Sospechoso treci bao vigilancia extremo den Corte
ORANJESTAD (AAN): E rumannan homber J.L. di 24 aña y D.L. di 20 aña, riba Diabierna mainta a scucha Fiscal exigi 6 aña di prison pa nan. Fiscal ta haya nan culpabel di complice di intento di mata y complice di posesion di arma di candela y bala. Tur dos ruman ta para riba cu nan no a tira riba Zuriel Celaire. Nan a reclama cu nan no a tende nada di e menaza serio di Zuriel Celarie contra nan.
Vigilancia pisa pa Zuriel Celaire: Diabierna mainta e sospechoso di menaza Zuriel Celaire, a wordo hiba Corte bou vigilancia estricto. Zuriel Curiel a wordo condena pa e tira mata di Sayuri y aña pasa el a bolbe Aruba y ya caba tin caso serio cu e ta envolvi aden.
Den e caso aki, e ta victima di e tiramento. Na Corte a busca un oficina separa caminda via video conference e tabata wak e caso. Na Corte a tuma medidanan di seguridad pa evita cualkier problema cu lo por surgi.
Tiramento na Cura Cabay: Fiscal ta acusa e rumannan J.L. y D.L. cu 18 September 2025 a tira riba Celaire. Fiscal ta considera esaki complice di intento di asesinato, subsidiario complice di intento di mata. Tambe Fiscal a acusa e rumannan di posesion di arma di candela y bala.
Hues a puntra J.L. si e ta envolvi of no. Hues a mustra cu na Polis J.L. a bisa cu e no tin nada di haci cu e caso aki. Segun J.L., e no ta envolvi pasobra e mainta ey el a bay cu su mama dokter. Hues a mustra cu Polis a puntra e mama riba esaki y e mama a bisa cu e no a bay cu J.L. dokter. Segun J.L. door cu su mama no a bay cun’e, el a bay cu e auto. Hues a puntra J.L. pakico el a bisa asina anto na Polis! Segun J.L. el a bisa Polis cu e lo a bay cu su mama. E ta kere cu Polis lo a compronde malo. Hues a bisa cu Polis ta kere cu J.L. ta envolvi den e tiramento. E victima Celaire a bisa Polis cu despues di e tiramento, via via el a tende cu J.L. y D.L. a tira dje. Celaire no kier bisa kende a bis’e esey. El a bisa cu den pasado e tabatin problema cu hendenan na Noord y e tiramento aki lo por tin di haci cu esey.
Hues a sigui bisa cu e di dos motibo cu Polis ta kere cu J.L. ta envolvi ta, door di videonan cu a haya di e lugar caminda a tira. Tambe di e cas caminda J.L. ta keda na San Nicolas. Tambe tin imagennan di e auto Nissan color blanco cu tabata core tras di esun di Celaire. E auto a bay core banda di esun di Celaire y for di e banda di pasahero, un persona cu tabatin cara tapa, a tira riba e auto di Celaire. Ta asina cu J.L. ta para riba cu e no tin nada di haci cu e tiramento. Hues a mustra cu for di un otro persona tambe ta mustra cu J.L. ta envolvi den e tiramento riba Celaire. Hues a bisa cu anterior J.L. a bisa cu e no sa kende Celaire ta y despues a bisa cu e conoce e nomber pero no e persona.
Sospechoso ta nenga: Hues a mustra cu riba video por a mira cu e auto Nissan blanco, mas o menos 5 minuut despues di e tiramento, ta para dilanti un cas na San Nicolas y e chauffeur ta cana bay na un cas. E persona cu a sali for di e auto ta J.L. Segun J.L. el a fia e auto di un amigo. Hues a puntr’e kende e amigo ta. J.L. a bisa cu e no ta bay menciona nomber pasobra e no kier pa e persona ey ta hay’e den problema.
Hues a mustra cu e homber B. a declara na Polis cu el a fia J.L. e auto Nissan Versa color blanco. Segun J.L., e no conoce B. Hues a mustra cu J.L. a declara na Polis cu el a fia auto for di B. y a entrega e auto dia 16 September. Hues a bisa cu B. a declara cu J.L. a entrega e auto dia 18 September anochi.
Hues a mustra cu riba video di seguridad ta mira cu J.L. y D.L. ta sali den un Toyota for di un cas. Segun J.L., e tabata hunto cu un amigo y su ruman D.L. Hues a bisa cu tin video caminda ta scucha e tironan na Cura Cabay.
Hues a puntra D.L. si e ta envolvi. D.L. ta desmenti di ta envolvi. El a bisa cu el a hiba su amiga traha y despues el a bay cas y no a sali mas. Hues a bisa cu Polis tin sospecho pasobra e victima Celaire a bisa cu el a tende cu D.L. y su ruman J.L. a tira riba dje. Hues a bisa cu D.L. tabatin problema cu Celaire na April 2025. D.L. a bisa Polis cu Celaire lo tabata manda mensahe di menaza den direccion di D.L. Hues a mustra tambe cu Polis tambe a sospecha di D.L. door di a mira video caminda a tira riba e auto di Celaire. Hues a bisa cu segun Celaire, el a tende cu J.L. y D.L. tabata envolvi den e tiramento riba dje.
