Caso den Corte
ORANJESTAD (AAN): Apesar cu e homber O.A.H. di 45 aña ta bisa cu e no ta corda nada pasobra e tabata burachi, Fiscal ta hay’e culpabel di a hinca e ciudadano di inicial G. entre 8 y 10 biaha den Cas Casuela na Tanki Leendert, y a exigi castigo combina. Hues a mustra cu riba video di siguridad ta mira O.A.H. ta haci movecionnan di hinca pero no ta mira kico el a uza. Hues a tambe a condena O.A.H. na castigo combina pero menos cu loke Fiscal a exigi.
Intento di Mata: E acusacionnan cu Fiscal a presenta den Corte contra O.A.H. ta di intento di mata e ciudadano G. door di a hinc’e diferente biaha cu un arma y a maltrata cu arma e homber K. riba 18 October 2025. Tambe Fiscal a pidi Hues pa ehecuta e castigo condicional di 5 luna contra O.A.H. ya cu el a haci e hincamento den su tempo di prueba.
Hues a bisa cu el a haya for di Fiscal videonan di siguridad di e club nocturno caminda ta mira con e hincamento a sosode. Abogado mr. Canwood a bisa Hues cu el a haya e videonan laat y no a haya chens pa studia nan debidamente. Hues a bisa cu ta importante pa pasa e videonan pa mira con e hincamento a sosode. A pasa e videonan den Corte, caminda ta mira bon cla O.A.H. ta haci movecionnan di hinca riba e victima G.
E incidente a sosode na Cas Casuela. Hues a puntra O.A.H. kico a sosode. O.A.H. a bisa cu e dia ey el a haci un fayo door di sali cu e homber K. Nan a bay dal un ronchi. El a bisa Hues cu e no ta corda mucho bon. El a bisa cu nan a bebe hopi bebida mezcla. For di tempran a cuminsa bebe.
Segun O.A.H., e promer impresion cu e tabatin ora el a recobra conocemento, tabata cu nan a bringa. El a bisa cu ora el a lanta, e tabatin corta na su elleboog, sla na curpa. El a bisa cu e no sa cu kende el a bringa. Segun O.A.H., ta ora el a wak e video el a mira cu kende el a bringa. Hues a bisa cu riba e video por mira O.A.H. ta habri algo cu su boca y despues a tene esaki na su man y bay riba G. y tabata hinca diferente biaha cu forza.
Despues di a mira e video den sala di Corte, Hues a puntra O.A.H. kico e tin di bisa. O.A.H. a bisa cu e no tin nada di bisa. Hues a bisa cu por mira cu e anochi tabata druk y un homber a pusha un otro homber y e ora ey tur cos a sosode.
Diescuatro aña di su bida a pasa den prizon: Hues a remarca cu den transcurso di añanan, O.A.H. tin en total 14 aña sera. Tin casonan di droga y intento di mata. Den e caso aki, O.A.H. tabata den su periodo di prueba caminda tin 5 luna condicional tabata colga riba su cabez.
Hues a puntra pakico O.A.H. ta blo cay den man di husticia asina. Hues a bisa cu riba camera no ta mira O.A.H. ta hinca K. Ta na Polis K. a bisa cu O.A.H. lo a hinc’e.
Kico a uza pa hinca: Ta asina cu e victima G. a bay Servicio di Emergencia na Hospital pa tratamento y e mesun dia e por a bay cas. K. tabatin un corta bou di un wowo. Hues a bisa cu no por saca afor si H. a hinca cu un cuchiu, un sambechi of un yabi di auto.
Pa colmo, Hues a bisa cu apenas na Augustus 2025, O.A.H. a sali liber for di KIA y na October 2025 e ta bolbe cay sera. Awor Fiscal ta exigi pa O.A.H. haya e castigo condicional di 5 luna riba e castigo anterior cu e mester haya. Hues ta haya cu ta hopi straño cu diripiente O.A.H. ta explota den rabia y hinca e ciudadano G. Riba pregunta di abogado, O.A.H. a bisa cu na Cas Casuela, miembronan di siguridad a listra tur hende promer cu drenta.
