ORANJESTAD (AAN): E hombernan di Haiti biba na Aruba W.E. di 18 aña y R.M.B-A di 21 aña,
Diabierna merdia a scucha Fiscal exigi 2 aña di prison pa W.E. y 3 aña di prison pa R.M.B-A. Fiscal ta haya nan culpabel di a haci atraco arma riba un pareha turista dia 3 September 2024.
Ta asina cu dia di e atraco arma, W.E. tabatin 17 aña y R.M.B-A cu 20 aña. E turistanan: dama M. y e homber B. a bira victima, caminda e homber B. a wordo maltrata na cabez, mientras cu e dama M. a wordo menaza cu un arma.
Atraco arma cu violencia: Ta asina cu W.E. a admiti dilanti Hues di a haci e atraco arma cu violencia. El a bisa cu e dia ey anochi e tabata bou influencia di droga. W.E. a bisa cu e y R.M.B-A a bay core rond cu un amigo y na dado momento, ora nan tabata riba un parking lot, e amigo a bin cu e plan pa haci e atraco riba e pareha turista cu tabata canando ey banda. Segun W.E., e no a haci violencia pero a coy e tas di e turista cu tabata benta abao y core bay cun’e na e auto. El a bisa Hues cu e turista homber tabata riba suela. Segun W.E., e no tabata sa cu tin arma di candela y no a mira arma di candela. Hues a mustra cu investigacion di Polis ta mustra cu den e “trash” di e cellular di W.E. a haya potret di armanan di candela. Segun W.E., e no a saca potret di armanan pero por ta cu amigonan a manda potret p’e.
R.M.B-A. a bisa Hues cu e no a haci nada. El a bisa Hues cu e no a coy nada di e pareha turista. El a bisa cu ora el a mira cu nan a ataca e homber, el a spanta y a core drenta e auto. Hues a bisa cu e ta haya straño cu R.M.B-A. no a mira nada. E ora ey el a bisa cu el a mira movecionnan y a core bay bek den auto. Hues a bisa cu tin un testigo cu a bisa cu el a mira 3 homber a ataca e pareha turista. R.M.B-A. ta para riba cu e no a haci nada. Hues a mustra cu e testigo a bisa cu despues di e atraco, e 3 hombernan a core bay hunto. R.M.B-A. a reacciona cu esey no ta berdad.
Hues a bisa cu tin imagen di camera di seguridad caminda Polis ta mira 3 homber ta baha for di e auto y ta core bay den direccion di e turistanan. Na opinion di Hues, esaki ta cuadra cu loke e testigo a declara. Hues a remarca cu R.M.B-A. a bisa cu el a core bay auto siendo cu riba camera ta mira nan ta bay riba e turistanan. R.M.B-A. a bisa Hues cu el a core pasobra e kier a uza e wifi ey banda pa ora su amiga yam’e. W.E. a bisa Hues cu el a participa den e atraco door di coy e tas y core bay na e auto.
Hues a mustra un otro aspect esta cu e auto Toyota blanco cu e trio tabata aden tabatin 7 minuut ta core rond na e parkinglot. Hues a remarca, pakico a tarda asina siendo cu segun declaracion di W.E., nan a bay orina.
Hues a mustra cu e dama turista M. a bisa cu nan tabata cana y diripiente 3 homber a core bin riba nan. Un di nan tabatin un arma di candela. E atracador a bis’e pa keda keto, a ranca su smartphone di dje. E turista a declara na Polis cu el a mira con e otro dos atracadornan, a ataca e homber y bent’e abao y bay cu su pertenencia. Hues a remarca cu loke e victima ta declara, no ta cuadra cu loke e dos sospechosonan a declara. E homber B. a bisa cu diripiente el a wordo gedal di lomba na su cara y el a perde conocimento. Polis a haya cellularnan y tabatin un papel cu nomber di W.E. Ta asina cu despues di mey ora di e atraco, a detene R.M.B-A. Ta asina cu nan tin 8 luna sera caba. Ta asina cu W.E. ta adicto na XTC y kier haya ayudo. R.M.B-A. tambe ta usa marihuana y XTC. E tambe kier haya ayudo. El a bisa cu e relacion cu su mama no ta bon. Nan no ta compronde otro y e ta haya cu lo ta bon pa haya ayudo.
