Den caso di tiramento riba auto pafor di Olde Molen
ORANJESTAD (AAN): E hoben A.S.H. di 19 aña riba Diabierna mainta a scucha Fiscal exigi 4 aña y 6 luna di prison p’e. Fiscal ta haya A.S.H. culpabel di intento di mata y posecion di diferente arma di candela. Abogado mr. Griffith a bisa Hues pa tene cuenta cu tempo cu A.S.H. a tira e tabatin 18 aña y pa aplica e ley hubenil. Tambe e abogado a bisa cu A.S.H. no a tira intencional pa herida sino a actua den defensa propio. Den e articulo aki, DIARIO ta publica e punto di bista di abogado y den un otro articulo, e exigencia di Fiscal.
Acusado no a tira intencional: Despues di a scucha e exigencia di Fiscal, mr. Griffith a bisa Hues cu e tempo ey A.S.H. apenas tabatin 18 aña y a bay sali cu su ruman cu a haci 17 aña. Nan a bay Gusto Night Club. Na dado momento un homber ta pasa dilanti nan y bisa “bala tin pa boso”. Na opinion di e abogado, esaki ta un amenaza directo contra nan. Envez di reacciona riba e menaza, nan a bay for di e lugar. Esey ta mustra cu A.S.H. no kier tabatin ningun confrontacion. Nan a bay na Olde Molen para pafor pa sigui celebra. Na dado momento e mesun homber ta sali y na forma amenasante ta pasa nan dilanti y a bisa: “ ora mi lora bek, mi lo bay tira”.
E momento ey A.S.H. a cana bay y no a busca confrontacion contra e homber aki. E tabata busca manera di evita problema. E homber a lora bek, para su auto dilanti Molen, manera el a. A.S.H. a scucha un sonido duro y a mira tur hende core bay. El a kere cu lo a los un tiro y cu e menaza di e homber a bira realidad. Esey a haci cu A.S.H. a hay’e obliga pa tuma accion pa para e menaza e momento ey. El a haya un arma y a usa e arma y los 1 tiro pa stop e menaza. E tabata convenci pa stop e homber. 17 November 2023, A.S.H. ta wordo deteni y el a coopera cu investigacion.
Actua den defensa propio: Segun abogado, A.S.H. no tabatin ningun momento e intension pa herida hende cu arma di candela. E no a sali for di cas pa bay tira. El a sali for di cas pa bay fiesta cu su ruman homber y su omo e cumpleaños di su ruman homber. E tiro cu A.S.H. a tira no tabata pa herida ningun hende. E no ta haya cu A.S.H. a tuma riesgo pa herida of mata hende. A bogado ta haya cu mester declara A.S.H. liber pa e delito aki. El a bisa Hues cu ningun caminda por mira cu e tiro tabata dirigi pa causa herida. E tiro no a alcansa e auto.
E abogado a bisa cu aki mester papia di defensa propio. Tabata reina menaza serio di parti di e homber na dos ocasion. Na Molen, e homber a cumpli cu loke el a bisa esta: “ora mi lora bek, bala lo cay”. Ora A.S.H. a scucha un sonido duro cu el a interpreta esaki como un tiro y a mira hendenan core, el a actua pa defende su ruman cu e momento ey tabata entre e hendenan. Na momento cu el a tira, e auto a core bay.
Pa loke ta posecion di arma, e abogado ta laga esaki na decision di Huez. El a pidi Huez pa aplica castigo hubenil, mirando cu A.S.H. tabatin 18 aña of duna castigo igual na loke A.S.H. a sinta caba.
Despues di a scucha tanto Fiscal como abogado den nan reaccion, Hues a cera tratamento di e caso y a bisa cu e ta bay studia e caso y dia 15 November 2024 lo tin sentencia.
