Fiscal a exigi 20 aña pa e muher y 18 aña pa e homber
ORANJESTAD (AAN): Awe Diabierna mainta Hues di Corte di Husticia ta dicta sentencia den e caso penal cu Ministerio Publico a cuminsa contra e homber Bryan Jimenez di 28 aña y e muher Jennifer Gonzalez di 39 aña.
Dia 6 September 2024 tratamento di e caso a tuma lugar caminda Fiscal ta haya Bryan culpabel di a asesina Sergio Maduro riba 24 December 2023 y cu Jennifer ta esun cu a bin cu e plan. Fiscal a exigi 20 aña di prison pa Jennifer y 18 aña di prison pa Bryan.
Asesinato cruel: Fiscal a bisa Hues cu e pareha aki ta envolvi den e asesinato cruel di Sergio. Investigacion ta mustra cu e homber P., kende a bay busca Bryan despues cu Bryan a asesina Sergio y pasa auto riba dje, tabatin e smartphone di Sergio.
E interogacion di P. a duna Recherche claridad cu ta Bryan a asesina Sergio riba peticion di Jennifer. Recherche a instala mike den e auto di Bryan y den un combersacion cu P., Bryan a conta con el a asesina Sergio y pasa auto riba dje. El a bisa cu ta Jennifer a pidi’e pa haci’e y cu el a haya 150 Florin adelanta di Jennifer y despues di entiero e lo haya e resto di e suma total di 2.000 Florin.
Asesinato premedita: Fiscal ta haya tur esaki ta un asesinato premedita. El a bisa cu tabatin un plan caminda mester a laga mustra cu ta un accidente a sosode y cu Sergio a fayece. A haya DNA di Bryan bao huña di Sergio cu ta mustra cu e rascanan cu Bryan tabatin na su braza ta di Sergio cu tabata lucha pa su bida.
Despues di a mata Sergio, Bryan a bay para e auto di Sergio banda di un scol na Noord. Fiscal a mustra cu Bryan a bisa tur cos con Jennifer a pidi pa asesina Sergio y door cu Bryan tabatin mester di placa pa paga alimentacion di su yiu na Hulanda, el a pidi 2 mil Florin.
Acusado muher ta gaña: Fiscal ta haya cu Jennifer ta gaña di “no a haci nada” y tira tur culpa riba Bryan. Fiscal a bisa cu tin testigo a mira Bryan y Jennifer den auto riba 24 December 2023. Fiscal a mustra cu tin hende a bisa cu Sergio den pasado a yega di declara cu Jennifer ta blo mira peliculanan di asesinato na television y ta kere cu Jennifer kier laga mat’e.
Fiscal a sigui bisa cu tin diferente hende a bisa cu Jennifer a bisa cu e ta fada di Sergio y cu e kier mat’e. Na opinion di Fiscal, Jennifer no a laga esaki na papia so sino a haci’e tambe door di pidi Bryan, kende a asesina Sergio na un forma cruel. El a sigui bisa cu Jimenez y Jennifer a bay check si tin placa riba cuenta di Sergio via ATM Machine pero no a haya nada. Fiscal a mustra cu Jennifer ta keda desmenti di a planea e asesinato di Sergio pero tur e otro testigonan y hasta e sospechoso Bryan ta mustra cu Jennifer ta envolvi.
Fiscal a bisa cu pa cu e castigo tene cuenta cu e raport di psychiater y raport di psycologo di Bryan y Jennifer. Fiscal ta haya cu Bryan y Jennifer a asesina Sergio pa nan mesun interes.
Fiscal a exigi 18 aña di prison pa Jimenez y 20 aña di prison pa Jennifer. Awe lo scucha Hues su sentencia y DIARIO lo informa lectornan kico tur a pasa den sala di Corte di Husticia di Aruba.
