ORANJESTAD (AAN) – E homber N.G.,via video conference a presenta dilanti Hues di Corte di Husticia den Promer Instancia pa e caso penal cu Ministerio Publico a cuminsa contra dje.
HINCA HOMBER DEN LOMBA
Den sala di Corte tabata presente: Hues, Fiscal y abogado di N.G., mientras cu N.G. tabata den un oficina na KIA. E caso tabata pro forma o sea cu no a trata e caso sino a stipula un fecha riba cual lo trata e caso.
E acusacion cu Fiscal a presenta den Corte contra N.G. ta cu riba 14 April 2021, el a purba asesina E.B. door di hink’e varios biaha cu cuchio den su lomba. Tambe, subsidiario, Fiscal ta acusa N.G. di a purba causa maltrato severo riba E.B.
CASO POSPONE
Fiscal a bisa cu e caso ta pro forma door cu ainda falta un rapport medico. El a bisa Hues cu ya tin e procesverbaal pero ainda falta e raport medico di e situacion di e victima. Fiscal a propone pa tratamento di e caso tuma lugar dia 22 October 2021 pa 9.30 di mainta. Hues a bay di acuerdo y a pospone e caso pa dia 22 October 2021y cu N.G. ta keda sera den KIA te dia di e caso.
