Caso Peasch cu a tira su primo mata lo ta na Juni 2026

Hues a dicidi den caso Pro-Forma

• Acusado casi no kier papia mas di loke a pasa na Coba Lodo 

ORANJESTAD (AAN): Siman pasa Diabierna den oranan di merdia, Corte na Aruba a sigui cu forma di atende ‘pro forma’ den e lamentable caso caminda e homber Israel Jesus Paesch di 40 aña a tira su primo Rene Paesch mata net dilanti cura di cas di Israel na Coba Lodo riba un Diasabra, 23 Augustus 2025.

   E Diasabra mainta ey, pa 6:07 am Polis a haya notificacion cu tin tiramento andando na Coba Lodo, y mesora varios patruya di Santa Cruz a mobiliza pa eynan, hunto cu Recherche.  Despues mas yamada a drenta pa indica, cu abao dilanti cura di e cas, tin un homber benta abao pecho na halto cu no ta reacciona.

   E prome unidad di Polis cu a yega na e adres Coba Lodo 2-C, enberdad a bin haya un motorcycle benta abao banda di caminda, y como 2 meter dilanti porta di garage, tin un homber benta abao cu short cora bisti.  E persona cu golpi y cabez tur na sanger no tabata reacciona.

   Ambulance tambe a yega, y Paramediconan a core bay check e persona eybao, cu herida pisa na su cabez pero e no tin ningun señal vital mas.  E victima a wordo identifica como Rene Paesch, y ta conoci cu e tin un eterno conflicto cu su primo yama Israel Paesch, kende ta como 5 aña mas grandi cu ne.  Pero e no tabatey mas na e cas ora cu Polis a yega.  Autoridad a confisca e motorcycle benta abao cu cual Rene a yega na cas, y tambe un Suzuki Swift cu tabata staciona net paden di porta di cura.

   E mesun Diasabra atardi ey na bahada di solo, Recherche di Santa Cruz a acudi na e mesun cas na Coba Lodo y aki e sospechoso Israel Paesch a entrega su mes.  Autoridad a nota cu su cara ta yena cu monton di golpi, pero su aresto a bay trankil y facilmente a pone boei na su mannan.  Recherche conoce e primonan Paesch aki basta bon, debi na e hecho cu nan a yega di ricibi den pasado castigo di prizon pa varios crimen cometi.  Ta parce cu ta mesun crimen aki lo a pone cu e conflicto entre Israel y su primo Rene a keda escala, di cual uno ta keda acusa e otro.

   E cara tur na bolombonchi di Israel a bin debi na e hecho cu Rene a dal e masha mahos mes riba parkinglot di Lekker Bar & Restaurant na Noord e mesun Diasabra marduga ey, pues algun ora prome cu e crimen a wordo cometi.

   Interogacion di 2 testigo ta cla: Diabierna siman pasa, den sala di Corte tabata presente e ruman muhe di e victima. E acusacionnan cu Fiscal a presenta contra Israel Paesch ta cu riba 23 Augustus 2025, el a tira su primo Rene Paesch mata. Tambe cu Israel Paesch tabata den posesion di un arma di candela y tabata den posesion di cocaina.

   Abogado mr. Arends Marchena ta defensora di Paesch. Hues a bisa cu dia 4 December 2025 tabatin un sesion Pro-Forma y a palabra cu lo tin e procesverbaal cla, y awor na Maart ya tin procesverbaal. Tambe Hues a bisa cu awor tin un raport di psicologo y psychiater. Tambe cu tin dos testigo cu a wordo scucha na Hues Comisario.

   Security video y audio-clip: Fiscal a bisa cu e bada-bada y pelea algun ora prome na Noord, a wordo capta door di Security Video di Lekker Bar & Restaurant, y un otro lugar caminda lo por mira Paesch. Hues a pidi Fiscal pa ta bon pa specifica e imagennan riba e videonan cu e ta haya interesante.

   Ademas di esey, Hues a pidi abogado mr. Arends-Marchena pa e tambe specifica kico di parti abogado ta interesante riba e videonan.

   Lo no playback video den Corte: Hues a bisa cu e no ta haya cu lo ta ideal pa bay pasa videonan den Corte.

   Hues sinembargo a bisa cu tin idea di bay scucha grabacion di sonido. Hues a puntra Fiscal si encuanto investigacion forensico di un huls cu a haya den e Suzuki Swift confisca. Fiscal a bisa cu e lo averigua esaki.

   Acusado no kier papia mas: Durante e session di Pro-Forma, Hues a bisa cu tabatin planea un di tres interogacion di parti di Polis, pero Paesch a bisa cu e no ta bisa nada mas ni awor y tampoco despues.

   Hues a puntra Israel Paesch, si acaso e lo bay contesta preguntanan durante tratamento di e caso. Paesch a bisa Hues cu ainda e incidente ta traha riba dje y e no kier bay recorda mas loke a pasa.

   Hues a bisa cu e ta compronde cu e caso ta dramatico pero cu durante tratamento di e caso e lo bay haci preguntanan caminda e kier haya claridad. Paesch a bisa cu ta depende kico e lo wak si e lo papia.

   Caso lo dura henter un dia: Riba e pregunta di Hues na Fiscal, cuanto e ta calcula cu su requisitorio lo bay dura.  Aki Fiscal di Ministerio Publico a bisa Hues cu e ta calcula cu e tratamento di e caso lo bay tuma un dia of mas. E ta calcula cu su requisitorio lo bay ta 30 minuut.

   Posteriormente Hues a puntra mr. Arends-Marchena cuanto e ta calcula su defensa lo bay tuma.  Aki na su turno, mr. Arends-Marchena a bisa cu entre 30 y 45 minuut su defensa lo bay dura.

   Hues a bisa cu e ta planea pa mainta trata e caso completo y merdia lo ta requisitorio y defensa. Hues a stipula e fecha di Diabierna 19 Juni 2026 pa tratamento di e caso.

   E ruman muhe di e victima a bisa cu e kier haci uso di e derecho di expresa su mes y Hues a bisa cu lo tene cuenta cu esey.