ORANJESTAD (AAN) – Hof di Corte Superior, recientemente via video conference a dicta sentencia den e apelacion di e sospechoso T. contra su condena di 5 aña
di prison. Hues di Corte den Promer Instancia a haya T. culpable y a conden’e na 5 aña di prison. E sentencia tabata na Juli 2020 y den Corte Superior, T. mescos cu tabata e caso den Corte den Promer Instancia, ta para riba cu e no a abusa di e muchanan.
ABUSA DI MUCHANAN ORA DI HUISWERK
Hof di Corte Superior, ta comparti punto di bista di Hues di Corte den Promer Instancia y ta haya legalmente proba cu T. a abusa di e dos muchanan menor di edad cu ta famia di su pareha. Durante 2 aña, T. tabata abusa di e muchanan bou di e pretexto cu e ta yuda nan cu huiswerk.
E sentencia ta mustra cu mester conclui cu no tabatin penetracion sexual sino cu dede.
Hof ta haya cu aki ta trata di abuso di dos menor di edad den e mesun camber bao di e pretexto di ta yuda cu huiswerk. Hof ta haya cu tin prueba di sosten door di testigonan. Hof ta haya T. culpable di a comete e delito di tabatin relacion cu muchanan bou 12 aña y a haci esaki mas biaha. Ta trata di hechonan grave cu a sosode durante hopi tempo den cas di wela di e muchanan.
CASTIGO
Hof a tuma T. na malo cu a abusa di e muchanan. Hof a mustra cu e muchanan mester a sinti nan mes sigur na cas di wela. Loke ta haci e caso mas grave ta e hecho cu e muchanan ta famia di T. Hof ta haya cu T. a abusa di e confianza cu e muchanan tin den T. Hof a mustra cu hechonan asina ta afecta e muchanan den nan desaroyo pa bira adulto.
Hof a confirma e sentencia di Corte den Promer Instancia y a condena T. na 5 aña di prison, kitando e tempo cu e ta sera den KIA.