Fiscal a exigi 2 y 3 aña di prison: Fiscal a bisa Hues cu e dama turista M. a declara cu tres homber a bin riba nan y uno a saca arma riba M. y bisa pa keda keto. E amigo turista, B., a wordo gedal y el a perde conocimento. El a bisa cu el a tende di e dama M. cu el a wordo menaza cu un arma. Fiscal a sigui bisa cu W.E. y R.M.B-A ta bisa cu nan no sa nada di arma. Fiscal a remarca cu den cellular di W.E a haya un potret cu ta un rato promer cu e atraco a sosode. Esey ta haci cu Fiscal ta haya cu a usa un arma. Fiscal a bisa Hues cu e ta haya cu conhuntamente W.E. y R.M.B.A. a haci e atraco cu violencia.
El a sigui bisa cu tin imagen di camera caminda ta mira tres homber y tambe tin declaracion di testigo cu ta bisa cu 3 homber a haci e atraco. Fiscal a remarca cu esaki ta otro cu loke W.E. y R.M.B-A. ta bisa. E ta haya legalmente proba cu e duo aki ta culpabel di atraco cu violencia. Fiscal ta haya hopi serio cu a atraca e pareha turista. El a sigui bisa cu ta un hecho cu e caso aki a haya hopi atencion den prensa. Esaki a conmove comunidad. Na opinion di Fiscal, ta parce cu e dos acusadonan tabata droga y tabata pensa solamente riba nan mes. Fiscal a tuma nan na malo pa loke nan a haci.
Pa cu e castigo, Fiscal a bisa cu e ta tene cuenta cu W.E. tabata 17 aña ora el a haci e atraco y tabatin casonan habri ainda na Ministerio Publico. Fiscal ta haya cu tanto W.E. como R.M.B-A. mester di guia manera nan mes a pidi. Fiscal a exigi pa W.E. 24 luna di prison di cual 6 luna ta condicional y cu 2 aña prueba, bou guia di Reclassering. Pa R.M.B-A., Fiscal a exigi 3 aña di prison di cual 6 luna ta condicional cu 3 aña di prueba y bou guia di Reclasssering.
Abogado: Abogado mr. Ras di W.E. a bisa Hues cu no tabatin planeamento di un atraco arma. Ta spontaneo esaki a sosode. Ta door di usamento di droga esaki a sosode pero no a menaza cu arma, no a usa violencia. E abogado a bisa cu tur cos ta bay tras di declaracionnan di e dama turista M. Ta e so ta papia di un revolver. Su declaracion so no ta suficiente. E potretnan di arma no por bisa cu ta W.E. a saca nan of el a haya nan. E otro turista B., cu a perde conocemento, ta basa su declaracion riba loke e dama M. a declara. Na opinion di abogado no tin suficiente prueba cu el a haci atraco. El a core bay cu e tas. E abogado ta haya cu castigo hubenil mas abao cu Fiscal a exigi ta na su lugar.
Abogado di R.M.B-A., esta mr. Soekandar acompaña pa mr. Rep a remarca na Hues, kico a pasa cu e otro sospechoso. Haya cu no tin prueba confiabel cu R.M.B-A. a participa den e atraco arma. E tabata presente pero no tin prueba cu el a haci algo den e atraco. No tabatin planeamento y no tabatin cooperacion pa haci e atraco. E abogado a bisa cu el a spanta ora el a mira e atraco sosode y a core bay den e auto. E no a coy nada y no a haya nada di e atraco. E abogado ta haya cu mester declara R.M.B-A. liber. E abogado a remarca cu pa loke ta uzamento di arma, ta solamente e turista ta bisa esaki y no tin ningun indicacion cu a uza arma. E abogado a sigui bisa cu den cellular di W.E. a haya potret di arma pero nada mas.
Na opinion di abogado, cu e turista homber B. a sufri sla y a perde conocemento, no tin ningun potret di e maltrato. El a bisa Hues cu no ta asina cu e caso aki a conmove henter comunidad. E abogado a conclui cu no tin prueba concreto y e ta haya cu mester declara R.M.B-A. liber. E abogado tambe a bisa cu R.M.B-A. kier haya ayudo pa su problema di uza droga y drecha relacion cu su mama. El a pidi Hues pa tene cuenta cu R.M.B-A ta un first offender.
Hues a cera tratamento di e caso y a bisa cu e ta bay studia e caso y dia 12 September 2025, lo tin sentencia.
