Ministerio Publico a pidi un reunion cu nan
ORANJESTAD (AAN): E acusadonan: Benny Sevinger, Pieter Susebeek y Leoncita Arends, a wordo invita pa bay Ministerio Publico pa un reunion cu e hefe Fiscal. Esaki ta relaciona cu e hecho cu e periodo di 9 dia pa reacciona riba e decision di Corte Supremo a pasa y awor mester ehecuta e sentencia di Corte Superior.
Dia 14 April 2026, Corte Supremo (un constelacion di 6 Hues) na Hulanda, a dicidi cu e apelacion di Benny Sevinger, Pieter Susebeek y Leoncita Arends contra su condena di Corte Superior ta keda rechaza. Corte Supremo a bisa cu e castigonan di Corte Superior mester wordo ehecuta.
Esey ta nifica cu Benny Sevinger ta keda condena na 4 aña di prizon di cual 1 aña ta condicional. Ademas a prohibi Benny Sevinger pa 6 aña largo no por haya trabao den Gobierno y tampoco por postula su mes como candidato di organonan representativo.
Maria Leoncita Arends ta keda condena na 2 aña di prizon di cual 1 aña ta condicional cu un tempo di prueba di 3 aña.
Pieter Susebeek y ta confirma e castigo di Hof di Corte Superior. Pieter Susebeek ta keda condena na 30 luna di prizon di cual 10 luna ta condicional cu un tempo di prueba di 2 aña. E 1.3 Miyon Dollar lo keda confisca.
Mester bay KIA: Siman pasa, e periodo di 9 dia a transcuri y esey ta nifica cu e tres acusadonan mester bay sinta nan castigo den KIA. Ta asina cu e abogadonan a haya e carta di Ministerio Publico caminda ta invita nan pa un reunion pa asina palabra e dia y ora cu Sevinger, Susebeek y Arends mester meld na KIA pa sinta nan castigo.
