Mientras cu dos a wordo declara liber
ORANJESTAD (AAN): Diahuebs mainta Hues a trata e caso penal contra 5 persona, kendenan ta wordo sospecha di ta forma parti di un gang na San Nicolas. Di e 5 personanan, solamente uno a presenta. Hues a declara tres di e sospechosonan liber y a condena 2 na castigo combina.
Un sospechoso so den Corte: E acusacion cu tin ta contra e hombernan S.R., J.M., J.E.M.L., C.G. y G.D.M., kendenan ta wordo acusa cu riba 15 Februari 2025, nan a maltrata un homber C. door di dal e y scop e na su curpa y cabez. Ta asina cu solamente J.M. a presenta.
Abogado mr. Shoekander a presenta y a pidi Hues pa pospone e caso pa asina por contact e otronan. Hues a cuestiona cu e abogado a tarda hopi promer cu a busca contacto cu e sospechosonan y Hues no ta mira motibo pa pospone e caso. Hues a mustra e abogado cu Corte di Husticia y Ministerio Publico ta haci un planning completo pa trata caso y no por ta posibel cu no a contact tur e sospechosonan na tempo. Hues a bisa cu Griffier a mustra cu S.R. no a haya e citacion na su adress. Esey tabata motibo pa Hues a pospone su caso. E otro casonan si a sigui sin cu e otronan no a presenta.
Pelea na Jouvert Morning: Hues a mustra cu segun e raport di Polis, nan a bay 6’or di mainta banda di un snack na San Nicolas, caminda tabatin un pelea di gang. A resulta cu e gang di Cayenastraat lo a bati e homber C. di e gang di Village. Segun J.M. el a bay pa para e pelea. El a bisa cu e tabata kita hendenan for di otro. Hues a mustra cu Polis a mira cu J.M. y un otro a dal C. y despues e gang a scop C. Tambe tabatin un otro persona cu tambe a wordo maltrata pero e no a haci denuncia.
Hues a mustra cu e victima C. a bisa cu J.M., J.E.M.L. y K. a dal’e. Ta asina cu J.M. ta para riba cu e no a bringa. Hues a menciona diferente otro persona cu a menciona cu J.M. tambe tabata envolvi. Hues a bisa cu J.E.M.L. y C.G. a admiti pero G.D.M. a nenga. Hues a bisa cu G.D.M. a declara cu e tabata trahando. Pero tin otro ta bisa cu G.D.M. tabata envolvi.
Hues a bisa cu despues di e pelea aki tabatin un tiramento na un otro lugar.
Pakico pelea di gang y tiramento: Hues a remarca cu e kier sa pakico tabatin pelea di gang y pakico tiramento. Pakico ta forma un gang. J.M. a bisa Hues cu en realidad no ta un gang sino mas bien ta un famia ta biba den Cayenastraat. Hues a hala J.M. su atencion pa no ple kens y sea ta duna contesta of keda keto. J.M. a bisa Hues cu esnan hoben hopi biaha tin problema cu otro y e problema ta cuminsa na school caminda nan ta topa otro.
Hues ta haya cu esaki ta sin sentido. J.M. a bisa cu e tabata forma parti di e gang pero el a sali y a cambia su bida. Awor e tin trabao y tin famia. Hues a bisa cu J.E.L.M. no tin trabao y tin carchi castigo cu atraco cu violencia na 2021. C.G. tambe ta sin trabao y tin un caso intento di mata.
Fiscal: Fiscal a bisa Hues cu e ta haya cu riba 15 Februari 2025 tabatin e pelea y cu J.M. tabata envolvi. Na opinion di Fiscal, tin declaracion di S.R. y dos agente di Polis cu a mira J.M. tabata envolvi den e pelea. E agentenan a bisa cu nan a mira cu J.M. y otronan a rondona C. y a maltrat’e. Fiscal ta haya tur e 5 sospechosonan ta culpabel. Fiscal a remarca cu tabatin problema di gang cu ta bringa cu otro y despues tabatin tiramento. Esaki net ora di Jouvert Morning.
Fiscal a sigui bisa cu pa cu e castigo, e ta tene cuenta cu J.M. ta promer biaha cu e ta cay den man di husticia. El a sigui bisa cu tur e otronan, cu excepcion di S.R. tin carchi di castigo. Fiscal a bisa cu no ta conoci kico ta e heridanan cu C. a sufri. Fiscal a exigi pa J.M., 3 luna di prizon di cual 78 dia ta condicional cu 2 aña di prueba. Tambe Fiscal a exigi 120 ora di trabao pa comunidad pa J.M. Pa e otronan, Fiscal a exigi 4 luna di prizon di cual 108 dia ta condicional cu 2 aña di prueba y 200 ora di trabao pa comunidad.
Abogado: Defensor mr. Shoekander a bisa Hues cu J.M. tabata na e pelea pero e no a bringa sino a kita esnan cu tabata bringa for di otro. Abogado a bisa cu J.M. tin curpa grandi y si el a dal C., lo tabatin dañonan hopi mas serio. E abogado ta haya cu no tin indicacion specifico cu J.M. a bringa. El a remarca cu hendenan a mir’e eynan.
E abogado a bisa cu J.M. tin un trabao y tin un famia. El a pidi Hues pa declara J.M. liber. E abogado a representa C.G. tambe y a bisa cu C.G. awor tin un trabao y no ta mete den gang mas. E abogado no ta haya na su lugar pa bolbe sera C.G. y causa cu e lo perde trabao.
Sentencia: Hues a sera tratamento di e caso y a dicta sentencia di biaha. Hues a mustra cu C.G. y J.E.M.L. a admiti pero G.D.M. a bisa cu e no tabata eynan y a mustra cu e no tabata eynan. Hues a declara G.D.M. liber. Hues a bisa cu e caso di J.M. ta complica. Polis ta bisa cu a mira J.M. pero J.M. ta bisa cu e tabata eynan pero tabata kita e hendenan for di otro.
Hues ta haya cu tin duda si realmente J.M. a dal C. Na opinion di Hues, e declaracion di e agentenan di Polis no ta suficiente detaya. Hues a declara J.M. liber.
Hues a condena C.G. y J.E.M.L. na 102 dia di prizon, kitando e 12 dia cu nan tabata sera. E 90 dianan ta bira condicional cu un tempo di prueba di 3 aña.
