ORANJESTAD (AAN): E yobida cu a cuminza cay desde Diabierna marduga banda di 2:00 am, sigui henter marduga,
mainta, y hasta merdia ya atardi no tabata producto di ningun Ola Tropical cu a pasa aki banda.
Ta e asina yama ITCZ, esta e Zona di Convergencia Intertropical a activa, y esaki a aumenta humedad na forma substancialmente den region. E ITCZ aki ta un franha di presion abao cu normalmente ta den area di equator, unda bientonan di hemisferio nort y di hemisferio zuid ta convergi.
E convergencia aki ta pone aire subi y ta crea nubia na cantidad abundante, cu ta bin hunto cu yobida fuerte y tambe lamper cu strena. Pero e ITCZ aki ta un zona dinamico, cu ta schuif cada temporada y esaki a yega e weekend aki den Lama Caribe cerca di Islanan ABC.
Pesey pa awe ainda por spera yobida, y hasta tin pronostico pa lamper cu strena awe Diasabra anochi. Esnan cu ta bayendo concierto tin di tuma nota di e pronostico ey.
Aki por mira loke turista y tur demas hende na Palm Beach a mira riba Diabierna mainta cu asina hopi nubia scur riba Lama Caribe. E potret aki pa cortesia di Fundacion Centro di Pesca Hadicurari.
