia cu ainda no tin indicacion cu dia e apelacion den Casacion lo cuminza. Hues a bisa cu esey no lo bay stroba tratamento di e caso. El a puntra Fiscal si e ta presenta su rekisitorio. Fiscal a bisa Hues cu e ta haya cu e raport di investigacion ta hopi amplio y cu e ta haya cu ta abogado mr. Cock mester hiba su defensa.
Abogado mr. Cock a bisa Hues cu Fiscal ta persisti riba e calculacion pero Hues den Corte den Promer Instancia tabata pensa otro. Fiscal a remarca cu den Corte Superior a uza e mesun raport. Hues a dicidi cu lo cuminza cu un parti di intercambia di cartanan. El a bisa cu pa mas tarda 2 December 2024, mr. Cock mester manda su defensa pa Fiscal y Hues. Hues a bisa cu mas tarda dia 20 Januari 2025, Fiscal mester reacciona. Hues a fiha cu dia 28 Februari 2025 lo trata e caso.
