Zury Ruiz corona como Miss Eco Aruba 2022 pa bay representa e isla na Egipto

ORANJESTAD (AAN): Diasabra atardi na Checkpoint Color, tabatin un open casting pa damanan hoben cu lo kier haya chens di representa Aruba como “Miss Eco International Aruba 2022”

na un certamen cu lo tuma lugar na luna di Maart venidero na Cairo, Egipto.

   DIARIO a compronde cu un total di 4 dama hoben local a acudi na e casting.

   Despues di esey, riba Diadomingo atardi durante un agasaho na The Vue Rooftop na The Cove Mall, a tuma lugar coronacion di Miss Eco Aruba 2022.

   Vicky Zimmerman di ‘Vicky Foundation’ cu sede na Hulanda, ta esun cu a corona e dama Zury Ruiz.  E sjerp a wordo poni door di Stacey van Gaalen, y un bunita flor entrega door di Alexia Chin.

   Como prome finalista a keda Xanthe Piña, kende tambe a haya su sjerp cu flor y regalo.

   E candidata tin di representa no djis e beyeza di Aruba, sino e mensahe di proteha ecologia.  Cu e enfasis riba ‘beauty and brains’, e certamen ta uno cu ta diferente riba e otronan conoci.  E certamen final mes lo ta dia 18 di Maart venidero na Egipto.

   Vicky Zimmerman a ricibi asistencia di e conocido Robin Croes-Ponson den preparacion di e casting.

   Di awor caba DIARIO ta desea Zury Ruiz tur clase di exito, y ta felicita Xanthe Piña tambe.