Hues a bisa cu un tal Zulu a bisa Polis cu D.L. a puntr’e si e ta kere cu Celaire a pensa cu D.L. lo a tira riba Celaire. D.L. a desmenti esey. El a bisa Hues cu despues di e incidente di April 2025, el a topa cu Zulu pero e no a papia nada di e problema. Hues a bisa cu Zulu a bisa cu D.L. lo a bisa cu nan tabata core tras di e auto y na altura di un supermarket na Brazil, a tira riba Celaire. Segun D.L. e ta kere cu Celaire lo a papia cu Zulu y a base di esey, Zulu a bay papia cu Polis.
Ya condena pa intento di mata: Hues a bisa cu desde e incidente, e rumannan tin casi 6 luna sera. Hues a bisa cu J.L. na 2020 a wordo condena na 5 aña di prison pa intento di mata cu arma. Na Juli 2025 el a sali cu tempo di prueba di 20 luna. E incidente a sosode den e tempo di prueba.
Hues a sigui cu D.L. kende tin un caso di sospechoso di arma. Ademas D.L. tin un condena di 18 luna di prison di cual 6 luna ta condicional pa posesion di arma. E tempo di prueba di 6 luna ta ainda valido ora cu e caso aki a sosode.
Fiscal a baha pisa: Fiscal a bisa Hues cu na momento cu Celaire a presenta na warda di Polis San Nicolas y a bisa cu nan a caba di tira riba dje, a cuminsa un investigacion.
Recherche a tuma denuncia di Celaire kende a bisa cu na e cruzada na Cura Cabay y Brazil, un auto a para banda di dje y los 2 tiro riba dje cu un arma largo.
Dos impacto di bala riba auto: Tambe bisa cu el a bisa cu el a tende cu ta J.L. y D.L. ta esnan cu a tira riba dje for di un Nissan blanco. Tabatin 2 impacto di bala riba e auto. Un bala a bora e asiento di chauffeur unda Celaire tabata sinta y a keda pega den esaki.
Na altura di e supermercado Chines banda di e cruzada, a haya un huls di bala. Celaire a bisa Recherche cu lo tabatin un problema caminda el a tira riba un grupo di Noord na San Nicolas y cu J.L. den KIA lo ta asocia cu esnan di San Nicolas.
Security Camera: Departamento di Inteligencia di Polis a duna informacionnan di J.L. y D.L. y a base di esakinan a cuminsa investigacion. Fiscal a mustra cu for di imagennan di video di seguridad por mira e Nissan Versa blanco tabata core tras di e auto di Celaire pa un distancia. Na altura di e cruzada Cura Cabay a bira bay Brasil y na altura di e supermarket Asiatico por a scucha e tiramento pero no tin imagen di esaki.
A haya imagennan di video den e caya unda J.L. y D.L. ta bida y por a mira un rato despues di e tiramento, e auto yega eynan. Por a mira cu J.L. y D.L. ta baha for di e auto y despues ta drenta otro auto. Fiscal a bisa cu Recherche a haci investigacion riba e auto Nissan Versa caminda ta mira rasca di e arma largo na e auto.
Testigo importante: Fiscal a mustra riba declaracion di un testigo importante, kende a conta tur cos con e tiramento a sosode. Fiscal ta haya cu tanto J.L. como D.L. ta duna declaracion no confiabel.
Fiscal ta haya legalmente proba cu e dos rumannan ta complice di intento di mata y complice di posesion di arma. Fiscal a bisa cu e caso ta hopi serio. El a bisa cu si e bala a perfora e asiento completo, awe Celaire lo no ta hunto cu nos mas.
Fiscal a baha pisa: Pa cu e castigo, Fiscal a bisa cu e ta tene cuenta cu tanto J.L. como D.L. ta residivista. El a mustra cu J.L. a wordo condena pa intento di mata y a wordo castiga na 2020 na 5 aña di prison. Fiscal a sigui bisa cu D.L. na Mei 2024 a wordo condena na 18 luna di prison di cual 6 luna ta condicional pa posesion di arma di candela.
Fiscal a exigi 6 aña di prison pa J.L. y D.L. El a bisa cu e pochi di marihuana y saco di marihuana cu a haya mester wordo destrui.
Rumannan menaza door di Celaire: Na final di tratamento di e caso, J.L. a remarca na Hues cu e no a tende nada durante tratamento di e caso, di e menazanan cu Zuriel Celaire a haci contra dje y su famia. D.L. a bisa Hues cu e tambe a haya menazanan.
Hues a bisa cu e ta bay studia e caso. Dia 2 April 2026 e lo tuma un decision.