Fiscal a exigi 18 luna di prizon: Fiscal ta haya legalmente proba cu O.A.H. a hinca e ciudadano G. diferente biaha cu algo skerpi. Fiscal a mustra cu por mira cu O.A.H. ta habri algo cu su boca y despues ta keda hinca G. diferente biaha y cu forza. Ta asina cu O.A.H. tambe tabatin corta na su curpa. Fiscal ta haya cu mirando e hincamento, no por bisa cu ta intento di asesinato. El a mustra cu O.A.H. a hinca e homber G., 8 pa 10 biaha y Fiscal ta considera esaki un intento di maltrato severo. Fiscal a bisa cu e ta exigi pa declara O.A.H. liber di a maltrata e homber K.
Pa cu e castigo, Fiscal a bisa cu e ta tene cuenta cu carchi di castigo di O.A.H., kende a haci e delito aki durante su tempo di prueba. Fiscal a exigi 18 luna di prizon di cual 6 luna ta condicional cu un tempo di prueba di 3 aña. Fiscal a exigi pa pone acerca e 5 lunanan condicional. Pues e lo bira 17 luna di prizon cu O.A.H. lo mester sinta den KIA. Fiscal ta haya cu lo ta bon pa O.A.H. cay bou guia di Reclassering pa haya gui riba controla agresion.
Abogado: Abogado mr. Canwood a bisa Hues cu O.A.H. ta admiti di tabata envolvi den bringamento pero ta desmenti di a hinca. E abogado a bisa cu na Cas Casuela, miembronan di siguridad a listra tur hende. E abogado a bisa cu por mira riba video movecionnan di hincamento pero no ta mira si tabatin hincamento. Mr. Canwood a bisa cu e ta comparti punto di bista di Fiscal cu no por considera esaki un intento di asesinato. E abogado ta haya cu maltrato severo no ta proba. E abogado ta haya cu tabata un pelea cu varios hende envolvi.
No por mira si O.A.H. tabatin un cuchiu, sambechi, boter kibra of yabi di auto. Na opinion di abogado, e homber G. no mester a wordo cosi pa e heridanan. Esey ta nifica cu no tin heridanan serio y no por papia di intento di maltrato severo. Hues a remarca di unda abogado ta bisa cu no tin cosemento. Na opinion di Hues, ta un hecho cu tin verband pa tapa heridanan pa evita infeccion. Abogado a bisa Hues cu normal for di hospital lo mester tin skirbi cu tin cosemento y potret di e cosemento. Abogado a bisa Hues pa tene cuenta cu casi 20 aña, O.A.H. no a cay den man di husticia. E abogado ta kere cu e problema di O.A.H. ta uzo di alcohol y no problema di agresion manera Fiscal ta bisa.
Sentencia: Hues a sera tratamento di e caso y a dicta sentencia di biaha. Hues a remarca cu tanto Fiscal como abogado ta bisa cosnan cu no por mustra. Hues ta haya cu e ciudadano G. a bisa cu el a wordo agredi y a sufri varios corta y hinca. Por mira riba video di siguridad cu O.A.H. tabata haci movecion di hinca. Esey ta mustra cu O.A.H. tabatin algo skerpi den su man. E pregunta ta, kico O.A.H. a uza. Na opinion di Hues, no tin ningun indicacion kico O.A.H. tabatin den su man. No tin informacion con hundo e heridanan ta. Tur esaki ta haci cu no por bisa cu ta maltrato severo.
Hues a declara O.A.H. liber di intento di mata y di intento di maltrato severo. Hues ta haya O.A.H. si culpabel di maltrato cu arma. Hues tambe a bisa cu ta preocupante cu for di nada, diripiente O.A.H. a cuminsa hinca.
Hues a condena O.A.H. na 10 luna di prizon di cual 3 luna condicional cu 2 aña di prueba y bou guia di Reclassering. Hues a bisa cu Reclassering lo mester wak si O.A.H. mester sigui curso pa agresion y uso di alcohol. Hues a bisa cu di e 5 luna condicional, lo pone 2 luna acerca di e castigo. En total, O.A.H. mester sinta mas 12 luna y en total 6 luna condicional.
Ta asina cu ya caba O.A.H. tin 6 luna sera den KIA.
