Hues a hala su atencion cu pa e biaha aki e ta dun’e un chens
ORANJESTAD (AAN): Diahuebs mainta un hoben masculino di inicial A.M. di 18 aña a bisa Hues cu el a siña su les y cu e ta cambia su bida. Polis a bay haci investigacion na unda A.M. ta biba y a haya un cantidad di marihuana y tambe un revolver cu balanan. Fiscal a exigi 135 dia di prison di cual 30 dia ta condicional cu un tempo di prueba di 3 aña y tambe trabao pa comunidad.
Hues a bisa A.M. cu mirando cu A.M. a bisa cu el a siña su les, Hues a dun’e un chens y a condena A.M. na 135 dia di prison di cual 30 dia ta condicional cu 3 aña di prueba. Hues a baha e cantidad di oranan di trabao pa comunidad, pa asina duna A.M. chens cu e por busca un trabao y bay school bek.
Droga y arma: Por a mira cu A.M. a presenta cu su mama. E mama tabata duda si e kier drenta den sala. E yiu a bisa e mama pa e keda pafor warda. Hues, ora el a tende di e Griffier cu e mama ta pafor, a bisa Griffier pa yama e mama pa bin paden. E mama a presenta den sala di Corte y Hues a bis’e cu e ta contento cu e tey.
E acusacion cu Fiscal a presenta contra A.M. ta cu entre 7 Maart 2024 y 7 Maart 2025, e tabata bende y tabatin marihuana den su posesion. Tambe A.M. ta worde acusa di posesion di un revolver y balanan entre 7 Januari 2025 y 7 Maart 2025. E tempo ey A.M. tabatin 17 aña y recien a cumpli 18 aña.
Bende droga: Hues a bisa cu Polis a haya informacion cu A.M. tin un arma y ta bende droga den Madiki. Polis tambe a informa den su relato, cu na Maart 2025 durante parada di carnaval, A.M. tabatin 20 piedra di droga y Polis a kita esakinan for di dje. Despues, Polis a dicidi di haci investigacion na e cas unda A.M. ta biba. Polis a constata cu na e cas tabatin algun persona. Polis a haya den un cashi un saco cu marihuana. Casi 127 gram di marihuana a haya na e cas.
Segun A.M., door di hopi stress door di e situacion cu el a perde dos ser keri tras di otro, e ta uza hopi marihuana pa e trankilisa. Hues a remarca cu e cantidad ta hopi pa propio uso y cu e ta mustra mas cu ta bendemento di marihuana tin. Segun A.M. e droga no tabata di dje so sino di e homber O. cu tabata kedando cun’e. Segun A.M. e ta usa marihuana tipo “berde” y no marihuana tipo “cripy”. El a bisa cu120 gram ta di dje y cu pa dia e ta usa 10 sigaria. Hues a bisa cu tin dos hende cu ta bisa cu nan tabata cumpra for di A.M. Hues tambe a puntra A.M., kico e tabata haci na Maart 2025 cu 20 piedra. A.M. a bisa Hues cu ta carnaval y esey e tabata usa.
Revolver: Encuanto e revolver, A.M. a bisa Hues cu e no kier papia di e arma. Hues a bisa cu ta A.M. su derecho pero e ta haya preocupante cu A.M., teniendo cuenta cu su edad, tin un arma. Na dado momento A.M. a bisa Hues cu el a haya e revolver den mondi na Dakota. El a hinca e arma den un caha y na dado momento esaki a disparce. E ta sospecha cu ta e homber O. cu tabata kedando na e cas, lo a coy e revolver.
Hues a mustra cu den smartphone di A.M. a haya un video di A.M. cu e arma. A.M. a admiti esey y a bisa tambe cu e arma tabata frustia y cu e no a ripara cu e revolver tabatin bala. Hues a bisa cu e homber O. a bisa Polis cu e arma ta di A.M. y cu A.M. tin esaki 5 luna.
El a bisa cu A.M. tabata fia hende e arma y cu e arma tabata scondi den un auto. El a mustra Polis e auto y Polis a haya e arma. Hues a remarca cu si bay tras di tur hende cu ta cay sera pa arma nan declaracion, ta parce cu den mondinan di Aruba tin hopi arma.
Hues na dado momento a invita e mama di A.M. pa bay sinta dilanti banda di A.M. pa asina papia cu nan dos pa asina tin un imagen con cos ta bayendo. E mama a bisa Hues cu el a ripara cu A.M. a cambia y ta trahando. Hues a bisa cu e ta contento di tende esey. El a puntra A.M. si e ta anda cu e amigonan. A.M. a bisa cu e no ta anda cu O. mas.
Fiscal: Fiscal a bisa cu Polis a haya hopi marihuana na e cas unda A.M. tabata keda. Mayoria di e marihuana tabata den A.M. su camber. E arma tambe Polis a haya. Dos hende a bisa di tabata cumpra for di A.M. Fiscal a bisa cu e pregunta ta, kico mester haci pa e hoben aki stop di e caminda robez aki. Fiscal ta haya cu awor A.M. ta realiza cu esaki no ta e caminda bon. El a busca trabao.
Fiscal a mustra cu A.M. tabata 105 dia sera. Fiscal ta haya cu un castigo combina ta na su lugar y cu A.M. no mester bolbe bay prison. El a exigi 135 dia di prison di cual 30 dia ta condicional cu 3 aña di prueba. Fiscal a bisa cu A.M. mester considera esaki un forma di aviso. Fiscal a bisa cu posecion di arma ta sumamente peligroso, especialmente den hubentud. El a exigi 120 ora di trabao pa comunidad y si A.M. no cumpli cu esey, e lo mester bay 60 dia den prison.
Sentencia: Despues di a scucha abogado mr. Hernandez, Hues a dicta sentencia di biaha. Hues ta haya A.M. culpabel di posesion y bendemento di marihuana y tambe posecion di un arma di candela. El a bisa cu door cu A.M. ta hoben, e ta dun’e chens.
Hues a hala atencion di A.M. cu normal den un caso asina, ta mas cu 1 aña di prison ta e castigo. Den e caso aki, teniendo cuenta cu A.M. tabatin 17 aña, Hues a aplica castigo hubenil. El a condena A.M. na 135 dia di prison di cual 1 luna ta condicional cu 3 aña di prueba y 90 ora di trabao pa comunidad. Si A.M. no cumpli cu e trabao pa comunidad, e lo mester bay 45 dia cera.
