ORANJESTAD (AAN): Un update cu Ministerio Publico a suministra Diabierna atardi laat, ta mustra cu e investigacion rond di Caso Avestruz ta den full swing.
Pa LandsRecherche a detene cinco sospechoso den e ultimo dos simannan aki relaciona cu e investigacion di posible delitonan di corupcion y otro hechonan castigable rond di otorgamento di terenonan di gobierno.
E sospechosonan aki ta envolvi na diferente manera den e investigacion. Dos di nan a worde poni den libertad mientrastanto, esta e hoben di fam Richardson, y tambe e persona di fam Faro. Sinembargo Ministerio Publico ta insisti cu nan ta keda ‘sospechoso den e caso’.
Caso Avestruz ta dirigi riba e pregunta si un of mas compania a sa di obtene (un opcion riba) derechonan di erfpacht di kavelnan di Pais Aruba a base incorecto durante e añanan 2009 te 2017. E eventual rol cu un ex-minister a hunga den esaki tambe ta worde investiga.
Vocero di Ministerio Publico, Ann Angela, a finaliza bisando cu no ta exclui cu lo bin mas detencion den e caso aki.
