ORANJESTAD (AAN) – Hof di Corte Superior recientemente via video conference a dicta sentencia den e apelacion di e sentencia di Juli 2020, caminda Hues di Corte den
Promer Instancia a condena e capitan di e “tugboat” “Garcia”, e Venezolano H.H.C. na 10 aña di prison. H.H.C. a wordo haya culpable di a importa 2253 kilo di cocaina.
Ta asina cu Fiscal a exigi 12 aña di prison y Ministerio Publico a apela. Durante tratamento di e caso den Corte Superior, Hof a mustra cu for di autoridad Colombiano, Guarda Costa di Aruba a wordo notifica cu tin un “tugboat” ta navegando cu un cargamento grandi di droga. Guarda Costa a warda ora cu e boto aki tabata den awa territorial di Aruba y a intercepta esaki.
Den un bodega di e boto a bin haya 53 bulto cu a pisa 2253 kilo di cocaina. E otro 4 miembronan di tripulacion, a wordo declara liber pasobra Hues di Corte den Promer Instancia ta haya cu no tin indicacion cu e 4 miembronan di tripulacion tabata sa cu tin droga abordo. A resulta cu e boto aki a sali for di Colombia cu destino Trinidad Tobaco.
CASTIGO
Procurador General a bisa Hof cu e ta haya legalmente proba cu e capitan di “Garcia”, H.H.C., ta culpable di a transporta droga. Procurador General a exigi pa subi e castigo di 10 pa 12 aña di prison, mirando e gran cantidad di droga cu tabatin abordo di e boto.
Hof a bisa cu e ta haya legalmente proba cu H.H.C., intencionalmente a transporta e droga. Como capitan di e boto e ta responsabel. Mirando e gran cantidad di droga, esta 2253 kilo, Hof ta haya cu esaki tabata destina pa mercado internacional.
Hof ta haya cu pa cu e castigo, no solamente mester tene cuenta cu e cantidad di droga cu a keda confisca sino tambe kico tabata e funcion di e capitan. Hof a mustra cu for di henter e investigacion por conclui cu e capitan H.H.C. su funcion tabata unicamente transporta e droga. Hof ta haya cu no tin ningun indicacion cu H.H.C. tabata envolvi den e preparacion di transportacion di e droga. Teniendo esaki na cuenta, Hof ta haya e castigo exigi pa Procurador General di mas.
Hof a condena H.H.C. na 8 aña di prison, cu ta menos cu e 10 aña di prison cu Corte den Promer Instancia a condena H.H.C.
