Durante 3 aña el a abusa di un mucha muher menor di edad
- Abusador tin di paga 25 mil Florin tambe
ORANJESTAD (AAN): Imaginabo cu e amigo di abo y bo pareha ta bin bo cas, y e ta dicidi na abusa di bo propio yiu? E homber acusado di inicial M. a scucha Hues conden’e na 5 aña di prison pasobra e tabata abusa di un mucha muher menor di edad.
Abusa di mucha durante 3 aña: E homber M. tabata amigo di e mayornan di e mucha muher y na Aruba y Hulanda e tabata abusa di e mucha sin cu e mayornan tabata sa. Ta na Hulanda, na dado momento, e mucha a bisa su mayornan cu M. tabata abusa di dje pa un periodo largo.
E mayornan a haya un shock ora nan yiu a conta nan kico e amigo di cas, M., tabata haci cu nan yiu. Nan a haci denuncia na KZP na Aruba y di biaha a bay detene M. y cuminsa cu un investigacion. Investigacion a mustra cu entre September 2019 y October 2022, M. tabata abusa y penetra e mucha sin cu e mayornan tabata sa. Investigacion tambe e mustra cu M. ta autista y tin otro problema di discapacidad.
Castigo: Den su sentencia Hues a bisa cu e ta haya legalmente proba cu entre September 2019 y October 2022, M. tabata haci actonan inmoral y penetra e mucha muher menor di edad na Aruba y na Hulanda.
Hues a bisa cu durante 3 aña, M. a abusa di e mucha muher. Hues ta haya cu M. a tacha severo e integridad di e mucha. Esaki por afecta e mucha. Hues a bisa cu casonan asina ta causa intrankilidad den comunidad.
Hues a mustra cu pa cu e castigo, e ta tene cuenta cu psycologo a constata cu M. ta autista y otro problema mental. Na opinion di psycologo, M. pa un parti no ta responsabel pa su actonan. Hues tambe a bisa cu durante tratamento di e caso M. a mustra cu e ta arepenti y a admiti su culpabilidad. E victima a haci demanda di daño inmaterial di 25 mil florin y Hues ta haya cu e demanda ta na su lugar.
Hues a condena M. na 5 aña di prison y cu M. lo mester paga e daño material di 25 mil florin.
